CHAPITRE CXCVI
Comment li dus de Normendie et li signeur de France mirent le siège devant Aguillon.
Quant li signeur et li grant baron de France, qui en la compagnie dou duch de Normendie estoient, furent venu devant Aguillon, il regardèrent premièrement et considérèrent que il ne pooient parvenir à la forterèce, se il ne passoient la rivière, qui est large, longue et parfonde, et lor convenoit faire un pont pour passer. Si ordonna et commanda li dus que li pons fust fais, quoi que il coustast, et vinrent pour ce pont ouvrer grant fuisson de carpentiers et i ouvroient nuit et jour. Quant li chevalier qui dedens Aguillon estoient, veirent que chils pons estoit fais et carpentés et movés jusques à la rivière, il fissent armer et apparillier trois naves et entrèrent dedens à fuisson d'archiers et cachièrent ces ouvriers envoies et les gardes aussi, et desfissent tantos et sans délai tout ce que fait avoient et carpenté à grant painne et mis un lonch temps à faire. Quant li signeur de France veirent ce, si furent durement courouchié, et fissent apparillier aultres naves et batiaus et amener sus la rivière à rencontré de ceuls et missent dedens grant fuisson de gens d'armes et d'arbalestriers, et commandèrent li signeur, les carpentiers à ouvrer sus la fiance de lors gardes. Quant li ouvrier i orent ouvré un jour, messires Gantiers de Mauni, sus l'heure de nonne, entrèrent (ils et ses compagnons), en lors nefs, et coururent sus ces ouvriers et lors gardes, et en i ot des mors et des bléciés et convint de rechief les
ouvriers laissier œvre et retourner arrière, et fu adonc tout deffait quanque fait avoient. Ces débas et ces rihotes recommençoient casqun jour.
Quant li signeur de France veirent ce, si en orent grant vergongne et i vinrent en la parfin si estoféement et si bien gardèrent les ouvriers que li pons fu fais, biaus et fors. Si passèrent adonc li signeur et toute l'oost oultre, armé et ordonné par manière de bataille et asallirent le chastiel d'Aguillon, fortement, sans euls espargnier, et i ot ce jour maint homme blécliet, car chil qui dedens estoient, se deffendirent si vassaument que mervelles seroit à recorder, et dura chils assauls un jour entier, mais riens ni conquissent que painne et travel, cops et horions, et retournèrent au soir pour euls reposer et aisier, car il avoient bien de quoi.
