PL. V
F. 5lv
FE. 52v
ne moins que la discretion sens et entendement raisonnable que dieu nous a donne precede ou doit preceder lappetit brutal du desir voluntaire que souuent nous auons. Et pour ce doncques la facon de non lui desplaire est tele a tenir. Premier leuure qui est prise pour la poure femme qui a doubte de cheyr de dessus le pont en la riuiere cestassauoir en lire de dieu doit en marchant sur le pont de la conscience taster et essayer les bois de la pensee qui souuent sont frailes et pourris en facon que se le pont crye elle puist retirer son pie a soy. Cestassauoir son propos arriere ains quelle si asseure pour vouloir oultre passer. Car sil ya nul scruple la conscience le remordera en repugnant et contrairiant a leuure. Et pour faire finale conclusion 1l vault trop mieulx ne soy pas tant haster dacomplir son desir pour saouler laffection de ses vains appetis que tant sauanchier que tous les merites et bienfaitz soient peris par pechiez. Et cellui qui acouplera auec ses pensees le souuenir de non offendre ayant la crainte de son amour perdre prudence tousiours deuant ses yeulx ne pourra perillier ains passera seurement et arriuera au molin de paradis ouquel il trouuera que de ses merites luy fera farine pardurable de laquelle aura pain rassaisiant dentiere et souueraine contentesse en maniere que jamais plus ne sera son ame fameilleuse ne souffraiteuse de riens quelle vueille ne desire auoir. Et ainsi sur ce second point de la crainte de dieu me passe legierement sans autrement declairier pour non attedier en prolixite de parolles. Cars a gens de bon entendement doit ce peu dexemple souffire a retenir en leur cuer pour sen deuoir aidier tousiours quant temps et lieu seroit et quil en sera besoing pensant lors quilz vouldront faire quelque chose ains quilz commencent a la faire se elle se puet faire sans pechie et par facon quilz nen cheent en lire et lindignation de nostre createur. Et se sur la tierce et derreniere part de mettre paine et prendre garde a toute heure sans delay et soy estudier sans cesser de faire les choses que tu sces et penses qui plus doiïuent plaire a
la maieste de ton createur pour plus acroistre lamour quil te porte de sa benigne grace veulz sauoir que as affaire vecy comment tu ty auras a conduire. Preng quil fust aduenu que vng tresgrant lusticier saige puissant capitaine darmes teinst vne cite assiegee en laquelle auroit gens habitans iniques peruers et plains de voulente sans foy sans loy et sans iustice lesquelz icellui grant capitaine desireroit constraindre de venir a raison. Et pour ce faire chascun jour fort les aloit approchant et aussi pressant en facon que plus 1lz ne pouoient souffrir et endurer la paine et traueil que par ceulx de dehors leur estoit donne. Car si fort rompus estoient ia les murs et si forment froissiez de grans cops de bombardes que de iour en iour versoient souuent a terre ca et la en pluseurs et diuers lieux et desia tant de bleschiez auoit la dedens que plus ou peu de deffenses y faisoient ne ny auoit lieu propice ou on les peust faire telement que ceulx de dedens ne se sauoient ia plus ou tenir. Et dautre part de pierres estoient comblez tous les fossez ou la plus part. par la grant quantite des murailles qui estoient versees. Si aduisa le saige capitaine que temps estoit de donner lors lassault dont fist cryer par lost a son de trompe trois jours continuelz quil voloit assaillir la cite pour la prendre. Pourquoy cellui qui lors plus hardiment et mieulx feroit et qui par sa vaillance le premier entreroit en la cite sa fille a mariage lui donneroit. Et lors chascun qui oy le cry du capitaine comme mieulx peut au iour nomme sarma pensant gaignier vng si tresnoble pris comme dessus est dit. Si aduint que vng vaillant homme darmes entre les autres proposa que pour morir point il ne laisseroit quil ne deust entreprendre de pouoir entrer tout la premier. Et le iour de lassault venu pas ne failli a soy tresbien armer. et sur son col troussa lors vne eschiele tyrant vers la ou lassault se donnoit. Ainsi en cheminant trouua le cappitaine lequel lui demanda ou il vouloit aler. et il respondi que a lassault aloit ainsi que lun des autres. Alors le cappitaïine lui dist. Hola attens et mescoutte ains que ailles
plusauant. Car enseignier te veul se tu veulz et se a toy ne tient comment tu gaigneras le pris de tout lassault comme le plus vaillant. Adoncques deuant son cappitaine sarresta lomme darmes en escoutant ce que dire vouloit lequel commenca a dire ainsi Se desir as en cest assault de pouoir gaignier le pris que fay donner il te fauldra tout premierement que tu regardes lendroit le plus propice et aussi conuenable a dreschier ton eschielle et lui donner tel pie en lasseurant telement que pour combattre que tu doiïiues faire dessus elle ne ploye ne gaincisse ca ne la en regardant bien lors que dreschie lauras et aincois que tu y montes que iuste soit et que le pie se repose en lieu qui soit ferme et estable pour mieulx veoir soustenir leschiele et le fais de ta personne armee. Et pour le plus seur te vouldroie conseillier que le pie de leschielle fust assis et pose sur pierre dure si quelle nentrast en terre et lors les eschiellons sans toy haster lun apres lautre pourras monter aiant tousiours lune main a leschielle et le regart en hault pour deux raisons. lune pour veoir comment tes ennemis te vouldront offenser et dequoy. et lautre affin que mieulx tu soustiengnes et puisses endurer les cops quilz te donneront et les pierres quilz te jetteront. et ne veulles pas plus tauanchier deniamber plus dun eschiellon a la fois. Car autrement tu pourroies cheoir en bas. non pas par aduenture au pie de leschielle maïs es fossez iusques au fons. Et se tant pues faire que iusques sur les murs tu puisses aduenir tes ennemis lors ne te oseront attendre ains sen fuiront deuant toy ne ilz ne te nuyront plus ne feront trauail et en quelque estat ne lieu que tu soyes ayes sur toute riens hardi courage et ferme voulente sans estre recreant pour ennuy de destresse ou de paine que portes ne doiues endurer. À ces motz lomme darmes se party et print congie de son bon capitaine en le remerciant et promettant que ainsi le feroit. Aquoy le cappitaine dist je verray moult bien se ainsi le feras Car tous ceulx qui en lescielle seront pour ma querele au iourduy combatans regarderay et tous leurs faitz aussy. Et pour
ce véulliez si bien et si vaillamment faire que clerement ie congnoisse que tu aies mieulx fait que nulz des autres qui a la cite donneront ainsi que toy lassault lesquelles choses dittes lomme darmes sen ala droit aux fossez de la cite ou il descendi puis iusques au pie du mur monta isnelement. et lors quil y fu la se reposa vng peu. Adont drescha leschiele contre le mur. Et ce fait lui
donna pie sur dure pierre et fine si que nullement decliner ne
pouoit dune part ne dautre Puis commenca a empoignier leschielle dune main et lun des piez mist sur le premier eschiellon. Alors quant ceulx de la cite qui gardoiïient les murs lappercurent ilz coururent celle part et soudainement commencerent a jetter grans cailloux et dures pierres sur sa teste et sur ses espaules telement que fort le greuerent mais pour ce ne plus ne moins. car fermement se tint et tous les eschiellons monta lun apres lautre ne pour riens que on lui feist point ne perdi courage ains tant fist en combatant que iusques au hault de la muraille vint et main a main auec les ennemis lesquelz plus ne loserent attendre. Mais a vne fois deguerpirent la place et demoura seul triumphant et victorieux pour tous
autres ce jour dont sensieut que le capitaine comme au plus vail-
lant lui donna sa fille a espouse ainsi que promis lauoit si en fu a honneur a jamais et sans fin.
Comment lomme darmes estant sur leschiele combat contre ceulx de Îla cite.
Or veul ie reuenir a declairier la substance et vray effect de la similitude deuant dicte. Et premierement la cite assiegee est prinse pour le monde et les murailles sont prinses pour les vanitez dont le monde est si fort auironne. et les fossez pour la paresse de bien faire les bourgois habitans en la cite sont prins pour les vices et delices du monde et vrayement bien sen peuent dire et appeller les delices bourgois et citadins. Car les bourgois et citadins dune cite sont les
