CHAPITRE CXLIII
Comment pluisseurs chevaliers et esquiers furent retenus de messire Amauri de Cliçon pour estre saudoyer à la contesse de Montfort.
Quant ce vint au jour que li rois deubt estre à Londres, il i fu et jà avoit-il escript et mandé son consel (celi que il voloit avoir), et tout furent à Wesmoustier, et là vint messires Amauris de Cliçon. Si fu appelles en la cambre dou consel, et là en la présence dou roi et dou consel, il remonstra ce pour quoi il estoit venus et prioit que il fust briefment respondus, et la contesse de Montfort, sa dame, secourue. On fist issir le chevalier de la cambre, tant que li consauls dou roi euist parlé ensamble.
Làot en ce consel pluisseurs coses et paroles retournées, car li rois d'Engleterre ne voloit nullement enfraindre, ne brisier les trieuves qui données estoient, jurées et séelées à tenir deus ans entre li et Pbelippe de Valois, et ossi il convenoit que la contesse de Montfort fust aidiée et confortée dou roi et des Englois puisque on avoit la ducée de Bretagne relevé de li, et que on le tenoit et voloit tenir en foi et en hommage de la couronne d'Engleterre. Or fu avisé que on feroit une cose raisonnable, sans ce que li rois s'en ensonniast en riens, puisque la contesse de Montfort mandoit secours, on lui envoieroit pour ses deniers, tant comme elle en vodroit avoir et poroit prier, ce point ne li pooit-on oster, et quant les trieuves seroient fallies entre France et Engleterre, li rois aueroit aultre consel. Donc fu apellés messires Amauris de Cliçon et li fu dit comment pour celle fois il convenoit que il ouvrast. Quant
il vei ce, il considéra raison et se délivra dou plus tos que il pot et quist gens d'armes et archiers, et li signeur d'Engleterre li aministrèrent lesquels il prenderoit pour bien faire sa besongne.
Tout nouvellement estoit retournés dou roiaulme d'Escoce messire Gautiers de Mauni, un jones chevaliers de Hainnau, qui trop vaillamment s'i estoit portés en tous les fais d'armes où on l'avoit veu et trouvé et tant que il en avoit souverainnement la grâce et la renommée. Si fu retenus de messire Amauri de Cliçon et pour estre saudoyer à la contesse de Montfort et chapitainne de tous les aultres, et ot de sa carge trois cens lances et deus mille archiers, et fu tout de fait aviset si grande la carge d'archiers pour raemplir les garnisons. Si ordonnèrent lors pourvéances et lors navies à Pleumude, et quant tout fu prest et chil venu qui dévoient passer oultre en Bretagne, il entrèrent en lor vassiaus. Si se désancrèrent dou port de Pleumude et entrèrent en mer. Avoecques messire Gautier de Mauni qui souverains fu de ceste armée, estoient doi chevalier frère, Lois et Jehansde Leinendale, messires Hubiersde Frenai, le Hazle de Braibant, messires Gérart de Brandresoy, messires Alains de Sirehonde, messires Lois Clanbo, messires Edouwars de Lanton, messires Guillaumes Touchet , messires Hues de Ferrières, Guillaumes Penniel, Thomas Paule, Jehans et Guillaumes Clinqueton et pluisseur aultre, et singlèrent par mer et tournèrent viers Bretagne, mais quant il furent en mi-ceminde la mer, il orent fortune moult grande et vent si contraire que il furent sus le point de estre tout perdu , et les boutèrent chils vens et celle fortune en la mer d'Irlande, et furent plus de quinse jours avant que il peuissent retourner sus lor cemin et vinrent prendre terre à lor retour de
la mer d'Irlande en Tille de Breha1 (c'est des tenures de Bretagne), et là se rafresquirent quatre jours et puis rentrèrent en lors vassiaus et prissent la mer pour venir à Hainbon là où la contesse de Montfort les atendoit, à laquelle nous retournerons un petit, et parlerons dou siège de Eennes.
