CHAPITRE CCLVI
Comment doi cardinal furent envoyés par le pape pour traiter de la paix et comment les François se deslogièrent.
Entrues que li rois de France estoit sus le mont de Sangates et que il estudioit comment et par quel tour il poroit combatre les Englois qui fortefyet estoient, ensi que ichi desus vous avés oï recorder , vinrent doi cardinal en son hoost, le cardinal d'Espagne, uns moult vaillans et sages homs, et li cardinauls d'Ostie1 , envoyés là en légation de par le pape Clément, qui resgnoit pour ce temps. Cil doi cardinal, ensi que il estoient cargiet, se missent tantos en grant painne d'aler de l'une hoost en l'aultre et volentiers euissent veu par lors promotions que li rois d'Engleterre euist brisiet son siège, laquelle cose il n'euist jamais fait. Toutes fois il parlementèrent tant et alèrent de l'un à l'aultre que sus certains articles et trettiés d'acord et de paix il procurèrent que uns respis fu pris entre ces deus rois et lors gens là estans au siège et sus les champs, à durer tant seullement trois jours, et furent ordonné [par] euls, huit nobles signeurs, quatre de par le roi de France, et quatre de par le roi d'Engleterre : de par le roi de France, li dus Oedes de Bourgogne , li dus Pierres de Bourbon, messires Jehans de Hainnau et messires Lois de Savoie, et dou costé les Englois, li contes Derbi, li contes de Norhantonne, messires Eenauls de Gobehem, et messires Gantiers de Mauni. Et li doi cardinal estoient traitieur et moyen et alant de l'un à l'aultre. Si furent chil signeur,
1 Etienne Aubert, évêque de Clermont et d'Ostie, créé cardinal en 1342 et depuis pape sous le nom d'Innocent VI.
les trois jours durant la grignour partie dou jour en conclave ensamble et missent pluisseurs devises et pareçons avant, desquelles nulles ne vinrent à effet. Entrues que on parlementoit , et le respit durant, li rois d'Engleterre faisoit toudis efforcier son hoost et faire grans fossés sus les dunes, par quoi li François ne les peuissent sousprendre, et sachiés que chils parlemens et détiïemens anoioit durement à ceuls de Calais qui volentiers euissent veu plustos lor délivrance, car on les faisoit trop jùner. Chil troi jour se passèrent sans paix et sans aeord, car li rois d'Engleterre tenoit tout dis son opinion et metoit en termes que point ne se délairoit que il ne fust sires de Calais, et li rois de France voloit que elle li demorast. En cel estri ' se départirent les parties, ne li cardinal ne les peurent puis rasambler, liquel, quant il veirent ce que on ne voloit entendre à euls, il se départirent et retournèrent à Saint-Omer.
Quant li rois Phelippes vei ce que perdre li convenoit Calais, il fu durement couroucliiés, et tout considéré, ils, ne ses gens ni savoient comment aidier, ne adrechier, car de aler de fait sus l'oost le roi d'Engleterre, c'estoit cose imposible pour les grans marescages qui sont tout autour de Calais et la mer qui estoit fort gardée. Avisé fu et proposé en l'oost de France que il retourneroient à Saint-Omer et venroient dou costé de Berghes et de Bourbourch, mais quant il regardoient le passage de Gravelines et les destrois, et mauvais et périlleus passages que il aueroient à passer, et comment bien soissante mille Flamens gisoient de ce lés devant Calais, il rompoient et amolioient lors imaginations et disoient : « Toutes nostres pensées sont vainnes.
1 Estri, discussion.
« Il nous fault perdre Calais. Mieuls nous vault une ville « à perdre que de mètre en péril euls cent mille. Se nous « le perdons celle fois, une aultre fois le porons-nous bien « recouvrer. Il n'est aventure qui n'aviengne. On en a « petitement songniet dou temps passé, car on le deuist « avoir pourveue pour tenir dis ans ou vint, selonch la « force dont elle est et la belle garde, ou on le deuist avoir « abatue et mise tout par terre; car avant que on le puist « ravoir, elle fera moult de mauls au roiaulme de France. » Ensi se devisoient et parloient li François, quant il veirenf que li trettié furent falli , et li cardinal retournet à Saint- Omer. Un jour, il fu ordonné au départir et au deslogier de là et de retraire, casqun là où mieuls li plaisoit. Si se deslogièrent un matin , et montèrent li signeur sus lors cevaus et variés demorèrent encores derrière, qui entendirent au requellier tentes et trefs et à trouser et à mettre à charoi et à voiture. Là i ot des vitalliers de l'oost pluisseurs qui perdirent chevaus et pourvéances, car Englois sallirent hors de l'ost pour gaegnier. Si prissent des prisonniers et conquissent des chevaus et des sommiers, des vins et des pourvéances, et tout ramenèrent en l'ost devant Calais, et li signeur de France et li François retournèrent en lors lieus.
