PREMIÈRE ENQUETE

(17 septembre 1440.)

Information et enqueste à trouver, si estre peut, que le sire de Rais, ses gens et complices ont pris et fait prandre plusieurs petiz enffans et autres gens, et les ont meutris et occis pour en avoir le sang, le cœur, le foye, et autres parties d'eulx, pour en faire sacrifice au diable, et autres maléfices de quoi il est grand clamour. Celle enqueste faite par Jehan de Touscheronde, commissaire du duc, nostre souverain seigneur, en ceste matière,

appelle Jehan Colin, pour le prouchain tesmoing que eust en sa compaignie, le 18e jour de septembre, l'an 1440.

Et premier :

Pérou ne Loessart, demeurant à Rochebernart, recorde, par son serment, que en ce présent moys de septembre il y a deux ans, ledit sire de Rais, en s'en retournant de Vannes, vint loger audit lieu de la Rochebernart, chez ledit Jehan Colin, et y coucha. Davant lequel ostel ceste qui parle estoit lors demourante, ayante ung jeune filz de l'âge de dix ans, alant à l'escole, que l'un des gens dudit sire, nommé Poitou, envia ; et vint parler à ladite Peronne qu'elle voulust qu'il demourast avec lui, et que très bien il l'abilleroit et lui feroit beaucoup de biens, et que mesmes celui enfant seroit cause d'en faire avoir audit Poitou ; et que, sur ce, ladite Peronne lui avoit repondu que sondit enfant aloit à l'escole et aprenoit moult bien, et avoit atente de veoir le temps qu'il lui fist des biens, et que, pour celle cause, elle ne l'osteroit de l'escole : et que, sur ce, ledit Poitou lui dist, promist et jura le tenir et envoïer à l'escole, et donner à icelle Peronne cent soûls pour une robe. Sur laquelle confiance et promesse, elle lui octroïa qu'il s'en allast avec lui ; et que assez tost après, il lui porta quatre livres pour sa robe. Sur quoy, elle lui dist que en falloit encore vingt solz : lequel le denya, disant ne lui avoir promis que quatre livres. Sur quoy elle luy dist que sy sçavoit elle que à peine lui tiendroit les

autres promesses, veu que desjà il luy failloit de vingt soûls. Et, sur ce, il lui dist qu'elle ne s'esbahit point pour autant, et qu'il luy feroit et à son enfant d'autres biens. Et, sur tant, eut ledit enfant et le mena chez ledit Jehan Colin, oste dudit sire. Et si, le lendemain, comme celui sire yssit dudit hostel, ceste Peronne lui recommanda sondit enfant, qui présent estoit. Sur quoy, celui sire ne lui dist rien, mais dist audit Poytou, qui là estoit, que celui enfant avoit esté bien choisi, et qu'il estoit bel comme ung ange. Et, sur ce, ledit Poytou luy respondit qu'il ne avoit eu que lui à le choisir : et ledit sire lui dist qu'il n'avoit pas failli à le bien choisir, et que, assez tost après, celui enfant s'en alla avec ledit Poytou, en la compaignie dudit sire, sur ung petit cheval que ledit Poitou acheta dudit Jehan Colin. Et, depuis, n'eust ceste femme nouvelle où fust sondit enfant, ni ne le vit en la compaignie dudit sire, qui depuis a passé par ledit lieu de la Rochebernart, en la compaignie duquel elle n'a depuis veu ledit Poitou ; les aucuns des gens duquel sire, auxquels elle demanda où estoit sondit enfant, lui disoient qu'ils pensoient qu'il estoit à Tiffa âges ou à Buzauges.

Jehan Colin et sa femme; Olive, mère de la femme dudit Colin, demeurant à la Rochebernart, recordent, par leurs sermens, que, en ce présent mois de septembre il y eut deux ans, celui sire de Rais, en venant de Vannes, logea à leur hostel et y

coucha; et que ung nommé Poitou, serviteur dudit sire, fist tant à Peronne Loessart, qui lors demeuroit devant leur maison, qu'elle lui bailla ung sien filz allant à l'escolle, l'un des plus beaux enffans du païs, à s'en aller et demourer avec lui : et que celui Colin vendit ung petit cheval qu'il avoit audit Poitou, la somme de 69 s. pour en emmener ledit enffant. Et disent lesdites femmes que, le soir que celui Poitou eut l'octroy d'avoir ledit enffant, il le mena à l'hostel de ces tesmoins, disant aux autres gens dudit sire que c'estoit son page : quels lui disoient qu'il ne seroit pas pour lui et que ledit sire, leur maistre, auroit ledit enffant. Et que, le lendemain, en yssant celui sire dudit hostel pour s'en aller, ces femmes oyrent la mère dudit enffant le recommander audit sire, celui enffant et Poitou presens ; et que, sur ce, ledit sire dist audit Poitou que ledit enffant estoit bien choisi ; sur quoy ledit Poitou lui respondit qu'il n'y avoit eu que lui à le choisir, et ledit sire lui dist qu'il n'avoit pas failli et qu'il estoit bel comme ung ange. Et que, assez tost après, celui enffant s'en alla sur ledit cheval avee ledit Poitou, en la compaignie dudit sire. Et dit ledit Colin que, dedans deux ou trois mois après, il vit à Nantes ung autre que ledit enfant chevaucher ledit cheval ; de quoy se merveilla. Et disent les dessus nommez que depuis ne virent ledit enffant, ne n'oyrent où il feust, que celles femmes disent que, sur la demande que depuis elles en ont fait aux gens dudit sire, en passant par la Rochebernart, les ungs disoient qu'il estoit à Thiffauges et austres qu'il estoit mort, et que, en passant par sur les pons de Nantes, le vent l'avoit

fait choir en la rivière. Et que, depuis, elles ne virent passer par ledit lieu de la Rochebernart ledit Poitou en la compaignie dudit sire, qui depuis y a passé. Et que, la dernière foiz qu'il y passa, qui fut six sepmaines, en venant de Vannes, elles oïrent dirent à des gens dudit sire à qui elles demandoient où estoit ledit Poitou, pour savoir de lui où estoit ledit enffant, que celui Poitou s'en estoit al é par Redon ; et )miaginent que c'estoit pour la clamour que, par avant celles heures, avoit fait ladite Peronne de sondit enffant : quelle complainte, par les gens dudit sire, pouvoit estre venue à congnoissance dudit Poitou.

Jehan Le Meignen et sa femme, Allain Dulis, Perrot Dupone^, Guillaume Ganton, Guillaume Portuys, Jehan le Fèvre, clerc, de Saint Estienne de Montludz, déposent, par leurs sermens, que dès environ trois ans, ilz ont veu un jeune enffant, filz Guillaume Brice, de ladite parroisse, qui estoit povre homs, fréquenter au bourg de Saint Estienne de Montluz, demander l'aumosne, et auquel bourg sondit père demeuroit, aagé celui enffant d'environ huit à neuf ans : et mourut sondit père, environ le temps de Karesme prenant il y eut un an, et estoit celui enffant très bel filz et avoit nom Jamet ; et depposent que depuis la Saint Jehan passée, ilz ne le le voient ne n'ouvrent nouvelles où il fust, ne qu'il estoit devenu. Et en oultre, dit celui Dupouez que, environ le temps de la Saint Jehan, il encon-

tra une vieille femme avec le visage vermail, de l'aage d'entre cinquante à soixante ans, assez près du presbitere de Saint Etienne, venante devers Coueron, ayente sur sa robbe une cotte de linge par dessus ; et à un jour de par avant, l'avoit veue venir devers Savenay et passer par ledit boys de Saint Estienne, en tenant son chemin droit à Coueron ou Nantes, et à chaque fois qu'elle venoit devers Coueron, cetuy vit ledit enffant près le chemin où il encontra ladite vieille, comme à un trait d'arc, au dessus dudit presbitere, près lequel presbitere estoit demourant un nommé Simon Le Breton ; et dit que depuis, il ne vit ledit enffant, ne n'ouyt dire où il fust ; aussi n'y avoit il païs qui en feist complainte pour ce qu'il n'avoit nulz amis, et estoit sa mère pareillement mendicante, allante à l'aumosne de jour en jour.

Enquis les dessus nommez par Jehan de Touscheronde et Jehan Thomas en sa compaignie, le XVIIIe jour de septembre, l'an 1440,