CHAPITRE CCXLI

Comment les Escoçois vinrent devant le Noef-Chastiel-sur-Thin, et comment la roine d'Engleterre ordonna son hoost pour les combatre.

Entrues que la roine d'Engleterre avoit fait son asamblée et faisoit encores en la marce et la frontière d'Iorch, li rois David d'Escoce et les Escoçois, à trois mille armeures de fier, chevaliers et esquiers, et bien trente mille d'aultres gens, tout homme de guerre et en pourpos de courir toute Engleterre (car il le sentoient desnuée de gens d'armes et d'archiers), entrèrent au lés deviers Rosebourch, en la terre li signeur de Persi, et vinrent un jour à Anvuich et ardirent la ville, mais au chastiel, il ne peurent riens fourfaire, et passèrent oultre pour passer à gué la rivière de Thin pour venir devant Durâmes et Iorch et entrer en la plainne Engleterre. Sur celle entente le faisoient-il et ne quidoient pas que nuls lor deuist aler au-devant, ne résister lor cemin, tant estoient-il orguilleus; mais si fissent, car si trètos que les nouvelles vinrent à la roine d'Engleterre, qui se tenoit à Iorch et qui là avoit asamblé ce que elle pooit avoir de gens, [et que elle] sceut que li rois d'Escoce et les Escoçois estoient entré en Norhombrelande et ardoient et essilloient le païs, pour mieuls monstrer que la besongne estoit sienne, elle se départi, à ce que elle avoit de gens, le conte de Honstidonne que elle avoit fait connestable de toute son hoost et le signeur de Moutbrai, marescal, en sa compagnie; et là estoient. li