CHAPITRE CXIX

Comment li contes de Hainnau prit et esforcia la ville de Saint-Amant.

Quant li contes de Hainnau et son oncle et lors consauls veirent que il perdoient lor painne à assallir Mortagne et que point ne faisoit à prendre, ne à conquerre, si se ordonnèrent au départir et de aler d'aultre part viers Saint- Amant. Si se départirent de là et se retraïssent tout gens d'armes et de piet viers Saint- Amant. Pour ces jours n'estoit Saint- Amant fermée que de palis, et avoient li signeur de France envoyet un chevalier à chapitainne, qui se nommoit messire Pierre de Charcasonne. Li chevaliers, quant il fu là venus , avisa et considéra la force et l'ordenance de Saint-Amant, et quant il Tôt bien avisé, il en dist son entente que Saint- Amant n'estoit pas une ville à tenir contre poissance de gens d'armes et gens de piet qui se vodroient loiaument acquiter de l'assallir : « Nequedent, dist li « chevaliers, on m'a chi envoyet, mais je i entenderai vo- « lentiers au deffendre et garder et atenderai l'aventure « telle que elle pora avenir. » Tout respondirent : « C'est « bien dit. » Sitos que li Hainnuier furent venu devant Saint- Amant, il s'i logièrent, li Valenchiennois au lés deviers euls , et li contes et sa chevalerie au costé deviers Mortagne, et i livrèrent de toutes pars grans assaus, dont il i ot grant fuisson de bléciés et de navrés de une part et d'aultre. Chil bidau saudoyer qui en Saint -Amant se tenoient, estoient moult orguilleus et ne faisoient compte des Hainnuiers et par espécial des Valenchiennois, et lor disoient en assallant par manière de reproce : « Aléa boire

« vostre goudalle, aies î Nous n avons garde de tel assaus « que vous nous faites. » Li Valenchiennois estoient moult courouchiet de tels paroles et se logièrent une nuit devant Saint-Amant. A l'endemain au matin, il livrèrent grant assaut, mais ce n'euist riens esté se li contes de Hainnau et li chevaliers hainnuier et les gens d'armes , liquel estoient d'aultre part la ville , n euissent trouvé la manière et pratique par quoi chil de Saint- Amant furent desconfit. Li gentilhomme , liquel estoient au lés deviers l'abéie , fissent aporter par lors variés gros mairiens et puis hurter contre le mur à force de bras et de gens et tant i hurtèrent et boutèrent que il perchièrent le mur et trouèrent en pluisseurs lieus et entrèrent par derrière en l'abéie, car sitos que li mur furent perchiet, on fu en l'abéie et en la ville. Quant le chapitainne messires Pierres de Charcasonne et li gentilhomme veirent ce que il estoient conquis par derrière et assalli des Valenchiennois par devant, si se requellièrent et se missent tout ensamble enmi la place devant l'abéie et monstrèrent defi^ense. Evous les Hainnuiers venus qui entré estoient en l'abéie par derrière, et trouvèrent ce chevalier desus nommé et son pennon et toutes gens bidaus et aultres qui là estoient, requelliet et mis en bonne ordenance. Là furent-ils assalli des Hainnuiers moult aigrement, qui crioient : « Hainnau ! » à plaine bouce, et chil aussi se deifendirent assés bien sans nulle faintise,tant que durer il porent. Toutes fois la bataille et li hustins mouteplia tant et la force des Hainnuiers qui tousjours croissoit, car chil qui entré estoient entrues que li premier se combatoient, alèrent ouvrir les portes de la ville. Si entrèrent eus li Valenchiennois et tout chil qui entrer i vodrent par le pont de Scarp,et li aultre parla porte de Tournai. Quant la ville fu prise et esforcié

des Hainnuiers et des Valenchiennois, nulle deffense valli riens, et par espécial on n'avoit nulle pité de ces saudoyers "bidaus, mais estoient ocis là où partout il estoient tenu et trouvé. Et furent tout chil qui requelliet s'estoient eu la place devant l'abéie, mort et pris et par espécial le capitainne messire Pierre de Charcasonne i fu mors ; dont il en desplaisi grandement au conte de Hainnau, et euist vol entiers veu que on l'euist pris sus et retenu en vie. Ensi ala de ceuls de Saint-Amant : il i ot ce jour grant ocision des hommes et se s'en sauvèrent pluisseurs qui se boutèrent par derrière en le Scarp en nefs et en batiaus et lors femmes et lors enfans et s'en vinrent à sauveté à Mortagne. Quant li contes de Hainnau et li chevalier orent acompli lor désirier de Saint- Amant, il s'en retournèrent et vinrent au siège de Tournai, et li Valenchiennois qui demorèrent darrière en Saint-Amant fustèrent toute la ville et la parardirent et abatirent et destruisirent biaucop des oiFecines et mansions de l'abéie et descouvrirent le moustier qui tout estoit couvers de plonc, et rompirent et abatirent et brisièrent les cloces qui estoient excellentement bonnes et tout cargièrent sus chars et sus charètes, et apriès tous ces desrois, il se retraïssent à Valenchiennes.