CHAPITRE CXLVI
Comment la contesse de Montfort rentra dedens la ville et le chastiel de
Hainbon.
Trop fu messires Lois d'Espagne couroucliiés quant il vei que la contesse de Montfort li estoit escapée et entrée ou chastiel de Brest. Si s'en retourna tout le pas. Tant estoient lor ceval essouflé que jusques à la grosse alainne, et vinrent li François as logeis et trouvèrent que on estoit moult ensonnyet de remetre à point tentes et trefs et de faire nouviaus logeis de fuellies et de envoyer as pourvéances à Rennes et sus le plat païs , car les lors estoient moult adamagiés. Messires Lois d'Espagne , quant il fu descendus et désarmés, il se traïst devant la tente de messire Carie de Blois, et là estoient li contes de Blois, li dus de Bourbon, li contes de Pontieu, li contes d'Eu, connestables de France , et li sires de Chastillon , et ne se pooient taire à parler de ceste contesse de Montfort , de la hardie et outrageuse emprise que elle avoit fait, et quant messires Lois d'Espagne fu venus, encores li demandèrent-il de la cace et comment elle li estoit escapée. Il respondi bien : « Elle s'est sauvée , et ses gens aussi, et bouté dedens le « chastiel de Brest. » — « Or bien, respondirent-il, puisce que elle est là, elle s'i tenra, et de tant est la garnison
« de Hainbon afoiblie de force et de consel , car elle en a « mené avoecques li biaucop de bonnes gens. » Ensi se apaisièrent-il en l'oost et passèrent la nuit et avoient esté le jour lassé et travilliet tant pour le assaut qui fu grans que de la cace que il avoient fait apriès la contesse que de ce que il avoient esté trop destourbé des logeis auquns que on lor a voit ars, et ne se doubtoient de nului, car il sentoient la contesse à Brest, siques sus la fiance de ce il dormirent la nuit et la matinée plus longuement.
Se la contesse de Montfort avoit fait, ce jour qu'elle issi hors de Hainbon, une hardie emprise, et que elle vint en Brest, encores fist-elle parellement une aultre moult aventureuse, et li signeur de France ne furent pas bien consillié quant il sentoient que elle estoit hors et il ne missent enbusqnes sur li, dont depuis il s'en repentirent. Je vous dirai cause pourquoi. Quant la contesse fu venue en Brest, elle et ses gens mengièrent et burent moult légièrement, et dormirent environ trois heures , et quant il se furent rafresqui euls et lors chevaus, la contesse les fist resvillier et apparillier et armer et prist encores jusques à cent compagnons de ceuls de Brest et fist là laissier tous les foibles cevaus et renouveller d'aultres et partirent de Brest, la contesse tout devant, sus le point de mienuit, et chevauchièrent les bons galos le cemin de Hainbon, et disoit ensi la contesse en cevauchant : « Ma bonne gent de Hainbon, « je le sçai bien, a grant malaise de moi. Il fault que je les « reconforte et que nous rentrons en la ville, et je vous « aprenderai comment, quant nous deverons aprochier la a ville et l'oost, li une part des nostres iroit estourmir et « resvillier l'oost, et li aultre s'adrècera droit à Hainbon et « fera ouvrir les bailles, avaler le pont et ouvrir la porte, « et sitos que li hoos se commencera à estourmir, il se
« retrairont tout bellement et nous les atenderons devant « les barrières, et ensi petit à petit il rentreront et nous « aussi dedens Hainbon. » Ensi que la contesse de Montfort ordonna, il fu fait. Quant il orent cevauchiet depuis que il se furent départi de Brest , il vinrent droit sus le point don jour assés priés de l'oost et de Hainbon. Il ordonnèrent messire Guillaume de Quadudal et messire Ivon de Tigri à deus cens hommes aler escarmuchier et resvillier l'oost, et la contesse et li demorant venroient, entrues que on ensonneroit les François, as bailles et les feroient ouvrir. Lors s'en vinrent li doi chevalier et lor route sus l'oost , et entrues la contesse et li aultre prissent un vies chemin herbu qui s'adreçoit droit sus les fossés , ces deus coses furent faites toutes à une fois, li hoos resvillié à l'un des corons ', et entrues que li estourmie se commença à eslever, chil- dedens orent congnissance que lor dame estoit à la porte, car celle nuit tout chil de Hainbon velloient et estoient trop esbahy et desconforté de lor dame la contesse. Quant il entendirent que elle estoit si priés de euls, si furent resjoï grandement et avalèrent le pont et ouvrirent la porte et puis les barrières. Tout descendirent et missent lors chevaus dedens la ville, et puis s'ordonnèrent en atendant lors gens qui revenoient et qui avoient estourmi l'oost, et ne furent adonc poursievi et rentrèrent tout dedens la ville et le chastiel de Hainbon. Quant ce vint au matin , li François orent bien congnissance que la contesse de Montfort estoit retournée. Si tinrent son fait et son emprise à très-grant vaillance, et dissent li signeur entre euls que li diables portoient celle contesse.
1 Coron, extrémité.
