Chapitre Premier

qui est Prologue,

touchant les causes de ce Roxier

Pource que des choses, qui sont sceus et cogneues par experience on sçait mieulx et plus au vray parler, que de celles que on ne sçait que par ouye dire, après ce que nous avons contemplé et ramené en memoire aucunes choses, qui en nostre temps sont advenues en nostre Royaume de France, touchant le gouvernement, garde et defense d'’icelui, tant du vivant et regne de nostre feu pere de noble memoire le Roy Charles septiesme de ce nom, que dieu absolve, que du nostre; et sur ce visité et contrepesé les choses advenues au temps de nos predecesseurs Roys de France et les appendences d'iceulx precedens et subsequens et deppendences, comme les Croniques le mettent; desirant que ceulx, qui après nous viendront et regneront, especialement nostre très cher et très aymé fils Charles Daulphin de Viennois, qu'il puisse bien

proffiter, regner et triompher, en l'accroissement de nostre dit

Royaume, nous avons voulu faire rédiger et assembler en un petit volume plusieurs bons notables enseignemens servants à la garde et défense et gouvernement de un Royaume, que nous avons nommé le Rozter des Guerres et pour ce que nous avons trouvé que de nostre vivant et cognoissance ne soit rien advenu, que presque semblable autre fois n'ait été: et que la recordacion des choses passées est moult profitable, tant pour soy consoler, conseiller et conforter contre les adversités que pour esquiver les inconveniens esquelz autres sont trebuchés, et soy animer et efforcer à bien faire comme les meilleurs ; nous) vons voulu faire adjouster Croniques abregées, depuis nos predecesseurs premiers Roys de France jusques à nostre Couronnement car aussi est grant plaisir et bon passetemps reciter les choses passées, et comment et par quelle manière et en quel temps sont advenues, comme pertes et conquestes, ou reductions de villes ou de pays.