CHAPITRE CLXV
Comment la cbité de Vennes fu reconquise, et comment messires Robers d'Artois et li sires Espensiers furent durement navrés et morurent de lors plaies.
Quant messires Robers d'Artois se vei asségiés dedens Vennes, si ne fu pas trop hesbahis de soi tenir vassaument et de deffendre la chité. Li Bretons qui devant estoient, comme tout foursenet de ce que lor sambloit que perdu l'avoient si simplement, s'aventuroient durement à l'asallir corageusement et se doubtoient que par force de gens d'armes et d'archiers, fust de nuit ou de jour, on ne venist lever le siège. Pour ce se délivroient-il de faire lor empainnes. Et par espécial il i ot un assaut si dur et si fort et si bien continuet que de force et par biau fait d'armes les bailles de l'une des portes furent conquises et copées. Adonc vinrent toutes gens d'armes si efforciement à la porte où li Englois estoient, qui ouverte l'avoient pour livrer deffenses as bailles, que de fait et de force il efforcièrent les Englois et entrèrent li asallant en Vennes, vosissent ou non li deffendant. Si estoient là présent messires Robers d'Artois et sa banière, li sires Espensiers et sa banière, mais on voelt dire que chil de la ville rendirent grant painne à ce reconquès et se tournèrent avoecques les François. Là furent navré durement li sires Espensiers et aussi fu messires Robers d'Artois et biaucop d'aultres, et là furent pris messires Richars deStanfort et messires Jelians de Lille et aussi fu messires Edouwars li Espensiers. A grant mescbief, se sauvèrent messires Robers d'Artois et
li aultre , et issirent par une posterne et vinrent à Hainbon.
De ces nouvelles et dou reconquès de la chité de Vennes furent la contesse et tout chil de sa partie courouchiés et à bonne cause, mais amender ne le porent. Li sires Espensiers, tous prisonniers à messire Hervi de Lion, des plaies que il ot, morut. Messires Robers d'Artois onques ne pot estre bien sanés de une plaie que il ot ou ehief, et li prist volenté de retourner en Engleterre, et ot un sauf-conduit de messire Carie de Blois, lui dousime de chevaliers. Si monta en mer li dis messires Robers , bien accompagniés de chevaliers et d'esquiers, dont il fist folie, car encores n'estoit-il pas bien sanés, et sus la mer, pour la marine, ses plaies s'esmurent tellement et si le ragravèrent que, li retourné en Engleterre, il ne vesqui point depuis longuement, mais morut, de laquelle mort li rois d'Engleterre fu moult courouchiés et s'en vesti de noir et ses ainnés fils li princes de Galles et li contes Derbi, et fu ensepvelis moult solempnement as Augustins en la chité de Londres, et là li fist-on son obsèque moult révéraument, et i furent li rois et la roine d'Engleterre et leurs fils li princes, et tout li prélat et li baron d'Engleterre qui pour ces jours estoient en Engleterre. Assés tos apriès fu fais aussi li obsèques dou signeur Espensier, messire Édouwart, et demorèrent de li quatre fils Édouwars, Hues, Thomas etHenris, et furent depuis li trois, chevaliers, et Henris, évesques de Nordvich ' , et fu lor mère fille au signeur de Ferrières d'Engleterre.
1 Henri Spencer devint évêque de Norwich en 1369. Il fut en 1383 le chef d'une croisade urbaniste en Flandre, qui échoua devant les murailles d'Ypres.
