CHAPITRE XXXV

Les hespailliers de la nauf Lanternierel amenerent le physetere lié en terre de l’isle prochaine, diéte Farouche, pour en faire anatomie et recueillir la gresse des rognons?, laquelle disoient estre fort utile et necessaire à la guerison de certaine maladie qu’ilz nommoient Faulte d’argent. Pantagruel n’en tint compte, car aultres assez pareilz, voyre encores plus enormes, avoit veu en l'Océan Gallicqueÿ. Condescendit toutesfoys descendre en l’isle Farouche pour seicher et refraischir aulcuns de ses gens mouillez et souillez par le vilain physetere, à un petit port desert vers le midy, situé lez une touche de boys haulte, belle et plaisante, de laquelle sortoit un delicieux ruisseau d’eaue doulce, claire et argentine. Là, dessoubs belles tentes feurent les cuisines dressées, sans espargne de boys. Chascun mué de vestemens à son plaisir, feut par frere Jan la campanelle sonnée. Au son d’icelle feurent les tables dressées et promptement servies.