CHAPITRE ex

Comment li contes de Hainnau envoya un hiraut offrir la bataille au duc de Normendie.

Quant cbil signeur si furent logiet, ensi que vous avés entendu, sus la rivière d'Escaut et mis entre Nave et Iwis, deus villages les plus proçains de Thun-l'Évesque, li dus de Normendie estoit d'aultre part la rivière et fu moult esmervilliés, quant il vei si belle gent d'armes et tant de logeis que les hoos de son cousin le conte de Hainnau comprendoient , car ensi que il entendi par ses gens meismes, tous les jours li croissoient gens. En l'oost le conte de Hainnau avoit vingt-cliinq cens hiaumes et vinrent les communautés de Brousselles, de Louvain et de Malignes, et vint Jaquèmes Dartevelle et amena de Flandres bien soissaute mille hommes et passèrent par Audenarde et par Renais et par Leuse et par Condet et par Valenchiennes , et tout se logièrent devant l'oost le duc de Normendie. Et estoient en l'oost le conte de Hain-

nau plus de cent mille hommes, et envoia escarmuchier ceuls de Valenchiennes as François, et entrues que on les ensonnia, messire Richars de Limosin et li compagnon qui en Thun-l'Évesque s'estoient tenu, issirent hors et s'en vinrent en l'oost. Or i ot matière à ravoir les quatre esquiers ostagiers que chil de Thun-l'Évesque avoient délivré au duch de Normendie. Li contes de Hainnau qui chief estoit de toute cel hoost, quant il fu bien consilliés, envoia un hiraut deviers le duch de Normendie, qui li remonstra comment chil dou chastiel de Thun avoient bien tenu lor convenance et que dedens les quinse jours que mis i avoient, secours lor estoit venus, pour quoi ils voloient ravoir lors ostages, et en oultre mandoit li contes de Hainnau, se li dus de Normendie et li François voloient avoir la bataille , il estoient tout apparilliet que pour le livrer et le faire. Li consauls dou duch de Normendie respondi à ce et distque des ostages renvoyer, il estoient consilliet que il les renvoieroient volentiers, car voirement il n'avoient nulle cause dou retenir, mais tant que d'acorder la bataille il n'avoit pas mis encores son consel ensamble et que il en aueroit avis derespondre. Li hiraus retourna sus ce et fist sa response. Li ostage furent renvoyet, et demora li chastiaus de Thun-l'Évesque ensi tous deschirés. Li Hainnuier n'en fissent compte, mais il tinrent à grant vaillance ce que Richars de Limosin et li enfant de Mauni l'avoient si bien tenu contre les François.

Vous devés sçavoir que li conte de Hainnau gissoit là devant les François à grans coustages, et vosist bien avoir eu la bataille et le manda par pluisseurs fois , mais li François n'estoient point consilliet dou combatre , et demora la cose en cel estât uns temps et le faisoient li François tout volentiers pour faire le conte de Hainnau alever

son argent et li bouter en une grande dette encontre les Alemansqui ne sont pas trop légier à repaisier. Nous nous soufferons un petit à parler dou conte de Hainnau et dou duch de Normendie et parlerons dou roi d'Engleterre.