TROISIÈME ENQUÊTE

(28, 29 et 30 septembre 1440.)

Autre partie de l'enqueste et infourmacion touchant la matière dessus dite contre ledit sire de Rais, ses gens et complices, faite par Jehan de Touscheronde, Michel Estrillart et Jehan Coppegorge le jeune, commissaires du duc quant à ce, et Nicolas Chatau, notaire de la court de Nantes, en leur compaignie, faite les XXVIIIe pénultième et dernier jour de septembre, l'an 1440.

André Barbe, cordonnier, demeurant à Machecoul, dit que, depuis Pasques, il a ouy dire que le filz Georget Le Barbier, de Machecoul, avoit esté perdu, et qu'on l'avoit veu à ung certain jour cueillir des pommes derrière l'ostel Rondeau et depuis n'avoit esté veu ; et que aucuns de ses voisins avoient dit à cest qui parle et à sa femme qu'ilz

se prissent garde d'ung leur enffant qu'il ne feust prins, et qu'ilz en avoient grand paour ; pour ce que mesmes il avoit esté à Saint Jehan d'Angely, et qu'on lui avoit demandé d'où il estoit et qu'il avoit respondu qu'il estoit de Machecoul, et que sur ce l'on lui avoit dit, en se merveillant, qu'on y mangeoit les petiz enffants.

Mesmes dit que ung enffant de Guillaume Jeudon, qui demouroit chez Guillaume Hilairet, ung enffant de Jehannot Roncin, et ung autre à Alexandre Chastelier, de Machecoul, avoient esté perduz. Aussi en a oy faire la complainte d'autres audit lieu de Machecoul. Et dit qu'on n'en osoit parler, de doute de ceulz de la chappelle du sire de Rais et autres de ses gens, et d'estre enprinsonnez ou maltrettez les complaignans par lesdites gens si lesdites complaintes leur venoient à notice.

Et oultre, dit qu'il oyt, à l'église de la Trinité de Machecoul, à la complainte d'un home qu'il ne congnoissoit, faire la demande si on avoit point veu ung sien enffant qu'il declaroit estre de l'eage de sept ans, et fut environ huit moys y a.

Alyette, femme Guillaume Sergent, demourante en la paroisse de Sainte Croix de Machecoul, en ung village nommé la Boucardière, dit que, environ la Penthecouste l'an dernier, son mari et elle estoient en allez bêcher ung champ pour y semer chanvre, et avoient laissé à leur hostel ung leur filz de l'eage de huyt ans pour garder une

petite fille d'un an et demy, et que, à leur retour, ilz ne trouvèrent point ledit enffant de huyt ans, dont moult se merveillerent et furent moult dolens ; et en furent faire la demande es parroisses de Machecoul et d'ailleurs, et depuis n'en oyrent nouvelles, ne qu'il eust été veu de personne quelconque,

Georges Barbier, taillendier, demourant près la porte du chastel de Machecoul, dépose qu'il avoit ung filz, nommé Guillaume, qu'il avoit mis à demourer avec Jehan Peletier, tailleur de la dame de Rais et des gens dudit sire, pour aprandre le mestier ; et que environ la saint Barnabe dernière, celui enffant, estant en l'eage de dix huit ans, jouoyt après disner à la pelote, à Machecoul, et alors estoit ledit sire et ses gens au chastel de Machecoul ; et que depuis le vespre du jour que ainsi il avait joué à la pelote, il ne vit sondit enffant ne n'oyt nouvelle que personne quelconque l'eust veu, combien qu'il en ait fait plusieurs demandes. Et dit que continuelement celui tailleur, son maistre, et ledit enffant son serviteur, venoient et mangeoient audit chastel.

Oultre, dit avoir ouy murmurer et dire notoirement qu'on occioit des enffants audit chastel.

Item dit avoir oy dire que, semblablement, le page de messire Franczois, qui demouroit avec ledit sire, fut perdu.

Aussi dit que continuellement il a veu grant

nombre d'enffans aller au chastel de Machecoul pour demander l'aumosne quant ledit sire et ses gens y estoient.

Guillaume Hylairet et sa femme Jehanne Hylairet, demourans à Machecoul, disent avoir ouy dire que, environ le temps dessus dit, le filz dudit Gaorget Le Barbier avoit esté perdu, et depuis ne le virent ne n'oyrent où il feust. Oultre, recorde que environ huit ou sept ans, ledit Guillaume Hilairet avoit à demorer avec lui un enffant de l'âge de douze ans, filz de Jehan Jeudon, dudit lieu de Machecoul, pour aprendre le mestier de pelterie. Et dit ledit Guillaume Hilairet, que environ le temps dessus dit, Gilles de Sillé, en présence de messire Roger de Briqueville, lui pria de lui prester sondit vallet pour aller audit chastel de Machecoul faire ung message, quel Hilairet de luy presta et l'envoya audit chastel. Et disent lesdits Guillaume et sa femme que, depuis, ne virent ledit vallet, ne n'oyrent nouvelles où il feust. Et en celui jour, bien tart, ledit Guillaume Hylairet demanda ausdits de Sillé et Briqueville qu'estoit devenu sondit vallet, quels lui respondirent qu'ils ne sçavoient, sinon qu'il estoit allé à Thiphauge et en ung endroit, dist ledit de Sillé, qu'il pensoit que les larrons avoient emmené sondit varlet pour estre page.

Item, disent avoir ouy dire à plusieurs que

pareillement, ung enffant à Jehannot Roncin et ung autre à Alexandre Chastelier, demeurans lors, savoir ledit Chastelier vis à vis de la Trinité de Machecoul, et ledit Roncin es villages, avoient esté perduz ; et oyrent leurs pères et mères s'en complaindre doloreusement.

Item, dit ledit Guillaume Hilairet que, environ cinq ans, il oyt dire à ung nommé Jehan du Jardin, lors demorant avec messire Roger de Briqueville, qu'il avoit esté trové au chastel de Chantocé une pipe toute plaine de petiz enffants mors.

Item, dit celui Guillaume Hilairet avoir oy autreffois une femme de Rais, dont ne sçait le nom, se complaindre à Machecoul de la perdition d'un sien enffant.

Item, disent avoir oy dire communément et notoirement qu'en metoit à mort des enffens audit chasteau, et par ce présument que les enffans dessus nommez y furent meurtriz et mis à mort.

Et, de empuis se comparut davant nous ditz commissaires, ledit Jehan Jeudon, quel dist avoir autreffois baillé son filz audit Guillaume Hilairet pour lui aprandre le mestier de peleterie, et que sondit enffant avoist esté perdu, ne sçait par quel moyen, et que, depuis le temps dessus marqué, il ne le vit ne n'oyt nouvelle. Et aussi dit avoir ouy faire complainte de la perdition d'autres enffants.

Jehan Cliphoton l'esné, Jehan Cliphoton le jeune, Jouhan Aubin, Clemens Doré, de Tonaye, disent avoir ouy Mathelin Thouars, de ladite paroisse de Thonaye, se complaindre et esmoyer d'un sien enflant, lequel il disoit ne savoir qu'estoit devenu, dont il estoit moult dolant : et disent que celui Thoars estoit pauvre homme. Et oyrent celle complainte environ demy an. Et estoit ledit enffant de l'eage d'environ douze ans.

Jehan Roucin, de Machecoul, dit que environ neuf ans y a, un sien enffant, de l'eage de neuf ans, estoit à garder les bestes à ung certain jour, auquel il ne retourna point à l'ostel ; de quoy cest qui parle et sa femme furent moult merveillez qu'il estoit devenu. Et depuis, sur la clameur qu'il et sa femme en faisoient, il lui fut dit par deux de ses voisines qui sont decedees, qu'elles avoient veu Gilles de Sillé aller, avec ung tabart et une estamine devant le visage, parler aveé ledit enffant, et que ledit enffant s'en alla par la poterne audit chastel. Et dit, oultre, que sondit enffant congnoissoit bien ledit Gilles de Sillé, pour ce qui il demeuroit près le chasteau, où aucunes fois il portoit du lait à ceulx qui en vouloient avoir. Et dit que, encore puis, il n'oyt mention de sondit enffent.

Et en oultre, dit que le jour précèdent qu'il per-

LE PROCILS CIVIL 139

dit son enffant, il oyt la complainte de la perdition de celui dudit Jeudon qui demeuroit avec ledit Guillaume Hilairet. Aussi dit avoir oy plusieurs se complaindre de la perte de leurs enffans.

Jolianne, veuve Hemery Edelin, de par avant femme de Jehan Bonneau, demourantà Machecoul, dit que elle avoit ung jeune filz de l'eage de huit ans, allant à l'escolle, qui estoit moult bel et moult blanc, et ung habile enffant : quel demoroit avec la mère de ladite Jehanne, davant le chasteau de Machecoul ; et que environ huit ans y a, celui enffant fut perdu, sanz que l'on puisse savoir qu'il devint. Et que, de par avant, ung enffant à Rouczin et ung aultre à Jeudon avoient esté paraillement perdus. Et que, environ quinze jours après, ung enffant de Macé Sorin et sa femme fut semblablement perdu ; et que, sur la clamor que lors l'on en faizoit, l'on ymaginoit que ceulx enffants eussent esté prins pour les bailler aux Angloys pour la délivrance de messire Michel de Sillé, qui prisonnier estoit ausdits Angloys, pour ce que l'on disoit et avoit esté semé par des gens dudit sire, que pour la somme de la ranczon dudit messire Michel il estoit tenu bailler ausdits Anglois vingt quatre enffants masles.

Item, dit que, environ deux ou trois ans y a, elle vit à Machecoul ung nommé Oran des parties de Saint Mesme, se complaignant piteusement et en plorant de la perdicion d'un sien enffant, et le

demandent audit lieu de Machecoul, mais n'en oyt nulles nouvelles qui soit venu à notice de ladite Jehanne.

Item, dit que, depuis Pasques dernières, elle oyt ung nommé Aisé et sa femme, demeurant à Machecoul, en la paroisse de Sainte Croez, enl'osteld'ung nommé Princzonneau, se complaindre de la perdicion d'un leur enffant.

Item, dit avoir ouy dire qu'il avoit esté perdu plusieurs aultres enffans en Bretaigne et ailleurs, de quoy l'on faisoit grand complainte. Et entre autres, oyt dire à ung homme des parties de Tiffauges, dont ne se souvient du nom, que pour ung enffant qui avoit esté perdu es parties de Machecoul, il en avoit esté perdu sept esdites parties de Tiffauges, et que on les prenoit sur les champs en gardant les bestes, et que on ne savoit qu'ilz devenoient ne quoi on en faisoit.

Macé Sorin et sa femme dient que, environ le temps que marque ladite femme dudit Edelin, l'enffant d'icelle femme Edelin, qui non estoit dudit Sorin, fut perdu sans que l'on peust savoir qu'il estoit devenu ; et que environ celui temps, ils oirent dire que ung enffant à Alixandre Chastelier, ung autre à ung nommé Roncin, et ung autre à un nommé Guillaume Jeudon, qui demoroit avec Guillaume Hilairet, avoient esté semblablement perduz, et que on presumoit alors qu'ilz avoient esté menez aux Angloys pour la délivrance

de messire Michel de Sillé, leur prinsonnier, pour ce que on disoit que pour l'appointement de sa rançon et délivrance, il estoit tenu leur bailler certain numbre de petiz enfants pour estre paiges. Item, dîent que ung filz à Georget le Barbier, leur prouchain voisin, vers Pasques, a esté perdu sans qu'on sache qu'il est devenu, Desquelles pertes et autres ils ont ouy faire secrètement de grans clameurs, lesquelles l'on n'ousoit pas esbruiter.

Perrine, femme Clément Rondeau, de Machecoul, dit que depuis ung an, son mari telment estoit malade qu'il fut mis en estresme onction et qu'on y esperoit plus la mort que la vie, et que, alors et de par avant, nostre Françoys et le marquis de Scena, lombars, demourans avec le sire de Rais, estoient logez en une haute chambre de sa maison, ou ilz couchoient ensemble, et que au jour que sondit mari fut mis en onction, celle Perrine, pour les plours et dolens qu'elle menoit de sondit mari, fut mise, devers le soir, en la chambre desdits Franczois et marquis, qui estoient allez au chastel de Machecoul, delessez leurs paiges à souper en ladite chambre ; et que ceulx Franczois et marquis, retournez à ladite chambre, fureut moult courroucez avec ladite Perrine, lui dirent moult d'injures de ce que elle y estoit entrée, la prindrent l'un par les piez et l'autre par les espaules, la portant vers l'eschelle pour la cuider jetter du hault en bas, et en celle intention, la frapa du pié par les rains

ledit François ; et croit qu'elle y fuste cheute, si sa nourrice ne l'eust prinse à la robe.

Item, dit que depuis celui temps elle oyt ledit marquis dire audit François qu'il lui avoit trouvé ung beau page des parties de Diepe, de quoy celui Franczois dist estre bien joyeux, et que ung jeune enffant, moult bel, qui disoit estre desdites parties de Diepe et de gens de bien, vint demourer avec ledit Franczois, et y fut environ quinze jours. Et après, ceste Perrine se merveilla qu'il estoit devenu, et demanda audit Franczois où estoit sondit page, quel lui respondit qu'il l'avoit bien trompé, et qu'il s'en estoit allé avec deux escuz du sien qu'il avoit euz à faulz entreseingns.

Item, dit que depuis, Colin Franczois et mestre Eutache Blanchet s'en allèrent demourer en une petite maison située à Machecoul, où demouroit ung nommé Perrot Cahu, auquel ils osterent les clefs de ladite maison et l'en mirent hors ; quelle maison est loing de gens et en lieu rebout et rue foraine où ne hante gueres de gens, et à l'entrée y a ung puiz ; et en celui petit hostel qui n'est pas honneste pour gens d'honneur, couchoient lesditz Franczois et maistre Eustache et ledit marquis couchoit à la maison de ladite Perrine et de son mari, fréquentant avec lesdits François et mestre Eustache.

Item, dit que de l'ostel dudit Cahu, elle vit, eu présence de Jehan Labbé et d'autres, depuis la prinse dudit sire et des dessus nommez, apporter pouldre qu'on disoit estre d'enffans et une petite chemise d'enffant sanglante, qui moult puoient, qui lui firent moult grand mal à sentir.

André Bréchet, de la paroisse de sainte Croix de Machecoul, recorde, par son serment, que, environ demy an a, il estoit à faire le guet au chastel de Machecoul, et que, après minuyt, il s'endormit : et, luy dormant, survint ung petit home sur le mur, qu'il ne congnoissoit, quel l'esveilla, ayant sa dague toute nue, en lui disant : « Tu es mort ». Et, neantmoins, sur les execusations dudit André, ne lui meffist celui homme, mais s'en alla et départit. Et, de ce, eut moult grand paour et trémour ledit André : et, le landemain, encontra le sire de Rais, venant devers Boign, allant à Machecoul. Et depuis n'osa aller faire le guet audit chastel.

Perrot Pasquet eau, Jehan Soreau, Katerine de Grcpie, Gillaiimc Guarnier, Perrine femme Jehan Veillart, Margarite femme Perrot Red i net, Marie femme Jehan Caeffin, Jehanne femme Estiennc Landays de Fresnay près Machecoul, recordent, par leurs serments, que, ung jour après Pasques dernières, ils oyrent Guillaume Hamelin et Ysabeau, sa femme, de la paroisse de Fresnay, doloreusement se complaindre de la disparition de deux leurs enffants, quels ne savoient qu'estoient devenus. Et depuis n'ont oy que ceulx enffans ayant ayant esté veuz ne trouvez.

Ysabeau, femme Guillaume Hamelin, demorante au bourg de Fresnay, et laquelle et son mari, environ ung an y a, y estoient de Pouancé venuz demourer, recorde, par son serment, que environ sept jours avant la fin d'année passée, elle envoya deux ses enffans masles, l'un en l'eage de quinze ans et l'autre de sept ou environ, en la ville de Machecoul, pour devoir acheter du pain, d'argent qu'elle leur avoit baillé, et qu'ilz ne retournèrent point, et depuis n'oyt nouvelles où ilz feussent. Et que le lendemain après les avoir ainsi envoiez, maistre Franczois et le marquis, qui demouroient avec le sire de Rais, et lesquels elle dit bien congnoistre et avoir veuz plusieurs foiz, se rendirent à sa maison, lui demandèrent, savoir ledit marquis si elle estoit guérie de sa mamelle, sur quoy elle lui respondit comment il savoit qu'elle y eust mal, car elle n'y avoit point de mal eu. Il lui dist que si, et après, lui dist qu'elle n'estoit pas de celui païs et qu'elle estoit de Pouancé, et elle lui demanda comment il le savoit, et il lui dist qu'il le savoit bien, et adonc elle lui respondit qu'il disoit vray. Et sur tant, il mist la teste en l'ostel et lui demanda si elle avoit point de homme, et elle luy dist que ouy, mais qu'il estoit allé à leur pays pour se gagner. Et sur ce que il aperceut deux petiz enffans en l'ostel, savoir une fille et ung filz, il lui demanda s'ilz estoient à elle, quelle lui respondit que ouy, et après, lui demanda si elle n'en avoit que ceulx deux ; sur quoy elle lui dist qu'elle en

avoit encore deux autres, sans lui déclarer la disparition d'eulx, et qu'elle n'osoit le leur dire. Et adonc, se départirent, et au département ouyt ledit marquis dire audit mestre François qu'il en estoit sorti deux de celui hostel.

Et en oultre, dit que environ huit jours de par avant, elle avoit oy dire que Mecheau Bouer et sa femme, de Saint Cire en Rais, avoient semblablement perdu ung leur enffant, qui depuis ne fut veu.

Perrot Soudan, de Fresna}7, recorde, par son serment, que, environ le temps que marque ladite Ysabeau, il vit celx mestre François et le marquis parler avec ladite Ysabeau, davant l'ostel où elle demoure, n'entendit pas qu'ilz lui disoient, pour ce que il en estoit si loing que bonnement ne le peust on. Aussi oyt fere complainte de la perte desdits deux enffants, et d'un enffant à Micheau Bouer, qui depuis ne furent veuz, qu'il ait ouy.

Guillemete, femme Micheau Bouer, de Saint Cire en Rais, recorde, par son serment, que, sept jours après Pasques dernières, ung sien filz, de l'eage de huyt ans, qui estoit bel enffant et blanc, estoit allé à Machecoul à l'aumosne, et qu'il ne retourna point, et depuis n'ouyt nouvelle de lui, combien que le mari d'elle, père dudit enffant, en

ayt fait plusieurs demandes en divers lieux, et que, le landemain et qu'estoit le jour qu'on donnoit la charité à Machecoul pour deffunct Mahé Le Breton, elle, estante à garder les bestes, se rendit à elle un grand homme, vestu en noir, qu'elle ne congnoissoit, quel, entre autres choses, lui demanda où estoient ses enffants qu'ilz étoient à garder les bestes. Sur quoi elle lui dist qu'ilz n'estoient allez à l'aumosne à Machecoul. Et sur tant se départit d'avec elle et s'en alla.

Guillame Rodigo, autrement De Guerrande, et sa femme, demourans à Bourgneuf en Rais, recordent, parleurs sermens, que la veille de Saint Berthelemei dernière, le sire de Rais et ses gens, entre lesquelx estoient maistre Eustache Blanchet et Poitou, vindrent loger à Bourgneuf en Rais, et soupa ledit sire chez Guillaume Plumet, et que, alors, celui Rodigot avait ung jeune fîlz de l'eage de quinze ans, nommé Bernart Le Camus, des parties de Brest, que ung sien oncle et le maucadre de Brest lui avoient baillé de paravant pour aprendre françois à demorer avec lui. Et que celui jour, ceulx maistre Eustache et Poitou parlèrent avec ledit jeune fîlz, qui estoit moult bel et habile, ne sçavent qu'ilz lui dirent, et alloit ledit Poitou à l'ostel des dessus nommez, demandant audit Rodigo qu'il achetast dudit sire seulx qu'il avoit à vendre, disant avoir déjà fait le marché dudit Rodigot avec ledit sire. Et que celui soir, environ dix heures, celui

enffant s'en alla de son ostel, sans en emporter sa robe, ses chausses, et chaperon, au desçu et en l'absence desdits Rodigo et sa femme ; et que leur chambrière leur avoit dit que celui enffant, paravant son partir, lui avoit dit qu'il s'en alloit et qu'elle gardast bien et serrast les tasses, et sur tant, s'en estoit yssu de l'ostel; et que depuis, ilz n'avoient veu ni oy qu'estoit devenu ledit enffant, combien que ledit Rodigo en ait fait plusieurs demandes, tant audit sire que à sesdites gens et offert quarante escuz pour le lui rendre. Sur quoy ceulx Poitou et Eustache lui respondirent que s'ilz le pouvoient trouver, que volontiers le lui feroient rendre, mais qu'ilz doubtoient qu'il feust allé à Tifauges pour estre page.

Marguerite Sorin, de la paroisse de Saint Aignen, chambrière desdits Rodigo et sa femme, recorde par son serment, que environ le temps dessus marqué, elle et ledit enffant, estans après souper à l'ostel dudit Rodigo, jouans ensemble, ceulx Rodigo et sa femme estant près de là en une leur autre maison où ilz avoient soupe, survint ledit Poitou sur ceulx chambrière et enffant, demandant s'ilz jouoient ainsi ensemble; quels lui respondirent que oui. Et que après, il tira à part ledit enffant, tenant la main sur son espaule, et son chapel en l'autre main, parlant avec ledit enffant si bassement qu'elle ne le povoit oïr. Et après avoir ainsi parlé, s'en alla ledit Poitou, et adonc ceste

qui parle demanda audit enffant que celui Poitou lui avoit dit; quel lui respondit qu'il ne lui avoit riens dit; et assez tost après, celui enffant dist à ceste qui parle qu'il s'en vouloit aller, et qu'elle gardast et serrast les tasses; et alors s'en partit sans lui vouloir déclarer où il alloit, combien qu'elle le lui demandast, et laissa sa robe, ses chausses et chaperon, et s'en alla en son doublet. Et depuis ne le vit, ne n'oyt novelles.

Guillaume Plumet et s a femme, Michel Gerart, de Bourgneuff en Rais, recordent, par leurs sermens, qu'ilz virent demourer ung bien jeune enffant de la basse Bretaigne nommé Bernart, chés ledit Rodigo, et qu'il y estoit avant la Saint Berthelomei dernière; et que, ung peu avant ladite feste, que le sire de Rais vint loger et coucher à Bourgneuff, ilz oyrent, et depuis, celx Rodigo et sa femme grandement se complaindre de la disparition dudit enffant; lequel ces tesmoins depuis ne virent, ni oyrent dire où il feust.

Thomas Aysée et sa femme, demourans au Port saint Père, recordent, par leurs sermens, que il y a ung an ilz ont demouré à Machecoul et que encore ilz y demeuroient à la Penthecouste dernière, et que, environ ledit temps de Penthecouste, pour ce que sont pouvres gens, ilz avoient envoie ung leur filz,

d'environ l'eage de dix ans, quérir l'aumosne au chastel de Machecoul, où pour lors estoit le sire de Rais, et que depuis, ilz ne virent leurdit enffant ne n'en oyrent nouvelles, sauf que celle femme dudit Aisée dit que une petite fille, dont on ne sçait le nom ne qui est son père, lui dist qu'elle avoit veu sondit filz à l'aumosne devant ledit chastel et que, premièrement, l'on avoit donné l'aumosne aux filles devant ledit chastel, et que après l'on en avoit donné aux enffants masles, et que après la leur avoir donnée, celle petite fille disoit avoir oy l'un des gens dudit chastel dire au filz des dessus nommez qu'il n'avoit point eu de chair, et qu'il entrast audit chastel, et il en auroit, et que, de fait, après celles paroles, l'on l'avoit mis et fait entrer audit chastel.

Jannete, femme Eustache Drouet, de Saint Ligier près le Port saint Père, recorde, par son serment, que, environ quinze jours avant Noël, il y eut ung an, elle envoya deux de ses enffants masles, l'un de dix ans et l'autre de sept, en la ville de Machecoul, pour demander l'aumosne, pour ce que avoit ouy dire que le sire de Rais y en faisoit donner, et aussi que les gens d'icelle ville en donnoient volontiers. Et dit que sesdits enffants y furent par certains jours, pour ce que vit gens qui disoient les y avoir veuz; mais, depuis, y estant allez, ne les vit ne ne sceit qu'ilz devindrent, combien qu'elle et sondit mary en ayent fait faire plusieurs demandes.