CHAPITRE CLI
Comment li bourgeois de Dignant tretyèrent à euls rendre, et comment messire Loïs d'Espagne conquist la ville de Garlande.
Or, voel-je parler de messire Loïs d'Espagne qui fist logier son hoost tout autour de la ville de Dignant en Bretagne, et fist tantos pourveir petis batiaus et nacelles pour assallir la ville de toutes pars par terre et par iaue. Quant li bourgeois de la ville veirent ce, si se doubtèrent et jà amoient-il plus assés les François et la partie messire Carie de Blois que la contesse de Montfort. Si tretyèrent deviers messire Lois d'Espagne à euls rendre, salve lors biens et lors corps. Messires Lois entendi volentiers à ces tretiés. Messires Renauls de Gliinghant, lor chapitainne, entendi que il tretoient pour euls rendre. Si en fu durement courouchiés et menaça les plus grant mestres de la ville à faire coper les testes, et les appella fauls, mauvais
DE FKOÏSSART. 09
et traittres, dont il furent moult courouchiet, et se doublèrent de lui que de fait il ne vosist essequter ensi que il le disoit. Paroles se mouteplyèrent entre messire Eenault et euls et tant que de fait et en meslée il l'ocirent, et puis mandèrent à messire Lois d'Espagne que il venist : on li ouvreroit les portes. Messires Lois fu moult resjoïs de ces nouvelles et entra dedens Dignant à grant compagnie, et à ce jour i estoient la femme et les enfants (deus filles et deus jones fils) au chastellain de Ghinghant. Auqun Breton et François li disoient que il les retenist à prisonniers, mais il n'en volt riens faire. Avant lor fist grasce et les délivra euls et le leur, et les fist mettre hors de la ville et convoyer jusques à Hainbon, dont on tint clie fait à grant courtoisie. Messires Lois d'Espagne prist la posession de Dignant de par messire Carie de Blois et i ordonna chapitainne et gens d'armes pour le defFendre et garder, et s'i tint quatre jours, et fu délivrés Gérars de Malain et tout li compagnon, lesquels messires Eenauls de Ghinghant avoit pris, ensi comme il est ichi desus dit, et fist meismes chapitainne de Dignant Gérars de Malain et messire Pierre Portebuef avoecques lui ; puis s'en ala li dis messires Lois d'Espagne à toute son hoost deviers une grosse ville séant sus la mer, que on claime Garlande', et le assiégea par terre, et n'estoit pas adonc trop fort fermée et est uns havènes de mer, uns des biens hantés de toute Bretagne, et [grosse] ville durement. Si trouvèrent li François ou havène de Garlande auquns vassiaus, ens es quels il i avoit des vins de Poito et de Saintonge et de la Rocelle, et gissoient là à l'ancre pour estre vendu, mais il furent pris et levé, et en traïst-on hors des vassiaus biaucop et furent
1 Guérande, à trois lieues de Saint-Nazaire.
cargiet sus chars et envoyet en l'oost devant Aurai, et en retinrent une partie pour euls pour lors pourvéances.
La ville de la Garlande fu assallie et conquise par force, car il n'i avoit que les hommes de la ville, et si est une ville de grant garde. Si fu violée et courue et toute robée, et i trouvèrent grant avoir et i ot cinq églises arses, dont Lois d'Espagne, qui estoit conduisières de l'oost, fu durement courouchiés, et fist pendre ceuls qui le feu i avoient toute. Là orent li François grant conquest, car la ville estoit durement riches, et pris des bons marceans pour euls rançonner.
Là ordonna messires Lois d'Espagne à retourner en l'oost le visconte de Rohan et grant fuisson des aultres, et ne retint non plus que de deus cens compagnons genevois et espagnols, et dist que il se meteroit sus la marine ensi que ses corages li porta, dont il fist une grant folie et l'en deubt estre priés malvenu, ensi que je vous recorderai assés briefment.
