CHAPITRE CCLXVI
Comment li rois d'Engleterre se combati à messire Ustasse de Ribeumont, et comment les François furent desconfis.
Bien monstra là li gentis rois Édouwars que il avoit grant désir de combatre et amour as armes, quant il s'estoit mis en cel parti et tant humelyés que desous le pennon messire Gautier de Mauni, son chevalier, et s'en vint li rois combatre main à main à messire Ustasse de Ribeumont et escremirent de lors espées et jettèrent pluisseurs cops l'un sus l'aultre, une longue espasce; car tout doi en savoient bien jeuer et escremir et mieuls assés li rois d'Engleterre et de plus soutieus tours ne fesist li dit messire Ustasse ; car il l'avoit apris d'enfanche. Messires Ustasses ne savoit à qui il se combatoit ; mais li rois le sçavoit bien, car il le recongnissoit par ses armes, et li rois estoit armés simplement ensi que uns aultres chevaliers, et toutes fois il estoit gardés d'auquns chevaliers et esquiers qui là estoient ordonné pour son corps à la fin
que il ne fust trop avant sourquis. Tant issirent de gens que lors gens se combatoient, il se missent grant fuisson au retour, et chil qui voloient aler avant, ne pooient, car il estoient sus un cemin destroit que il ne pooient dou plus aler ou cevauchier que euls quatre de front. Se les convenoit requler avoecques les esbahis et les fuians, vosissent ou non ; et auquns vaillans hommes, quant il se trouvèrent au large sus les camps (et bien savoient que messires Joffrois de Charni, messires Ustasses de Ribaumont, et messires Jehans de Landas estoient devant), d'armes de Calais que li François qui là estoient sus le sabelon et requlé en la place où l'année devant li rois d'Engleterre avoit mis son siège, ne porent souffrir celle painne et en i ot grant fuisson de mors et de pris, et par espécial li troi chevalier là demorèrent; et prist li rois d'Engleterre messire Ustasse de Ribeumont et se rendi à lui et le fiança, de quoi li dis chevaliers fu moult resjoïs depuis, quant il sceut que li rois d'Engleterre l'avoit combatu et pris à prisonnier. Là furent pris messires Joffrois de Charni et messires Jehans de Landas , et trop petit se sauvèrent de ces premiers.
Adonc montèrent pluisseurs Englois as chevaus que il avoient tous apparilliés, et passèrent délivrement la rivière les auquns à gué (car elle estoit basse), et les aultres au pont, et se missent en cace et sus les camps apriès les François, et là trouvèrent-il les bons chevaliers entre Hames et Calais, tels que messire Henri dou Bois, messire Pépin de Were, le signeur de Créqui, le signeur de Reli, le signeur de Brimeu , le signeur de Fransures et pluissieurs aultres qui monstrèrent visage et deffense moult vaillamment, et descendirent les auquns à piet pour mieuls combatre; car pour ce jour et pour ce que il faisoit
grant relin1, les terres estoient si molles que ceval ne s'en pooient ravoir, et fu là uns pousseis et uns ostequeis moult grans et bien soustenus et vaillamment des François, mais finablement il les convint perdre; car lors hommes se esclarcissoient toudis et les Englois mouteplioient. Là furent mort, dont ce fu damages, messires Pépins de Were et messires Henri dou Bois, et pris, li sires de Créqui et li sires de Reli ; et se sauvèrent par estre bien montés messires Moriauls de Fiennes, li sires de Cresèques, li sires de Santi, li viscontes des Quènes, li chastelains de Biauvais et li sires de Fransures et moult d'aultres, et s'en alèrent bouter ens es forterèces proçainnes, et les Englois retournèrent et n alèrent plus avant.
Ceste besongne avint droitement le nuit de l'an mille CCC XL VIII et en fu grant nouvelle en France et en Engleterre pour tant que li rois d'Engleterre i a voit esté.
