Chapitre Deuxiesme
contenant trois paraphes, du Monde, de la Mort et de l’Ame
Du Monde
La plus grant cure que homme sage doit avoir en ce monde transitoire est de son ame, qui est perpetuelle et laquelle portera la charge et le faiz des œuvres du corps, qui pourrira quant mort viendra, qui nespargne grant ne petit, noble ne villain, foible ne fort, riche ne pauvre, vieil ne jeune tout luy est esgal, et si ne donne plus de terme ne de adviz a lun que à lautre; par quoy chascun doit desirer avoir une bonne ame, et ne mettre son cueur trop au monde ne a ses biens qu il conviendra finalement laisser. Et n'est que un passage, par lequel sont passés et ou quel passeront tous les preux, tous les sages, tous les saints et tous ceulx qui de Adam et Eve sont descendus et descendront, et ne est demouré , ne demourra que le renoms de leurs faiz, de bien en benedittion, et de mal en malediction : par quoy chascun en son estat et sa vocation se
doit tellement maintenir et gouverner, que quant la trompette de retraite sonnera, dont heure est incertaine, on soit tellement pourveu, que quant on sera presenté devant le grant juge, on sache de tout rendre bon compte et reliqua.
Ce monde est comparé à un feu bien allumé, dont un petit est bon pour soy esclaire à soy conduire, mais qui trop en prent, est bruslé.
Le monde fault incontinent à celui qui trop si fie.
Le monde, qui ne vit en equité, n’est que delectation de une heure, et douleur de plusieurs jours.
Le monde enseigne ceulx, qui y demeurent par ceulx qui en departent.
Qui a grande plaisance en ce monde, 1l ne peut, qu'il n'en chée en l’une de deux choses: c’est assavoir, en non avoir ce qu il convoite, ou perdre ce qu'il a conquesté à grant peine.
Chascun s’il regarde et considere tout le temps de sa vie, 1l trouvera qu'il aura eu plus de peine que de repos en ce monde.
On ne doit aymer ce monde fors en bien faisant, car la vie de ce monde est briefve et la peine sans fin, quil conviendra porter à ceules, qui nauront bien vecu.
L'homme ne peut avoir que peine et labeur en sa vie. S'il ne mange, 1l mourra, et s 1l mange peu il devient foible, et s’il mange trop, 1l se deult et devient malade et ne peut dormir. Ainsi est chose difficile à homme de estre longuement faim.
Les estaz de ce monde et la fin sont representés par un jeu deschecs, chascun personnage est en lieu et degré qui convient à son estat tant que le jeu dure; mais quant il est fini, tout est mis au sac sans ordre ne quelque difference: ainsi est-il
de tous estaz de ce monde: tant que la vie dure, chascun tient lestat qui luy est ordonné, mais la vie finie par mort, qui separe le corps et l'ame, tous sont mis en terre ou en cer-
cueil, qui est tout un.
De Mort
La mort est legere à celui qui est certain que bien après luy en adviendra: car qui vit de bonne vie, mourra de bonne mort. |
La mort est le repos du convoiteux, car tant plus vit, tant plus se multiplient ses peines et ses convoitises, et ainsi luy est la mort plus convenable que longue vie.
La mort du mauvais donne grant repos au bon pour avoir retribution de ses biens-faiz: et au mauvais, afin qu'il ne face plus de mal ne de pechés à autruy.
Nul ne doit doubter la mort, pour le bien commun deffendre, car il y a merite. Et aussi on est tenu de combatre
pour son pays.
De l’Ame
Qui veult mourir de bonne mort, doit desirer d’avoir bonne ame.
La bonne ame est en delectation et en joye entre les bons, mais entre les mauvais elle est en tristesse: elle ayme le bien et le commande à faire; mais la mauvaise ayme le mal et si le commande à faire. La bonne ame plante le bien et son fruict est salvacion; la mauvaise plante le mal et son fruict est damnacion. La
bonne se garde et autres sont sauvées par elle; et la mauvaise perd soy mesme et autres sont perdues par elle. La bonne reçoit verité et la mauvaise reçoit mensonges, car il n’est si peu de bons enseignemens quil ne proffite à la bonne ame, et la mauvaise ne peut proffiter pour quelconques bons enseignemens que on luy face.
Qui vieult la vie de son ame, ne doit point doubter la mort du corps. Car quant ame raisonnable se convertist en nature de beste sans user de raison, Jaçoit ce quelle soit substance incorruptible, si est-elle reputée pour morte, car elle pert la vie intellective.
Tout ainsi que le commencement de nostre creation vient de dieu, devons desirer que nos ames retournent à luy en faisant si bonnes œuvres que memoire en soit en benediction perpetuelle. C’est bonne œuvre et charitable de exposer sa vie pour deffendre le bien commun qui regarde tous estaz : c’est la chose publique du Royaume, dont le pape Zacharie rescrivit aux nobles de France, qui avoient envoyé devers luy pour eulx conseiller de la cause des Roys qui de long temps avoient regné en France contens seulement de en avoir le nom. Car les maires de la maison Royal gouvernoient et menoient les guerres. ‘ Celui, dist1l, qui bien gouverne la chose publique, et qui plus y entend que à son singulier profft est digne d’être appellé Roy ”’.
