CHAPITRE CCVIII

Comment la ville de Saint-Lo fu conquise par les Englois.

Vous avés ichi desus bien oï recorder l'ordenance des Englois et comment il chevauçoient en trois batailles, li marescal à destre et à senestre en deus èles, et li rois et li princes de Galles, ses fils, en la moyenne, et vous di que li rois cevauçoit à petites journées, et aussi faisoient toutes ses batailles, et estoient logiet toudis entre tierce et midi, car il trouvoient tant à fourer et si plentiveus pais et raempli de tons biens, les plus cras buefs dou monde, vaces, pors et oilles1 et tant que il n'en savoient que faire, et estoient tout esmervilliet des biens que il trouvoient. Il prendoient desquels que il voloient, et le demorant laissoient aler, et ne brisoient point les Englois lor ordenance et ne tournèrent point adonc viers Coustanses, mais prissent le cemin de Saint-Lo-le-Constentin, une grose ville, qui pour lors estoit durement rice et pourveue de draperie, et bien i avoit neuf ou dis mille bourgeois, gens de tous mestiers, mais la grignour partie s'estofoient tout de la draperie. Quant li rois d'Engleterre fu venus assés priés, il se logea dehors et envoia ses marescaus et ses gens d'armes et archiers devant, pour escarmucier et veoir quel cose chil de la ville voloient dire et faire, tant que au deffendre lor ville. Il furent tantos conquis et desconfi et caciet en fuies, et entrèrent les Englois dedens et en fissent toutes lor volentés et orent li pluisseur pité des hommes, femmes et enfans qui ploroient et crioient à haus cris.

1 Oilles, brebis.

et les laissoient passer et widier la ville légièrement, mais il widoient les maisons des riches biens que il i trouvoient et ne faisoient compte que d'or et d'argent, et n'avoit si petit varlet en la compagnie, qui ne fust tous ensonniet d'entendre au grant proufit que il veoient.