Chapitre Quatriesme

des chevaliers ordonnes pour la garde

du bien commun et quel gens on y doit eslire

Les chevaliers et les Barons sont adjoustement et multipliance du Royaume. Par eulx est la court honnorée et le Royaume gardé en ses degrez et ordonnances.

Chevalerie est une sagesse de l'ouvrage batailleux ordonné pour le bien commun : et semble que les Chevaliers aient un tel estat, en l'ouvrage de batailles, comme les maistres et les docteurs en autres sciences : Et pource nul ne doit estre reçeu à la dignité de Chevalerie, si on ne scait qu'il ayme le bien du Royaulme et du commun, et qu'il soit bon et expert en l'ouvrage batailleux et qu'il vueille, selon les commandemens du Prince, apaiser les discors du peuple, et soy combatre, pour droicture et oster à son povoir tout ce qu'il scait, qui empesche le bien commun. Et par ce peut on savoir que l'ouvrage des batailles est contenu soubz chevalerie, et chevalerie contenue soubz sagesse.

Ceste sagesse de chevalerie appartient especiallement au Roy qu'il la sache : car jaçoit que l’ouvrage et la fin des batailles et le fondement de défendre le bien commun apartiegne aux Cheva-

liers et à ceulx, à qui le Roy le vieult bailler ou commander, si appartient-il especialement au Prince, qu'il sache telles choses : C'est à savoir comment et quant il fera et gouvernera ses batailles, et comment il ostera sagement les empeschemens du bien commun.

Le commun peuple ne peut estre vaincu, quant le Roy sçait bien l’art de Chevalerie, car 1l peut faire tant de ostz, qu'il lui plaist, et de Chevaliers.

Moult est proffitable eslire sagement nouveaulx chevaliers, et leur enseigner le droit d'armes, et enforcer la discipline par le hantement cotidien, et avant soy essayer aux champs, et en sa pensée considerer et chercher toutes les choses, qui peuvent advenir en ost et en bataille, et punir les paresseux, pour donner aux autres exemple, et qu'ils se amendent, car la science de ce qui appartient à la bataille nourrist la hardiesse de la bataille.

Ne nul homme ne doit redoubter à faire ce dont 1l est certain, qu'il est parfaitement aprins : Car en l’estrif de bataille petite compagnie bien accoustumée de batailler est plustot preste d’avoir victoire, que grande multitude rude, et qui ne scait rien des armes : car elle est tousjours appareillée à la mort.

En sagement eslire au commencement est la force du Royaume, ne nul ne doit cuyder, que ce soit legier office, ne qu'il doye estre baïllé à chascun.

Quant aucun est trouvé, à qui on baille la deffense des terres et la cure des batailles, s’il est riche et noble, aussi doit-il estre sage et honneste, car honnesteté fait le sage chevalier : Et quant vergoigne luy deffent à fuir, elle luy fait vaincre ses ennemis.

Que proffite, si paresseux ét couart est bien accoustumé en armes, et qu il ait grans gages, pour demourer et longuement sejourner es logis ?

Oncques ost ne profita au temps de celuy, qui n’est pas duyt de Chevaliers eslire, car pour ce ont esté moult de gens desconfiz de leurs ennemis que leurs chevaliers estoient longuement en paiz et sans cure, et que chascun pour sa richesse, ou pour sa faveur estoient prins aux offices de gouverner le commun sans l'esprouver.

Doncques par sages hommes et par grant diligence et mure deliberacion convient il, que les Chevaliers honnestes soient esleuz.

Aucunes gens apparoit estre fors et seurs, mais quant on les esprouve, on ne y trouve pas ce que on cuydait : et pour ce doit on refuser ceulx, qui ne sont pas profitables, et mettre en lieu d’eulx bonnes personnes et proffitables, loyaux, et permables, que ne puissent estre corrompus : Car les deniers et les dons sont souvent la voye de rompre et destruire un grant ost.

Les Chevaliers doivent avoir sens, force, hardement, loyaulté et exercice de leur art.

Sens de Chevalier vault plus à la fois à avoir victoire, que ne fait multitude de gens, ne que la force de ceulx, qui se combatent. |

Chevalerie est une maniere de prudence, par quoy on fait surmonter ses ennemys par force et ceulx qui empeschent le bien commun du Royaume.

Quant on gecte dars dans la bataille, et le Chevalier par son hardement y vient courant et saillant, il esbahist la pensée

et les yeulx de son adversaire, etle navré avant qu'il se en donne garde, ne qu'il soit prest de soy deffendre,

Comme pourroit estre, que aucun peust ferir bons coups de espée, ou de hache et souvent, qui na aprins que à tenir la plume, ou le aguille ou le razouer, peu adviens sans doute.

Le loyal Chevalier n'est point corrumpable, et si aymeroit mieulx mourir, que favoriser en riens le adversaire du Royaume, ne que de faire une villaine fuyte.

Puis que Chevaliers sont ordonnés pour la garde et deffence du bien commun, s'ils sont bien paiés de leurs gages, et ce nonobstant ils vivent sur le commun, ils doivent mieulx estre appellés pillars, que chevaliers, et mesmes ceulx qui les y soustiennent.

Je ne voy que le peuple Romain ait pour nulle autre chose surmonté tout le monde fors par le hantement des armes, et par la discipline de bien ordonner les batailles, et par le usage de Chevalerie.

Mieulx vaulx que jeune homme soit blasmé, de ce que avant le temps de age il est venu en hantement de Chevalerie, qu'il fut dolent que le temps en fust passé.

Ceulx, qui sont en aucune maniere aprins aux armes, sont plus à priser, que ne sont leurs compagnons, qui ne sont aprins en art de batailles.

Des signes de fort Chevalier

Ceulx sont dignes à estre chevaliers, qui ont les yeulx esvellez, la teste droicte, la poitrine large, les espaules grandes et haultes, le bras gros et quarrez, gros coul, longz doiz, petit ventre,

les reins larges, les cuisses et les piez nerveux et dur. On ne doit point querre la grandeur de la stature, comme de la force.

Ceux redoubtent les playes et d’estre nasvrés, qui ont peu de sang.

Ceulx, qui ont moins usé de délices en leur vie, doubtent moins la mort que les délicieux.

Ceulx qui sont mieulx accoustumés aux armes combattent mieulx que ceulx qui ne le sont pas.

Entre les haulx hommes plus prisez à estre chierement aymée et gardée la discipline du hantement des armes.

Ne la noblesse de vestemens, ne les richesses d’or, ne de argent et de pierres précieuses ne font point encliner les ennemis à reverence, ne à grace, mais la paour des armes seulement les fait estre obéyssans.

Plus profitable chose est apprendre les siens à usage des armes, que louer les estrangers pour soy servir en guerre. Encore plus profitable et plus seure chose est, de bailler la garde de ses citez, villes et chasteaulx à ceulx, qui y ont leurs biens meubles et immeubles, que aux estrangiers, qui ne y ont riens, et qui ne y auroient quelque dommage ou interestz si les ennemis y entroient,

Plus soigneux est chascun de garder le sien et bien de son voisin que n'est un estranger qui rien n ya.

Si l’on baille la garde de villes et chasteaulx à ceulx, qui y ont à perdre, ils scevent bien, que s'ilz n’en font bonne garde, ils mettent en danger eulx et leur bien: par quoy 1lz ne seroient pas si corrumpables, comme les estrangiers, qui ont autant à Bruges, comme à Gand.

On a vu plus de villes perdues par les fors qui y sont et dont les estrangers ont le plus communement la garde, que par les villes.

Ceulx des villes se rendent plus subjectz, et gardent mieulx leur faulté quant ils voyent, que leur Prince se confie en eulx, car c’est signe de grant amour, qui est de telle vertu, que jamais ne vieult faire un faulx tour, |

La plus grant fermeté, que le Prince puisse plus avoir en son Royaume, est de tenir les subjectz en amour, justice et paiz, et que marchandise puisse avoir cours par tout. Car par ainsi ilz auront des biens, et tant plus luy en reviendra, et plus desireront ses subjectz, qu'il vive et regne, et ainsi le aymeront aussi les estrangers, pour la bonne renommée, qui courra de luy.

Au monde n’a plus seure chose à deffendre les choses, que estre aymé: et n'est chose plus espoventable que de estre craint, car chascun hayt ce qu'il craint.

Qui vieult estre craint, il est de necessité qu'il craigne celui ou ceulx de qui il vieult estre craint, autrement il est en peril: et qui vieult estre aymé, il fault qu'il ayme.

Des exhortations, que le Prince doit faire

en temps de guerre

Quant le prince vient à regner, s'il trouve le Royaume paisible, il en doit estre moult joyeux et en mercier dieu, et garder que en son temps il ne commence guerre, car trop y a de perilz, de peyne, de tribulacion, de dommages, de destructions de peuple, de pays, et de biens,

Et si commencer lui convient guerre: car aucunefois y a t'il entour son Royaume quelque autre puissant prince, qui en moult de manieres peut empescher la paiz et le bien de ses subjettz, et grever son Royaume, ou que soubz umbre de luy, les barons et autres subjectz du Roy ne lui soient pas obeyssans: en ce cas il doit besoigner par le commun assentement du Royaume: Car bataille. quant elle est entreprise par commune volunté, acquiert lviétoire: car si les voluntés estoient diverses, on ne y frapperoit ja coup: et en ce cas vaultdroit mieulx demourer coy, ou soy deffendre, qui seroit assailly, que plus avant entreprendre. Et si guerre estoit commencée au temps de ses antecesseurs, se feroit encores mieux, de querir paiz ou treves; car en guerre ny en plait ne y a jamais un denïier de profit.

Et si faire ne se peut, qu'il n’y ait guerre, le Prince doit requerir souvent et menu le conseil des sages, en leur remonstrant le cas, et advise que son Royaume soit bien gardé et pourveu de toutes pars de toutes choses necessaires.

Et après doit atraire en-tour luyÿ gens sages et vaillans en guerre, tant pour son conseil, que pour la conduite de la guerre.

Et puis doit requere ses amis et subjectz par lettres, par bouche, par messages, que tous soient appareillés à la guerre: et eulx venus devers luy pres de la meilleure cité qu'il ait, les doit mercier et louer de leur bon vouloir et diligence, et leur promettre des biens, et de grant courage et fier, et par paroles et contenance de guerre leur remonstrer les torts et oultrages des ennemys et les droiz du Royaume, reciter les prouesses de leurs antecesseurs, et leurs vertueuses batailles, les biens et les

honneurs, qui leur peuvent advenir par subjugant les ennemys,

et les maulx, vituperes, deshonneurs et vergongnes qui en adviendroient, si on se monstroit contre eulx vaillans et preux; et par semblables parolles et exortacions eguiser leurs courages, et Les esmouvoir à guerre et à bataille, et commander que chascun face grant appareil d'armes, de chevaulx, tentes, pavillons, et toutes choses, qui sont requises en guerre: et se doit garder de dire un foible mot, mais soit sa chere de corroux et de ire sur ses ennemys, son semblant terrible, sa voix menassable, et que son cheval hanisse et frappe les piés contre terre, et face tant que maintefois, ains qu'il ait fini les exortacions, la noyse leve et les cris entre les gens, comme s'ils fussent à la meslée.

Apres, le Prince de ses mains bailler les confanons et banieres en la plus triumphante maniere qu'il peut. Et deslors en avant luy et tous ses subjects se doivent aparailler à la guerre en telle maniere que rien ne leur faille au point de l’ost; et de la bataille, de la maniere de guider et conduire l’ost et mettre aux champs les pavillons, et garder l’ost tout environ Jour et nuit, et comme il doit establir ses eschelles et batailler et comme il doit estre en tous lieux, ores ça et ores là, et comme il doit garder son corps, qu'il ne se combate, si n’est par necessité, et comme 1l doit guetter ses villes, si aucunes sont de ses ennemys assiégees: et de maintes autres choses, qui affierent en guerre, par luy et par les sages et vaillans gens de guerre de son Royaume en pourra savoir assez mesmes ce qui sera dit et escript cy-apres.

Des signes de sage Chevalier

Sage Chevalier a voluntiers gros chief à l’advenance du corps, et rond, et bien peu en-barré selon les temples, quant

il passe vingt-cinq ans; et doit avoir les cheveulz serrés et bruns, et en sa face les doit avoir chatains ou brunz, le front hault et non pas moult, car grant front est signe de sot; et doit avoir les yeulz un peu enfoncez et s’il les à petitz c’est signe de sage malicieux.

La couleur des yeulx doit estre entre verte et noire, et doit fierement regarder et attachement à la fois.

La face ainsi comme quarrée un peu plus large que longue.

Et s’il a plus petite teste qu'il ne affiert au corps, il ne peut estre sage.

Et peu voit-on de sages, qui ayent les yeulx grans et hors de la teste saillans.

La couleur du visage doit estre sanguine, ou brune, et les autres membres respondant les uns aux autres, si comme ils doivent.

Des signes de hardy chevalier

Le hardy chevalier à communement cheveulz serrés bruns, ou noirs, fors et aspres non pas; les yeulx mouvans et esveillés : chiere levée; petites narines; la face large et quarrée, comme un lion ; le front sans rugues, couleur brune en la face, haultes espaulles et haulte poitrine et large, et s'il a petite teste et haulte poitrine 1l ne peut faillir qu'il ne soit hardy. La poitrine velue et dessoubz les esselles, et s’il est velu sur les coustez, tout est-ce plus grant signe de hardement: les reins larges et petit ventre, grosses vaines, grosse chair et dur cuir, et l'estature droicte.

Mais en froides regions tous les hardys ou peu s'en fault ont la chair et le cuir veluz.

Le hardy doit estre appert et isnel et aller fierement et legierement quand il vieult et doit avoir gresles cuisses et les piés et jambes un peu courbes, et estre bien en fourchant et avoir durs os et fors, et durs nerfs et gros, et ses membres à petit de char, et doit avoir grosse voix.

Chevalier frilleux n'est pas profitable à ost, ne à guerre, ne celluy qui a les cheveulx moulz et l’estature courbe, et les yeulz foibles, et qui a les mains et les piés subtils et maigres, et dont le regard est semblant à homme triste ; et qui a les yeulx grans, c’est signe de paresseux: et celluy, dont la prunelle de l'œil participe est moult de noir est paoureux ; et celuy qui a la face charnue est paresseux et fol; et qui a la face tres petite, il est cault, flateur et mauvais, et s’il a le col gresle, il est fol, jangleux

et paouTreux.

Des choses qui sont necessaires, et qui conviennent aux Chevaliers

Il est necessaire aux Chevaliers, qu'ilz aient pour chief un homme prudent et loyal d'autorité et noble et qui leur soit agreable et qui soit adverty et sage en chevalerie, si que les chevaliers et les barons ne puissent estre corrompus par deniers ou par dons.

À tout bon homme de guerre convient qu'il puisse soustenir grant faix, si besoingest, et grant travail de corps, pour aller et venir à pié et à cheval armé, et desarmé ainsi que mestier fera, et soy mouvoir legierement et prestement, soy passer à peu boire et peu manger et n'ait cure de gesir ayse et que pour le bien du

pays defendre il prise peu sa vie, et qu'il ne doubte point à espendre son sang et qu'il soit habile de ses membres et bien enseigné et qu'il sache courir et ferir, et ozer assaillir aultruy et luy tenir pié ferme et ne s'en esbahisse neant plus, que s'il estoit seur de en avoir le dessuz et la victoire, et qu'il ait honte de fuir maulvaisemeut.

Ceulx qui fuyent sont plus à reprendre, que ceulx qui ne comparent à la bataille mesmement quant ceulx qui ne comparent sauront bien qu'ils n'auront pas le cueur ni le pouvoir d'y proffiter et qui plus seront de nombre que daide. Qui fait aller en guerre et en bataille ceulx, qui ne y valent rien, ne qui en l'art batailleux ne sont aprins et esprovés, quiert plus sa des confiture, que sa vidoire: car un peu de gens bien aprins se tiennent mieulx en ordre, et est plus aisez à conduire et à faire ce que l’on veult que d’une multitude rude, qui oncques ne fut en guerre et qui ne sçait rien de guerre. Et qui pis est, la multitude empesche les aultres tant de logis que de vitailles, que aussi de bien ouvrer et garder secret ce que on doit faire, et si ne sont Jamais d'accord ensemble. Que si ceulx de pié et ceulx de cheval, posé qu'ils soient tous bien duiz et bien aprinz du fait de guerre et de bataille et ne peuvent que à bien grant peine estre d'accord ensemble, par plus forte raison ceulx, qui n'y scavent rien s'accordent moins avecques les maistres dudit art. Car ce n'est pas toute la force d'y avoir bon vouloir, et de bien fraper et ruer bons coups, mais tout gist, à entendre ce que l’on doit faire, et de secourir aux inconveniens, qui peuvent sourvenir, et qui ne peut estre fait, sinon par ceulx qui en celuy art sont habilles, rusés et asseurés.

Si les maistres de cet art ont despit dela compaignée de ceulx, qui rien n’y sçavent, ce n'est pas merveille, car leur vie et le danger de leurs biens et honneurs y gisent.

Et nous voyons aux autres arts qui ne sont si dangereux, que les maistres ont en despit ceulx, qui se entremetent, especiallement quant ilz besoignent ensemble, pource que leur honneur y pend et leur gaing et leur perte.