CHAPITRE CCXXXII
Comment li rois d'Engleterre fist chercier et ensepvelir les mors , et comment il asista, vesti de noir, à leur obsèque.
Le dimence au matin, ensi que li rois d'Engleterre issoit de messe , retournèrent li chevauceour et les archiers , liquel avoient parfurni la desconfiture. Si recordèrent au roi , les capitainnes messires Richars de Stanfort et messires Renauls de Gobeliem, tout ce que il avoient veu et trouvé, et dissent ensi en oultre que nuls apparans n'estoit de nulle requelloite. Adonc eut consel li rois que il envoieroit cercier les mors à sçavoir quel signeur estoient là demoret, et en furent ordonné de l'aler (et fu dit de la bouce dou roi), messires Thomas de Hollandes, messires Renauls de Gobehem, li sires de Persi, messires Guis de Briane et messires Oulfars de Ghistelle, et lor furent délivret tout li hiraut de l'oost et quatre clers pour écrire les noms des nobles. Si se départirent li desus nommé et plus de quatre cens hommes en lor compagnie pour aidier à tourner et à retourner les mors. Quant il furent venu sus la campagne où la bataille a voit esté, li hiraut dou roi d'Engleterre trouvèrent biaucop des hiraus les signeurs de France, qui là estoient venu pour cerchier lors mestres et lors signeurs mors. De quoi li signeur d'Engleterre furent moult resjoï et lor fissent bonne chière ; et cercièrent chil hiraut englois et françois tous les camps, et trouvèrent les signeurs mors en pluisseurs places , et estoient recongneu le plus par lors armoieries, et tantos que il estoient avisé et recongneu, les clers dou roi les mettoient en escript. Si furent trouvet onse chiefs de hauls signeurs, quatre-vins-et-trois
banières et douse cens et douse chevaliers d'un esqut, sans le menu peuple , dont il i eut plus de trente mille. Sus l'heure de vespres retournèrent deviers le roi d'Engleterre li baron qui envoyet avoient esté cerchier les mors, et amenèrent avoecques euls les hiraus françois pour mieuls certefyer la besongne , et estoient cincq. Je les vous nommerai : premièrement Valois, Alençon, Harcourt, Dampierre et Biaugeu. Li rois d'Engleterre les vei volontiers , et aussi fissent tout li signeur , et là furent nommé tout li signeur qui mort estoient : le roi de Boesme premièrement , le conte d' Alençon , le conte de Blois , le conte de Flandres , le duch de Lorrainne , le conte d'Auçoirre, le conte de Harcourt, le conte de Saint-Pol, le conte d'Aumale, l'arcevesque de Roen' et le grant priours de France. Des barons et des chevaliers, la décriance seroit trop grande à nommer, mais dalés le conte de Namur, qui fu à la besongne et s'en parti, quant il vei l'heure, morut messires Phelippes de Jupeleu. De la relation faite par les barons et chevaliers desus nommés et les hiraus avoecques euls appelles, furent moult esmervilliet li rois d'Engleterre et li signeur de son costé, et plaindirent par espécial moult grandement la mort dou bon roi de Boesme et tinrent son fait à grant vaillance, et s'en vestirent li rois et ses fils, li princes de Galles, de noir pour l'amour de li, et aussi pour les aultres qui li estoient de linage, et messires Godefrois de Harcourt , pour la mort de son frère et de son neveu le conte d'Aumale.
Che soir donna à souper li rois en son logeis tous les barons et chevaliers d'Engleterre qui là estoient, et qui aler i vorrent, et menèrent grant joie et grand reviel toute
' L'archevêque de Rouen est cité ici par erreur parmi les victimes du désastre de Crécy.
la nuit, et fissent bon gait et gardèrent les mors; et à lendemain on se ordonna au départir de là et de traire plus avant viers Monstruel-sus-la-Mer ; mais avant le département dou roi, il fu ordonné et prononchiet par les hiraus françois, que li rois donnoit trieuves quatre jours à tous ceuls qui vodroient travillier à aidier ensepvelir les mors, et furent les corps des hauls signeurs présentement levés et portés en une abbéie séans assés priés de là, que on nomme Montenai ' , et furent là à un obsèque que on fist pour les signeurs, li rois d'Engleterre présens et ses fils, et vesti de noir, et la grignour partie des barons d'Engleterre qui en la compagnie dou roi estoient. Et devés sçavoir que li hiraut françois furent très-larguement bien payet tant dou roi, de son fil et des barons d'Engleterre , et emportèrent avoecques euls , sans les jeuiauls , en deniers apparilliés , plus de deus mille livres.
Nous laisserons un petit à parler dou roi d'Engleterre et des Englois, et parlerons dou roi de France.
