DEUXIÈME ENQUÊTE

(27 septembre 1440.)

Partie de l'enqueste et information à trouver, si estre peut, que plusieurs enffans et autres gens ont esté prins et menez au chastel de Machecoul, et là meurtriz et occis par le sire de Rais et ses gens, pour en avoir le sang, le cœur, le foye, et autre partie, pour en faire sacrifice au diable, et autres maléfices : ladite enqueste faite par Jehan de Toucheronde, commissaire du duc en ceste matière,

et Nicolas Chatau, notaire de la court de Nantes, en sa compaignie, le XXVIIe jour de septembre, l'an 1440.

Guillausme Fouraige et sa femme, Jehanne femme Jehan Le Flou, Richarde femme Jehan Goudeau, du port de Launay, près Coeron, recordent, par leurs sermens, que environ deux ans, uns jeune filz de l'eage d'environ douze ans, enflant de feu Jehan Bernart, leur voisin, dudit port de Launay. etung autre jeune enfant de Coeron, filz Jehan Neugner, s'en allèrent à Machecoul, pour la cherté, qui lors estoit, en intencion d'y avoir l'aumosne : et que depuis, ilz ne virent le filz dudit Bernart, ne n'en oyrent nouvelles sinon qu'ilz ont oy dire audit filz dudit Meugner que, dedans trois jours, retourna audit lieu de Machecoul, ainsi qu'il disoit que à ung soir, celuy fils Bernart avoit dit audit Meugner qu'il l'attendeist en ung certain endroit, et hors maison, audit lieu de Machecoul, et qu'il aloit quérir logement pour eulx et que sur celles paroles il s'estoit départi, delessé ledit Meugner au lieu que lui avoit dit, et où il avoit attendu plus de trois heures sur espérance qu'il retournast, mais que depuis ne l'avoit veu ne oy nouvelle de lui. Et disent que depuis, ils ont veu la mère dudit Bernart, à présent estante en vendanges, grandement s'en complaindre. Et dit oultre, la femme dudit Fourrage, que depuis ung an, elle avait veu une vieille, que ne congnoissoit, avec une robe de gris

et chaperon noir, qui gueres ne valoient, petite femme, ayante ung jeune fîlz en sa compaignie, disante aller à Machecoul, et laquelle passa au port de Launay avec ledit enffant ; et depuis par là la vit retourner, ung brieff après, comme deux ou trois jours, sans ledit enffant : et pour ce lui demanda qu'il estoit devenu, et que celle femme lui avoit rcspondu quelle l'avait mis à demeurer à ung bon mestre.