CINQUIÈME ENQUÊTE

(6 octobre 1440.)

Jehan Estaisse, Michèle, femme dudit Estaisse, de la parroisse de saint Clemens près Nantes, recordent, par leurs sermens, ung filz dudit Dagaie, nommé Perrot Dagaie, quel ilz virent demourer par le temps de deux ans ou environ avec maistre Gacien Ruis, et au temps qu'il y ala demourer, povoit bien avoir l'eage de onze ans. Et après y

avoir demouré par ledit temps de deux ans, vint demourer avecques sa mère, et fut avec elle ung jour ou deux, et y coucha par une nuyt, à la savance de ces témoins. Et depuis celles heures et environ de la Toussains prochain venant y aura deux ans, aperceut la mère dudit enffant et ces tesmoins et plusieurs des voisins de là lamentant la disparition dudit enffant; et oncques puis ne fut veu à la savance de ces tesmoins en ladite parroisse, ne ailleurs ; et avoir plusieurs fois oy que la mère dudit enffant faisoit demande de sondit enffant audit maistre Gacien, à ses gens et à ung nommé Linache, demourant à Angers, en soy complaignant disante qu'elle ne savoit qu'il estoit devenu.

Et aussi en virent fere demande et complainte à Trephaine, femme Eonnet Le Charpentier, boucher, sœur de la mère dudit enffant, laquelle pareillement l'a ainsi dit et relaté.

Item, enquis s'ilz ont point oy dire et tenir que ledit sire de Rays prenist et fist prendre et occire celui enffant ne autres, dient que non, sinon depuis que la prinse dudit sire de Rays et de ses gens a esté faite ; et n'avoir eu congnoissance desdites Stéphanie et Perrone, à présent détenues en prinson, jusques au temps de présent.

8 octobre 1440

Jehan Chiquet, parcheminier, demourant hors la porte Sauvetout, deppose par son serment, que ung mois a ou environ, ung nommé Macé Drouet, mercier, de la partie de Chantelou près Rennes, vint loger chez ce tesmoing et en sa compaignie plu-

sieurs autres merciers. Et parloient ensemble des enffants qui avoient été perduz au païs de Rays, auquel Drouet ce témoin oyt dire que deux autres merciers et lui avoient esté au païs de Rais à plusieurs foires, environ il y a ung an, et que depuis qu'il les avoit laissés en icelui païs de Rays, il ne les avoit veuz et qu'il avoit veu leurs père et mère qui lui avoient demandé des nouvelles et qu'il leur avoit dit qu'ils ne savoit qu'ilz estoient devenuz.

Pierre Badieu, mercier, de ladite parroisse de Chantelou, dit que, il y a ung an ou environ, il vit, audit païs de Rais, deux petiz enffans de l'aage de neuf ans ou environ, et avoient chacun sa baie et alloient es foires, aussi que ce tesmoin le faisoit, et estoient frères et enffants de Robin Pavot dudit lieu. Et oncques depuis celui temps ne les vit, ne ne sçait qu'ilz sont devenuz et que depuis il a esté au païs d'où ilz estoient et a parlé avec leur père et mère et avec ung leur frère, qui lui en ont demandé des nouvelles, et qu'il leur avoit dit que depuis ne les avoit veuz qu'il les avoit veuz audit païs de Rais. Et aussi dit avoirt oy dire à leurdit frère qu'il avoit esté en plusieurs parties de païs pour en devoir oyr des nouvelles, lequel n'en a rien peu savoir ne dessentir.

Jehan Daret, de la parroysse de Saint-Seuvrin,

l6o LE PROCÈS INQUISITORIAL DE GILLES DE RAIS

près Nantes, dit qu'il y a trois ans ou environ qu'il est demourant en celle parroisse et que, il y a ung an et plus, qu'il estoit au lit malade, où il fut détenu par long temps, et durant celui temps ung sien filz, estant a sa maison, de l'aage de neuf ans, fut prins en la rue du marché où il estoit avecques autres enffants à l'esbat, ne sçait qui le print, ne où il fut menné, ne depuis n'en a peu sçavoir aucunes nouvelles, neantmoins qu'il ait esté par plusieurs pais pour en devoir oïr des nouvelles.

Jehanne, femme dudit Darel, deppose que, le jour de la Saint Père y eut ung an, celle perdit en ceste ville de Nantes un sien filz, nommé Olivier, estant en l'eage entre sept et huit ans. Et depuis celle feste de Saint Père, ne le vit, ne oït nouvelles qu'il fust devenu.

Jehanne, mère de ladite femme Darel, deppose que ledit jour de la Saint Père il y eut ung an, en venant de vespres de saint Père Nantes, elle trouva celui enffant près le pilory, l'en amenna jusques davant l'église de saint Saturnin de Nantes, le cuidant amenner à sa maison ; davant laquelle église, en la presse des gens qui là estoient, elle perdit ledit enffant, le chercha par l'église et ne le y peut trouver ; et- oneques depuis ne le vit, ne oneques depuis n'en oyt aucunes nouvelles.

LE PROCÈS CIVIL l6l

Eonnette, femme Jehan Bremant, demourante au marché, en la maison desdits mariez, deppose qu'elle congnoissoit bien l'enffant desdits mariez, nommé Olivier, ayant l'aage dessus dit, et dit que elle est certaine, dès le temps dessus marqué, la femme dudit Darel lui dist que elle avoit perdu sondit enffant, demanda à ce tesmoing si elle l'avoit point veu, qu'elle lui respondit que non ; et dit que, depuis, cellui enffant ne s'est rendu à la maison de ses père et mère, à la connoissance de ce tesmoin, ne n'oyt qu'il fust trouvé. Et est son records.

Nicole, femme Jehan Hubert, de la parroisse de saint Vincent de Nantes, tesmoing juré dire vrai, recorde, par son serment, que dès environ la Saint Jehan dernière y eut deux ans, avoit un filz nommé Jehan, de l'aage de quatorze ans, lequel de paravant elle avoit mis à demourer avec ung nommé Mainguy avec lequel il demoura peu de temps, pour ce que celui Mainguy deceda. Et après son decés, s'en vint sondit filz demourer avecques elle et sondit père; et assez tost après, vint ledit sire de Rais des parties d'Angiers loger à son hostel de ceste ville, cà la Suze, auquel lieu le filz de ce tesmoing alla, et trouva ung nommé Spadine, demourant avec ledit sire, quel lui donna une miche, laquelle il aporta à ce tesmoing, et lui dist

que ledit Spadine la lui avoit donnée, et lui avoit dit qu'il le vouloit avoir à demourer avec lui pour chevaulcher avec lui en la compaignie dudit sire de Rays. Et ce tesmoing lui respondit que c'estoit bien fait. Et s'en ala sondit filz derechief audit lieu de la Suze, et ung peu après s'en retourna, et dist adieu à ce tesmoing souvent, et qu'il s'en alloit demourer avecques ledit Spadine, et de fait si en alla à celle heure ; et oncques puis ne le vit, ne ne sceut qu'il devint. Et recorde que depuis, Jehan Hubert, mari de ce tesmoing, et père dudit enffant, alla audit lieu de la Suze et demanda audit Spadine où estoit son fîlz, quel lui respondit, par deux foiz, qu'il ne savoit et que s'en alast, et qu'il estoit perdu. Et est son records.

Jehan Bureau et sa femme, Johann e femme Thebault G effroi et sa fille, Guillaume Hemeri, tesmoins, jurer dire vrai et enquis, recordent, par leurs sermens, qu'ils congnoissent bien ceulx Hubert et sa femme, et aussi congnoissioent bien ledit Jehan, leur fîlz, et les ont veu demourer par long temps en la paroisse de saint Leonart de Nantes, et y estoient demouran à la Saint Jean passée il y eut deux ans. Et en celui temps, avecques eulx estoit ledit Jehan, leur filz, et de paravant et depuis l'ont veu à la maison de sesdits père et mère, et environ celui temps, s'en alla celui enffant ou fut prins ne sceurent où, ne quelle part, et oncques depuis ne le virent ; et ont veu depuis ses père et mère en faire

demande en ceste ville et ailleurs. Et est leur records.

La De Grcpie, femme Régna ni t Donete, demourante en la parroisse de Nostre Dame de Nantes, tesmoing, jurée dire vrai et enquise, recorde, par son serment, que des la feste de saint Jehan Baptiste passée il y eut deux ans, elle et sondit mari estoient demourans en l'ostel où pour le présent encore elle demoure, et avecques eulx estoit ung leur filz. Et estoit son mari loué pour certain temps à ung nommé Jehan Perot, boulenger, pour faire le mestier de boulenger : et y alloit souventes fois sondit filz avecques son père, pour coucher le pain. Et dit que, paravant celui temps, celui son filz s'estoit acointé d'aucuns des gens du sire de Rays, qu'elle dit ne congnoistre point, et que, incontinent que ledit sire estoit venu en ceste ville, celui son filz s'en alloit à l'ostel dudit sir de Rays, ne sçait qu'il y faisoit; et dit que, en celui temps de la Saint Jehan passée y eut deux ans, celui son filz alla à l'ostel dudit sire, et oncques depuis ne le vit, ne ne sçeut qu'il devint, quel s'il fust mort. Et depuis a esté en plusieurs lieux pour en devoir oïr des nouvelles : de quoy elle n'a peu riens voir ne sçavoir. Et est ce que deppose.

Jehan Perot et sa femme recordent, par leurs sermens, que au temps de la Saint Jehan passée il y eut deux ans, celui Regnaud Donete, deffunct, s'estoit loué avecques eulx pour faire le mestier de boulenger ; et avecques lui souventefois venoit ung sien filz, qui couschoit le pain, aagé de douze ans, lequel, plusieurs fois, ilz ont veu que quant il avoit cousché demie fournée de pain, et il voyoit et savoit que ledit sire de Rais estoit en ceste ville, il laissoit le pain à couscher et s'en alloit à l'ostel dudit sire, ne sçavent qu'il y faisoit. Et lui virent aller en celui temps à ung jour dont ne se rappellent, et oncques depuis ne le virent, ne ne sçavent qu'il devint.

Pierre Blanchet, Guillaume Jacob , recordent par leurs sermens, qu'ilz sont demourans près l'ostel de celle veuve Regnaud Donete, et qu'ilz sont certains que, au temps de la Saint Jehan passée il y eut deux ans, celui Donete et celle veuve avoient ung filz, lequel ils congnoissoient bien, et lequel, incontinant que le sire de Rais estoit en ceste ville, il alloit à l'ostel dudit sire, ne sçavent qu'il y faisoit; mais depuis celui temps qu'il y alla, ilz ne le virent ne ne sçavent qu'il est devenu. Et est leur recors.