CHAPITRE CXCII
Comment li rois de France institua le duch de Normendie, son fil, souverain de ses gens d'armes contre les Englois qui se tenoient en Gascongne ; et comment les François mirent le siège devant Angoulême.
Bien estoit enfourmés li rois Phelippes de France des cevauchies et conques que li contes Derbi , ses cousins , avoit fait ou desus dit pais de Gascongne, et des prises et rendages de chités, villes et chastiaus, et le pais durement foulé et apovri , et fu consilliés à ce que on i pourveroit. Si fist faire un très-grant mandement de gens d'armes à cstre, les Normans, les François et les Piquars en la chité d'Orly ens et là faire lor monstre à un jour qui nommés i fu, et les Lorrains, Barrois et Bourguignons à Lions-sus-
le-Rosne, et les Prouvenciaus et ceuls de la Langue d'Oc à estre à Montpellier, et institua de toutes ces gens d'armes estre souverains son fil le duc de Normendie , et mist li dis rois Phelippes en sa compagnie le duch de Bourgongne et messire Phelippe de Bourgongne , son fil , le duch de Bourbon, messire Jaquème de Bourbon, le conte d'Eu, le conte daufin d'Auvergne , le conte de Forois , le conte de Vendôme, le conte d'Auçoire , le conte de Sansoirre, le signeur de Chastillon et grant fuisson de barons et de chevaliers de tous païs. Et quant ces gens se furent tous remis ensamble , il se trouvèrent sys mille hommes d'armes et quarante mille d'autres hommes as lances et as pavais , lesquels on nomme pour le temps présent gros variés , et furent tout environ le Noël l'an desus dit en la chité de Toulouse, et là tint li dus de Normendie sa feste, et avant que li dus de Normendie se départesist de Toulouse, li revinrent grans gens d'armes que li connestables de France, li contes d'Eu et de Ghines , li amena. Si se départirent tantos apriès les festes dou Noël , et se traïssent tout premièrement devant le castiel de Miremont que les Englois tenoient, et estoient marescal de l'oost le duc de Normendie, li sires de Saint-Venant et li sires de Biaugeu, et vinrent tout premiers mettre le siège devant Miremont, car il gouvernoient l'avant-garde, et sorvint messires Lois d'Espagne en l'oost des marescaus, en sa compagnie cinq cens arbalestriers genevois et espagnols. Si asallirent le chastiel de Miremont ces gens d'armes et ces arbalestriers , et le prissent de force et ocirent tous ceuls qui dedens estoient, horsmis le capitainne et cinq ou sys gentilshommes qu'il retinrent pour prisonniers, et puis passèrent oultre et laissièrent le chastiel tout vague et se traïssent devant la chité d'Angoulême et là missent le siège, et là vinrent li dus de
Normendie et tout li signeur de France qui en la compagnie estoient, et l'environnèrent de toutes pars.
