QUATRIÈME ENQUÊTE

(2 octobre 1440.)

Autre informacion et enqueste faite par Jehan de Touscheronde et Estienne Halouart, commissaires du duc en ceste matière, et Nicolas Chatau, notaire de la court de Nantes, en leur compagnie, le second jour d'octobre, Tan 1440.

Jehanne de Grepie, femme Regnaud Donete, de la paroisse de Nostre Dame de Nantes, dit et recorde, par son serment, que environ la Saint Jehan passée y eut deux ans, le sire de Rais, lors estant à son hostel à Nantes, elle perdit ung sien enffant de l'eage de douze ans, qui alloit à l'escole, et que depuis elle n'en oyt nouvelles, sinon que, quinze jours y a, elle a oy Perrine Martin, détenue es prisons de Nantes, confesser qu'elle avoit mené sondit enffant audit sire, à sa chambre, en son hostel, à la Suze, audit lieu de Nantes, et que celui sire lui avoit commandé le mener à Machecoul et le bailler au portier, et que, de fait, elle y avoit mené ledit enffant.

Item, dit que Jehan Hubert et Denis de Lemyon, dudit lieu de Nantes, ont perdu chacun son filz, que elle cognoissoit, dont les a oy se complaindre, et depuis leur complainte ne les vit.

Item, dit que sur la complainte qu'elle en fist à ung nommé Cherpy et autres gens dudit sire, pour

ce que aucunesfois il fréquentait audit lieu de la Suze, prés lequel ceste Perrène demeuroit ceulx Cherpy et gens dudit sire lui avoient repondu qu'il/, pensoient qu'il estoit allé à Machecoul pour estre page.

Jehan Jenvret et sa femme, de Sainte Croix de Nantes, recordent, par leurs sermens, que, huyt jours avant la Saint Jehan Baptiste, passé eut deux ans, le sire de Rais, lors estant à Nantes à son hostel de la Suze, ilz perdirent ung leur filz de l'eage de neuf ans, alant à l'escole, et lequel aucune foiz frequentoit audit lieu de la Suze, et depuis n'en oyrent novelles jusques à puis trois sepmaines qu'ilz ont oy dire que Peronne Martin, détenue es prisons de Nantes, a confessé avoir mené ledit enffant audit sire de Rais, à son chastel de Machecoul.

Jehan Hubert et sa femme, de saint Leonart de Nantes, recordent par leurs sermens, que le jeudi après la saint Jehan passée y eut deux ans, ilz perdirent ung leur fils de l'eage de quatorze ans, allant à l'escole, le sire de Rais lors estant à son hostel de Nantes, et que de paravant, celui enffant avoit demouré par louage par le temps de huit jours avec Princzay, poursuyvant ledit sire, combien que

par le pacte dudit louage il y deust demeurer en plus large, et que celui Princzay eut promis faire beaucoup de biens audit enffant et à sesdits père et mère, et lequel enffant il ne leur rendit aucunement, ne ne leur dist la cause du département d'avec lui, bien leur dist leurdit enffant que celui Princzay avoit ung cheval qu'il n'osoit chevaucher de doubte qu'il le tuast.

Et sur tant, lui dirent qu'il convenoit qu'il retournas! à l'escole. Sur quoy celui enffant respondit à sesdits père et mère qu'il y avoit ung bon gentilhomme avec ledit sire de Rais, qui se appeloit Espadin, avec qui il avoit bonne cognoissance, avec lequel il desiroit demourer, pour ce que il lui avoit promis bien l'appareiller et le mener au païs d'amont et lui faire beaucoup de biens. Et sur celle confiance, consentirent sesdits père et mère qn'il y allast, et de fait y alla le lendemain qu'il fust venu d'avec ledit Princzay, sans coucher à leur hostel que une nuyt ; et depuis, estant allé audit lieu de la Suze, où lors, ledit sire estoit, ils y virent continuellement leur dit enffant par le temps de sept jours durant, lesquels celui sire alla hors de la ville, et y fut quatre ou cinq jours, delessé partie de ses gens et ledit filz audit lieu de la Suze, et que, ung jour du retour dudit sire, celui enffant ala chez ses père et mère, dist à sadite mère que ledit sire l'amoit bien, et qu'il venoit de netoier sa chambre, et que son mestre lui avoit donné ung pain de bouche dudit sire, lequel il bailla à sadite mère. Mesmes lui dist que ung nommé Syrnonnet, l'un des gens dudit sire, lui avoit baillé ung autre pain de bouche pour porter à une femme en la ville. Et dient que, depuis, ilz

ne virent leurdit enffant, ne n'en oyrent novelles, nonobstant qu'ilz en ayent fait plusieurs complaintes à des gens dudit sire, quels respondoient que ung chevalier escossays, qui l'aimoit bien, l'en avoit enmené. Mesmes en firent complainte à la femme mestre Jehan Briend, depuis ung moys, et que celle femme Jehan Briend dist à ladite femme dudit Hubert qu'elle avoit dit que ledit sire avoit tué sondit enffant. Surquoy celle femme Hubert lui dist qu'elle n'en avoit riens dit, et celle femme dudit Briend lui dist que si avoit dit, et qu'il en mescherroit à elle et à autres.

Item, dient que depuis la perdicion dudit enffant, celui sire demoura à Nantes par le temps d'environ quinze jours, pendant lesquels celui Espadin envoya quérir cest Hubert ainsi qu'il dit, lui demanda où estoit sondit enffent ; surquoy, il lui respondit qu'il ne savoit et qu'il l'avoit baillé audit Espadin, et qu'il lui en respondroit, et que sur ce ledit Espadin lui dist qu'il estoit ung foui, et qu'il avoit perdu son enffant. Aussi dient qu'ils ont oy à la De Grepie, Regnaut, Donete, Denis de Lemyon et sa femme, et Jehan Janvret et sa femme, se complaindre pareillement d'avoir perdu un des enffans.

Item, dit ledit Hubert que sur ce que, depuis la perdicion de sondit enffant, il avoit dit audit Princzay qu'il avoit fait grand péché qu'il n'avoit autrement gardé et gouverné sondit enffant, celui Princzay lui avoit respondu que ne lui en chaloist, et que par aventure il estoit à ung bon gentilhomme qui lui feroit beaucoup de biens.

Agaice, femme Denis de Lemion, tisserand, de la paroisse de Nostre Dame de Nantes, dit que environ ung an et demy, un sien neveu, filz Colin Avril, demouroit avec son mari et elle, et estoit en l'eage de dix huyt ans, frequantant aucunes foiz à la Suze et que, le sire de Rays y estant, l'un de ses gens, devers ung soir, lui pria de lui prester ledit enffant pour lui monstrer l'ostel de l'archidiacre de Merles, et qu'il lui donneroit une miche. Laquelle le voulut et alla avec lui, et après s'en retourna : et le lendemain, alla ledit enffant audit lieu de la Suze, enintencion d'avoir ladite miche : et que, depuis, il ne retourna, ne n'oyt nouvelle qu'il feust devenu.

Jehanne, femme Guibelet Délit, de saint Denis de Nantes, dit que en caresme dernier y eut ung an, elle perdit ung sien enffant de l'eage de sept ans, qui frequantoit à la Suze avec ung nommé Cherpy, queux du sire de Rais, quel, au temps de la perdicion, estoit audit lieu de la Suze, et lui avoit dit Maistre Jehan Brient, qui y demouroit, qu'il avoit veu ledit enffant rostir audit lieu de la Suze, et qu'il avoit dit audit queux qu'il ne faisoit bien d'ainsi le laisser brûler, et que depuis, elle n'avoit veu sondit enffant ne en oy novelle.

Item, dit que, après trois ou quatre mois, elle

s'en complaignit à la femme duclit maistre Jehan Briend, en lui disant qu'on disoit que le sire de Rais faisoit prendre des petitz enffants pour les occire, et que sur celles paroles, estoient survenue deux des gens dudit sire, dont elle ne sçait les noms, auxquels celle femme Briend avoit dit que ceste qui parle disoit que ledit sire faisoit occire les petiz enffants et lui dist qu'il lui en mescherroit, et d'autres ; dont elle s'excusa vers les gens dudit sire.

Jehan Toutblanc, de saint Estienne de Montluz, recorde que, à la Saint Julian dernière, passé eut ung an, il alla à Saint Julian de Vovant, delessé à sa maison un jeune filz de l'eage d'environ treize ans, nommé Jehan, fils duquel cest tesmoing estoit tuteur, et quel enffant demouroit à son hostel : et que, à son retour dudit voïage, ne le trouva, ne depuis n'en oït nouvelles.

Jehan Fougère, de la parroisse de saint Donacien, près Nantes, recorde, par son serment, que, environ deux ans y a, il perdit ung sien filz, d'environ l'eage de douze ans, qui estoit moult bel : et depuis ne peut savoir qu'il devint.

Jehan Ferot, Guillaume Jacob, Perrin Blauchet, Thomas Beauvis, Bonnet Jehan, Denis de Lemyon, de la paroisse de Nostre Dame de Nantes, recordent, par leurs sermens. qu'il congnoissent ung filz à Jehan Hubert, ung filz à Regnaud Donete et ung filz à Guillaume Avril, qui demourerent en ladite paroisse de Nostre Dame, quels enffants ne sçavent qu'ils sont devenuz, et ont oy leurs pères et mères et leurs amis se complaindre doloreusement de l'adirance desdits enffants. Quelle complainte et adirance ces tesmoins ont ou}>-e et veue depuis deux ans et demy, sans avoir sceu ne oy nouvelle desdits enffants, sinon que, depuis ung an, ils ont oy dire que le sire de Rays et ses gens prenoient et faisoient prandre des enffants pour les occire, 8t qu'il en est commune renommée.

Nicole, femme Vincent Bonnereau, Philipe femme Mathis JErnaut, Jehan ne femme Guillaume Prieur, de la paroisse de sainte Croix de Nantes, recordent, par leurs sermens, qu'elles congneurent ung filz à Jehan Janvret et sa femme, demourant chez monsieur d'Estampes, estant celui enffant de l'eage de neuf ans ou environ, de la perdition et disparition duquel enffant ils oyrent ses père et mère piteusement se complaindre, environ le temps de la Saint Jehan passée y eut deux ans ; et depuis

ne virent ledit enffant ne n'oïrent où il fust. Et dient que depuis demy an en ça, ilz ont oy dire communément que le sire de Rais et ses gens faisoient prendre et occire des petitz enffants.

Item, dient avoir congnu ung jeune filz enffant de feu Eonnet de Villeblanche, et avoir oy, après trois mois, la mère dudit enffant se complaindre de la perdicion ou disparition d'icelui et que, depuis celle complainte, ne le virent.

Item, Raoulet de Launay, tailleur, dépose que environ l'Assemption dernière, il fist ung pourpoint à l' enffant dudit de Villeblanche, qui lors demeuroit avec Poitou, et lequel Poitou, non pas ladite Macée, marchanda avec lui de lui faire ledit pourpoint, et en eut vingt soulz dudit Poitou, et depuis ne vit ledit enffant.