CHAPITRE CLXXVI

Comment li contes Derbi prit et destruisit pluisseurs villes et chastiaus de Gascongne.

Quant li contes Derbi ot pris la saisine et possession de Bergerac et l'ommage et féauté des hommes de la ville, et il i ot renouvelle officyers et mis capitainne de par le roi d'Engleterre (car il avoit poissance et commission de ce faire) , il se départi de là en grant arroi et bonne ordenance. Tous li païs commença à trembler pour la venue des Englois, car il ne savoient là pour ces jours que c'estoit de guerre, ne de trop lonch temps, point n'en avoient eu. Si en estoient les villes et les chastiaus plus légier à conquérir. Quant il furent issi de Bergerac, il vinrent devant un chastiel et une ville que on apelle Langon. La bataille des marescaus qui faisoientl'avant-garde, laquelle messires Gautiers de Mauni et messires Franques de Halle gouvernoient , cevauchièrent tout devant et s'arestèrent là et se missent en ordenance pour asallir. Quant chil de Langon veirent que il aueroient l'asaut , si se doubtèrent de tout perdre, et se rendirent salve le lor et lors vies. Ensi fu Langon englesce, et s'i rafresquirent li contes Derbi et ses gens , et puis cevauchièrent oultre , et ensi que il cevauçoient et venoient devant une ville que on appelle le Lac, il encontrèrent les hommes de laditte ville qui se venoient rendre. Si furent recheu , et puis vinrent les Englois devant le chastiel de Maudurant, et fu pris d'asaut et tous désemparés , et le laissièrent derrière en cel estât et puis vinrent devant Lamontgis. Il se rendirent et ne se vodrent