CHAPITRE XXXIX

Comment Saintré, apres qu'il eut ouye la messe, envoya par deux heraulx d'armes deux haches à messire Enguerrant, selon le contenu de son entreprise. Puis comment le roy envoya son herault signifier à Saintré l'heure pour aller aux lices.

L’ACTEUR. — Au deuxiesme jour apres, jour des armes assigné, Saintré, avant que nulle chose ne fit, ouyt sa messe de sainct Esperit, où il se fist donner la beneysson. -Puis par deux heraulx et ung varlet fist à messire Engsuerrant porter ses deux haches couvertes, pour en prendre le chois, ainsi que en son emprinse estoit contenu. Et lesquelles haches, l’une choisie et prinse, les heraulx trouverent le roy d'armes d'Aragon, qui à Saintré tout premier venoit donner, de par le roy, l'heure à deux heures apres midy, pour venir es lices parfaire ses armes à pié ; auquel roy d'armes, Saintré remercia le roy tres humblement, puis luy donna ung tres bel mantel de damas cramoisy, broché d'argent et fourré de fines martres sebelines, pour la tres bonne et joyeuse nouvelle qu'il apportoit, lequel puis fist son rapport au roy.

L'acteur. — Et quant une heure après midy fut sonnée, le

roy et la royne, ainsi que dist est, furent montez en leurs hours, lors il envoya dire aux parties qu'ilz vinssent. Alors Saintré, comme le commenceur et entrepreneur, et non mye appellant, fut à cheval le premier, saisi de sa banerolle et faisant le vray signe de la croix, en disant sa dicte beneysson ; et le surplus par la façon qui s’ensuyt.