CHAPITRE CCLXXIII

Comment li jones princes de Galles et li dus de Lancastre se combatoient vaillamment à vassiaus espagnols.

Ceste bataille sus mer des Espagnols et des Englois fu moult dure ; car ces deus nations sont toutes gens marins et qui bien sèvent comment on s'i doit et poet maintenir ; mais elle commença trop tart, car seli aventure euist donné que dou matin avoecques la marée il se fuissent trouvé , avant que il euist esté tart, il euissent fait plus grant conquest l'un

sus l'aultre, que il ne fesissent. Li jones princes de Galles et chil de sa carge se combatoient bien en sus et avoient lors nefs acroquiés à vassiaus espagnols où moult avoit de fors hommes et de durs et qui grant fuisson faisoient d'apertisses, et fu la nef dou prince tellement fourmenée de grans barriaus de fier aguissiés que li Espagnol lançoient contre les assielles que elle fu pertuissée en trois ou en quatre lieus et rendoit grande aiguë, et ne l'en pooient garder chil qui i entendoient, dont il estoient tout esbahi, car la nef apesandisoit fort. Li dus de Lancastre, assés priés de là, se combatoit à Espagnols et oy cryer en englois : « Rescouse, rescouse au prince de Galles ! » Si dist à ses chevaliers : « Alons deviers mon cousin le prince ; je « voi bien que il a à faire. » Donc chil qui tenoient le gouvernai de sa nef le fissent tourner à force et li aultre estendirent lor single contre-mont, et tout combatant, vosissent ou non li Espagnol, il vinrent jusques à la nef dou prinche que li Espagnol tenoient à dangier, et quant li dus fu venus, li prinches salli en sa nef, et aussi fissent tout si chevalier et là se combatirent et moult longuement à ces deus nefs espagnoles, desquelles li unefu conquise par bien combatre et tout chil mis à bort qui dedens estoient, et li aultre se sauva et s'en ala à plain voille sans damage.