CHAPITRE LI
Comment le seigneur de Loisselench et Saintré vindrent es lices, et firent leurs armes à pié.
Le jour que les armes devoient estre, et à l'heure qui leur fut ordonnée, le roy et la royne, les seigneurs et les dames, furent sur leurs hours. Le sire de Loysselench, par les sires d'Andach et de Morg, envoya au roy deux lances à poulcez [pour les joutes à pied], pareïlles, ferrées et armées chascune de sa rondelle pour couvrir la main devant, et painctes en vermeil, et aussi deux haches, deux espées et deux dagues, toutes pareïlles, sans nulle difference. Lors le roy, pour abregier, print de ces poinctes quatre, qu'il envoya à Saintré, et les aultres quatre rendit ausdits seigneurs d'Andach et de Mors, pour les reporter au seigneur de Loysselench, Et ce faict, le seigneur de Loysselench, armé de toutes armes, fors que du chief, se partit de son logeis, à telle ordonnance que, aux aultres armes à cheval, avoit fait. Et tant plus que les contes de Nevers, de Boullongne, et de Tancarville, et de Restel, devant luy portoient les quatre pointes, à cheval ; et apres eulx, le duc de Berry, qui portoit son harnoïs de chief; et puis luy, armé de toutes ses armes, houssé de son destrier de fin veloux, aux couleurs de ses propres armes, et apres luy, mains barons et aultres nobles hommes ; et en tel estat vint entrer es lices, et descendre en son nouvel pavillon que le roy lui avoit fait dresser, et avecques luy, ceulx qui ordonnez y estoient, Et quant il fut descendu, ne tarda guieres que Saintré vint à tres belle et noble compaignie ; et devant luy, venoient les contes du Perche, de Clermont, de Sainct Pol et de la Marche, qui portoient ses quatres poinctes devant luy ; et apres eulx, le duc d'Anjou, qui semblablement portoit le
L harnoys de son chief ; et en celle tres belle compaignie, vint
pareulement descendre en son aultre pavillon que le roy aussi luy avoit faict dresser pour luy. Des rois d'armes, des heraulx, poursuyvans, trompettes, clarons et menestriers de divers instrumens, qui devant eulx alloient, je delaisse, pour abreger. Et quant ilz furent tous deux en point, le roy crdonna les faire yssir; alors chascun des deux seigneurs ducz leurs baïillerent leurs lances à poulcez ; et au prendre par Saintré, il baïisa sa banerolle, en faisant le signe de la croix. Lors à tres grant pas desmarcha tout le premier, et vint trouver le seigneur de Loysselench, assez pres de son partir. Et au premier coup qu'il fist, à haulte voix s’escria : À notre Dame, et à ma tres doulce dame ! A cest assembler qu'il fist, le seigneur de Loysselench ne cuydoiïit pas moins que bientost ie porter par terre ou le fouller ; et croy que par sa force, trop plus puissante que celle de Saintré, il luy fust bien advenu: mais à qui Dieu veult aidier, nulz ne luy peut nuyre, Lors le seigneur de Loysselench, de toute sa force, actaint Saintré sur le hauit cousté du faulx du corps, et, sans attacher, sa lance clinssa une toise outre; et Saintré de ce premier coup aussi clinssa sa lance. El, au clinssant qu'elle fist, le vinct actaindre entre la lance et la main droicte que par le meilleu, à tout le gantel et trois bons dois, la lui faulsa. Et quant ilz cuyderent le deuxiesme coup repousser, le seigneur de Loysselench sa main droicte ne peut à soy retraire, ne aussi Saintré sa lance, qui tant prinse estoit. Lors le seigneur de Loysselench habandonna sa lance pour soy joindre à Saintré, mais ne povoit ; car Saintré, voyant sa lance atachée, boutoit tant qu'il povoit avant ; et quant le roy apperceut la lance de Loysselench à terre, lors dist que de ses armes n'y avoit plus, et que Dieu estoit pour cest enffant. Lors les fist prendre tous deux, et en leurs pavillons aller pour leurs chiefs desarmer, et appareiller Loysselench, et puis devant luy venir, Ne vous poroye à demy dire le tres grant dueil que le seigneur de Loysselench fist tant de sa male fortune, comme de ce qu'ung si jeune homme l'avoit à cheval et a pié foullé; dont tout ainsi, la main persée, que ne se povoit, de chault ne de courroux, le sang estancher, Vouloit parfaire ses aultres armes ; mais tant estoit de sang issu, que force luy fust de s'en desister, Et quand il fut mediciné, sa main lyée et son bras desarmé, à l'issue de sa tente Saintré le vint reconforter, et le seigneur de Loysselench doulcement l’acolla, et puis en son poullain luy dist : Mon frère Saintré, se vous conti-
nuez es armes ainsi qu'avez commencé, il ne sera ceiluy qui resister puisse à vous. Lors Saintré, estant informé de ce qu'il avoit dit, en soubzriant luy respondit : Ha ! monseigneur mon frère, tout ce que vous dictes est du bien de vous, et se en aucune maniere je m'y employe, ce n’est que de porter la piece d'armes, c'est le baston ; car ma tres redoubtée dame faict le surplus. Et à ces parolles, messeigneurs les ducz les menerent devant le roy. Et cy laisseray ung peu à parler comment les pris furent donnés, et diray de la grant joye que la royne, ma dame et les aultres dames et damoyselles en font toutes, et comment ma dame se mist en contemplacion.
La royne et ma dame, avecques les aultres dames et damoyselles, ne cessoient de rire et de faire joye pour l'amour de Saintré, qui avoit du meilleur, Et quant ma dame, qui l'ueil dessus Saintré ne bougeoit, s'apensa que vrayement, actendu l’evidente grace que nostre Seigneur luy avoit fait à la requeste de nostre Dame, qu'elle les en remerciroit ; et lors fist semblant d’avoir mal en sa teste, puis dist à la royne : Ma dame, il me soit pardonné, car il me faut ung peu coucher. Belle Cousine, dict la royne, faites tout à vostre plaisir. Et quant ma dame fut couchiée, en la chambre du hourt elle renvoya toutes ses femmes. Lors se leva, à genoulx se mist, les mains joinctes, les yeux levés au ciel, devotement rend à Dieu et à nostre Dame mercy de la grace qu'à Saintré avoient faicte, et à ce fut longuement. Et quant sa devocion fut faicte, ainsi que toute guerie, à la royne vint joyeusement. Saintré qui, de fois à aultre et souvent les dames regardoit, et ne veoit point ma dame, pensa que ce fust ainsi que l'aultre fois. Mais quant il apperceust ma dame revenue, son cueur en fut cent mille fois plus joyeulx. Et cy laisseray à parler de ces choses, et diray comment les pris furent donnés.
9 4 HG
