CHAPITRE CLX1V

Comment messires Oliviers de Cliçon et messires Hervi de Lion revinrent devant Vennes et l'asségièrent.

Pour la prise et la perte de la chité de Vennes fu li pais de là environ tous esmeus et courouchiés. La contesse de Montfort i entra à grant joie, et furent pris auquns bourgeois de la ville et mis en prison, et corrigiet les auquns de lors vies et de lors cevances pour tant que l'aultre fois si légièrement il s'estoient rendu et tourné à messire Carie de Blois. Si se tint la contesse là, je ne sçai quans jours, et puis s'en retourna à Hainbon et laissa messire Robert d'Artois et messire Gautier de Mauni convenir de sa guerre. Messires Oliviers de Cliçon, messires Hervi de Lion, messire Guis de Lohiac et li sires de Tournemine

et chil qui sauver se porent, au département de Venue.-. s'en vinrent à Rennes et trouvèrent là messire Carie de Blois et sa femme et les signeurs. Si recordèrent les aventures qui avenues lor estoient et comment Vennes estoit perdue. En parlèrent li signeur en pluisseurs manières. Li auqun disoient que il i avoit eu trahison, et li aultre, non. Meismement chil qui en retournoient, n'en savoient point parler bien proprement, et disoient li auqun en requoi que Vennes avoit esté perdue par simplèce et povre garde et négligense de messire Olivier de Cliçon et de messire Hervi de Lion, et tant montèrent les murmurations que li doi chevalier en furent enfourmé, et leur fu dit de ceuls qui les amoient, que la vois dou païs parloit vilainnement sus lor partie, et quant il oïrent ce, si furent moult courouchié et à bonne cause et jurèrent que jamais n'entenderoient à aultre cose, si aueroient repris la chité de Vennes ou il i metteroient les vies , et se ordonnèrent à ce faire, et pryèrent tous lors amis, dont il avoient grant fuisson et tous les chapitainnes des forterèces de Bretagne, et s'estendoient les pryères et mandemens ensi que sus un jour que il i ordonnoient, il fuissent tout là où il les voloit avoir. Tout i furent, et i ot à lor pryère grant asamblée de gens d'armes, et s'en vinrent de fait et sus un jour mettre le siège devant Vennes. La contesse de Montfort s'en estoit partie un petit devant et retraité en Hainbon, mais messires Robers d'Artois et grant fuisson de bonnes gens d'armes d'Engleterre et d'archiers i estoient demoret. Si se trouvèrent les François et les Bretons, quant il furent là tout assamblé, plus de douse mille, et ne séjournèrent point longuement devant, quant il le commenchièrent à assallir.

DE FROISSART. 10o