CHROMO! ES
court parmi, moult large. Se ne le porent pas li signeur de France toute environner, car trop i faudroit de peuple qui vodroit ce faire , et se chil de dedens se fuissent tenu tousjours enclos en lor ville sans point issir, et entendre as escarmuces tant seullement et à deffendre lors barrières, il ne lor convenoit aultre cose, et euissent là tenu les signeurs de France tout le temps. Car il avoient la rivière pour euls, laquelle on ne le lor pooit oster , et si estaient bien pourveu de toutes coses que il lor besongnoit, mais orgoels et outrequidance les déchut, ensi que je vous dirai. Messires Hervis de Lion , qui fu assés chevalereus et estoit tous li consauls dou conte, chevauça une matinée et issi hors de Nantes à tout deus cens armeures de fier, car dou soir il avoient en lor ville requelliet une espie qui lor avoit dit que quinse sommiers cargiés de pourvéances venoient en l'oost et lor avoit ensengniet le cemin que il tenoient et n'estoient conduit que de euls soissante lances, pour quoi messires Hervis de Lion, pour porter à ceuls de l'oost contraire et damage, esmut les compagnons saudoyers et auquns joues hommes bourgeois de Nantes, et sallirent hors à une ajournée par la posterne de Eicebourc et se missent sus les camps, et cevauchièrent à la couverte, ensi que li variés les avoit ensengniet, et trouvèrent sus un vies chemin et encontrèrent ce charoi et ces sommiers et ceuls qui les conduisoient, qui estoient tout pesant et sommelleus , car il avoient la nuit moult petit dormit. Chil deus cens de la route et compagnie messire Hervis de Lion furent tantos au-desus de ce charoi et de ces sommiers et de ceuls qui les conduisoient, et en i ot que mors que bléciés plus de la moitié, et li demorrans fui en voies deviers l'ost en faisant grant noise. Encores estoient chil dou guait de la nuit sus les camps: si s'adrechièrent celle part
où la noise estoit et li débas, et aussi li hoes se commença fort à estournir.
Quant messires Hervis de Lion et ses gens veirent venir l'effort, si retraïssent fort viers la chité et deviers la porte, et cachièrent lor proie dedens, et fuissent bien rentré dedens et à petit de damage se il vosissent, mais orgoels et outrequidance les amonesta de demorer et faire armes, et tant se mouteplyèrent li hustin que chil de l'oost les sourmontèrent, et en abatirent et mehagnièrent biaucop et prissent au voloir rentrer en la ville, et fu la porte sus le point d'estre gaegnée des François, et convint priés estre armé tous ceuls de la ville pour euls bouter hors, et là fu très-bons chevaliers messires Hervis de Lion, et moult i nst de grandes et de belles apertises d'armes. Toutes fois par bien combatre et par l'effort qui i sourvint de la chité, li François furent requlé et la porte reclose et li pons levés et la grignour partie de la proie conquise , mes trop lor cousta et par espécial des bourgeois de la ville, car il en i ot grant fuisson de mors et de pris et de bléciés, dont li père et li frère et li linages de ceuls en furent durement courouchiet, et disoient li auqun en derrière que ce avoit esté une issue sans raison et hors de ordenance, car il n'avoient en Nantes aultre cose à faire que de garder lor ville.
Li contes de Montfort , qui estoit en son hostel , ne sçavoit au matin, quant il fu levés, encores riens de ceste avenue , et quant il en fu enfcurmés et il oï les complaintes de ses hommes et des bourgeois de la ville, comment il avoient perdu lors fils, lors frères et lors amis et par celle escarmuce, laquelle à la vois de ceuls de Nantes avoit esté faite sans raisons, si en fu durement courouchiés, et quant messires Hervis de Lion vint en sa présence, il l'en blâma
36 CHROMQBES
et reprist aigrement de crueuses paroles, et tant que niessires Hervis se mérancolia et prist les paroles en grant vergongne et desplaisance, et pour ce que li contes li dist si généraulment devant tous ceuls qui le porent oïr, et se retraïstli dis messire Hervis de Lion en son hostel en la ville, et laissa le conte ens son chastiel, sans plus aler viers lui.
