CHAPITRE CXXIII
Comment li sires de Montmorensi fut pris des Alemans.
Quant li François orent tant cevaucbiet que il furent venu priés au pont et il veirent la grosse enbusce qui là estoit au devant dou pont toute armée et ordonnée et qui les atendoit en très-bon convenant, si furent tout esmervilliet et dissent entre euls li auqun qui regardèrent la manière : « Nous cacons trop fellement. A aler avant,
« nous porons plus perdre que gaagnier. » Donc retournèrent li auqun et par espécial la banière le signeur de Saint-Sauflieu, et li sires aussi, dont il fu depuis moult blâmés, quant il laissa son compagnon, messire Carie de Montmorensi, liquels et sa banière cevauchièrent tout dis avant et ne volt oncques retourner, mais s'en vint assambler as Alemans et li Alemant à lui. Là ot de premières venues et encores très-fortes joustes, et euls tamains renversés à terre. Ensi que il asamblèrent, li coureur desus nommet qui costyet les avoient, s'en vinrent férir sus èle et se frapèrent ens de plains eslais. Là fîst une grande appertisse d'armes messires Renauls de Sconnevort. Ils qui estoit fors chevaliers et rades et en la flour de sa jonèce, broça cheval des esporons, lequel il avoit assés à main, et rompi la presse et ne cessa si vint au signeur de Montmorensi qui se tenoit desous sa banière, et prist li sires de Sconnevort par le frain le cheval au dit signeur et puis féri son ceval des esporons et le bouta hors de la presse par force de bras et de ceval. Si crioit-on à tous lés : « Sire Dieus aïe. au signeur de Montmorensi ! » Et se metoient li François en painne dou resqourre, mais tout maugré euls, messires Eenauls de Sconnevort enmena le signeur de Montmorensi et le créança prison. De celle aventure furent li François si esbahi que il perdirent lor arroi et n avoient pas gens parellement as Alemans et Hainnuiers, car la grignour partie sievirent la banière le signeur de Saint-Sauflieu, qui se mist au retour, et furent les gens le signeur de Montmorensi tout espars. Petit en i ot de mors ; mais li Alemant et li Hainnuier en menèrent que fiancièrent bien quatre-vins prisonniers, et furent rescous messires Oulfars de Ghistelle et li doi esquier qui pris estoient, et retournèrent en l'oost devant la chité
tle Tournai. Si furent moull; fesjoï de ceste avenue tout li Hainnuier.
