CHAPITRE CXCV
Comment, pendant une trieuve, les Englois se départirent de la chité d" Angoulême.
Ensi se tint li sièges des signeurs de France, un grant temps, devant la chité d' Angoulême et cevauçoient ou païs que li Englois avoient conquis les saisons devant, et le mettoient en grant tribulation. Quant le chapitainne d'Angoulême, qui se nommoit Jehans de Nordvich, vei et considéra que li dus de Normendie n'avoit nulle volenté de li deslogier, et sentoit que les pourvéances de là dedens afloiblissoient et que li contes Derbi ne faisoit nul apparant de lever le siège, et si veoit, d'aultre part, que chil de la ville s'enclinoient trop fort à estre françois et
plaindoient lors biens que il avoient sus le plat païs que il veoient perdus et ou dangier des François. Si se avisa que à toutes ces coses il pourveroit : si se avisa de une o-rande soutillèce, et avint la nuit de la Purification Nostre-Dame. Il vint sus les crestiaus de la ville et fist signe de son caperon que il voloit parler et trettier de auqunes besongnes. Sitos que on vei ce signe, on envoia deviers li sçavoir que il voloit. Il dist que il parleroit volentiers au duc de Normendie, se'illi plaisoit. On li demanda qui il estoit, qui voloit parler au duch. Il respondi que il estoit Jelians de Nordvich, capitainne de Angoulême de par le conte Derbi. « Bien, respondirent chil qui là estoient, on « le dira à monsigneur. » On le dist au duch. Li dus fu consilliés de soi-meismes que il monta à cheval et vint jusques à là et fist dire à ce Jehan que il venist parler à lui as barrières. Jehans descendi des murs et vint as barrières et trouva le duch. Li dus li demanda : « Que voes-tu « dire? » — « Sire, dist-il, je vous demande, moi et les « miens, trieuves meshui et demain pour la révérense et « solempnité dou jour Nostre-Dame. » — « Et ne voes-tu « aultre cose? » dist li dus. — « Mes Dieus ! non. » — «Et « je te le acordes meshui et demain, et encores le tierch « jour apriès. » Li dus retourna; Jehans de Nordvich demora.
Quant ce vint le jour de la Purification, Jehans de Nordvich s'arma et fist armer tous ses compagnons englois qui en la garnison estoient , et monter as chevaus et puis fist ouvrir la porte. Il sallirent tout hors, et dist au département à ceuls de Angoulême : « Faites dou mieuls « que vous poés et savés, car je m'en vois sans retourner. » Quant chils de l'oost veirent venir les Englois ensi sus euls, si quidièrent de commencement que il venissent là
pour euls envaïr. Si cryèrent alarme, et s'estourmi li hoos, et s'armèrent et vinrent contre ces Englois. Jehans de Nordvich ne fu de riens effraés, mais vint contre euls et dist tout quoi : « Signeur, nous avons trieuves meshui « tout le jour, et demain aussi, de l'acort et parole vostre « signeur le duch de Normendie. » Li François auquns, qui là estoient, savoient bien que il estoit ensi. Si se astinrent et les laissièrent passer pasieuvlement. Les nouvelles vinrent au duch, comment les Englois s'en aloient. Dist li dus : « Il ne pooient plus demorer, et se il m'euissent « requis : Nous en volons aler salve nostres cars1 et le « nostre, je lor euisse bien fait celle grâce et légièrement, « car ce sont cas d'armes que on doit faire l'un à l'autre « à ceuls qui tiennent garnisons sus les frontières. » Les Englois partis et mis au cemin par la manière que je vous dis, li dus de Normendie envoia ses marescaus parler et tretyer à ceuls d'Angoulême pour sçavoir quel cose il voloient dire et faire. Les bourgeois de la chité et toute la communauté, qui a voient assés affection as François, se rendirent incontinent, et i entrèrent li seigneur ce meisme jour et i soupèrent à grant joie. Ensi orent-il Angoulême et se rafresquirent là, je ne sçai quans jours, et puis jettèrent lor visée, que il iroient devant le chastiel d'Aguillon et metteroient là le siège. Si se ordonnèrent pour che faire, et se départirent de la chité d'Angoulême en grant estât et arroi, et ceminèrent viers Aguillon et tant fissent que il i parvinrent.
1 Cars, chair, corps.
