CHAPITRE CCLIV

Comment li compagnon de Tournai conquissent une haute tour que gardoient les archiers englois.

Entre le mont de Sangates et la mer, à l'aultre lés deviers Calais, avoit une haute tour que trente-deus archiers gardoient, et tenoient là endroit le passage des dunes pour les François1, et l'avoient li dit englois archier, à lor avis, grandement fortefyet de grans doubles fossés. Quant li François furent logiet sus le mont de Sangates, ensi que

' C'est-à-dire : pour empêcher les Français de passer.

vous avés oï conter, chil de Tournai, liquel estoient venu .servir le roi de France (et pooient estre environ quinse cens), perchurent celle tour. Si se traïssent de celle part, et l'environnèrent et la commenchièrent à asallir, et les Englois qui dedens estoient à euls deffendre et commenchièrent à traire à euls de grant randon et à blécier et navrer les auquns. Quant li compagnon de Tournai veirent ce, si furent tant couroucliiet et se missent de grant volenté à asallir celle tour et ces Englois, et passèrent de forche oultre les fossés et vinrent jusques à la mote de terre et au piet de la tour as pils et as hauiauls. Là ot grant assaut et dur et moult de chiaus de Tournai bléciés, mais pour ce ne se refraindirent-il pas à asallir, et fissent tant que de force et par grant apertise de corps, il conquissent celle tour, et furent mort tout chil qui dedens estoient, et la tour abatue et reversée, de quoi li François tinrent ce fait à grant proèche, et en furent grandement recommendé.