Chapitre Cinquiesme
des choses qui conviennent a Prince
Le Prince doit diligentement enquerir des meurs et des pensées de ses gens d'armes, et quant il aperçoit chose, qui ne apartient, il doit oster celluy, et appeller les autres, et leur monstrer comment il les a bien pourvuz et fait leur profit en ostant celuy qui n'estoit pas souffisant.
Il convient que le Prince soit traitable et courtois, et qu'il n'ait pas les uns en despit pour les autres.
Le Prince ne doit pas hanter, ne essaier les batailles en sa propre personne, ne soy appliquer en ce, ou les présomptueux et les hardys s'esbatent, ne estre ententif à leurs assemblées.
Toute sa cure et sa pourveance soit, d’estre bien garny d'armes et d'artillerie et de vitailles, et d’autres choses necessaires pour son ost et de bonnes gens seurs et loyaulx, pour la garde de sa personne. Car quant le pasteur a quelconque inconvenient, ses ouailles se desrompent et sont en peril. Il affiert bien que le
Prince sache assez et moult de bonnes choses, car sa sainteté, et les biens qu'il fait et qu'il sçait, proffitent à tout son pays; Aussi toute son entente et son effort et sa durableté doit estre en soy faire valoir.
Le bon prince doit prendre fierté et hardement de juger par droictture, autorité et sagesse et de venger tous les meffaiz des chevaliers et ne pardonner à nul son meffait quant il touche plusieurs, Et enquerir en divers lieux et en diverses causes le meffait de chascun .
Le prince doit tenir en amour et en paix ses chevaliers et les compagnons avec tous ses subjectz car nulle maison tant soit petite ne peut estre desconfiste du tout si elle mesme ne se gaste par ses discors proprement.
Comme se soit un grant proffit en ost que les chevaliers soient d'un accord et qu'ils obeissent à un commandement ceulx ne peuvent les commandemens accomplir qui par avant ne furent oncques d'accord ensemble.
Qui desire à vivre en paiz face qu'il soit apparaïllé pour batailler et qu'il convoite avoir victoire: face enseigner ses chevaliers diligentement. Qui vieult venir à bonne fin de sa bataille, combate soy par art, non pas par aventure.
Nul sage homme ne se doit mouvoir ne courroucer à celuy qu'il scet estre plus sage que luy en bataille.
Quelles possessions ni quelles richesses peut-on seurement garder fors par deffense des armes?
Nul n'est si hardy, qui osé rien faire, ne injurier au Royaume, s'il congnaist estre prest pour soy deffendre et vengér ses tors faiz.
On ne doit point batailler pour bataïller mais pour avoir paix.
Quant les humeurs superabondent en corps humain, tant que le corps est malade et en dangier, les potions et les seignements sont necessaires pour la santé du corps. Aussi doit on désoler et occire par batailles les ennemys, par qui le commun bien est empesché et la paiz du Royaume. Les Princes doivent tout ordonner au bien commun et a la paix du peuple pour celle paix pardurable obtenue que dieu promet à ceulx qui la desservent.
Comme le Prince peut ordonner ses gens pour en avoir prestement et a toute heure tel nombre qu il luy plaira
Si le Prince avoit quatre principaulx lieutenans et que soubz chascun eust dix vicaires, et soubz chascun vicaire eust dix capitaines, et soubz chascun capitaine dix dizieniers, et soubz chascun dizienier dix hommes, tout nombré quarante mille combatans se trouveront.
Et quant il auroit mestier de dix mille hommes, il ne conviendroit faire venir que l’un de ses quatre lieutenans, et ceulx dessoubz luy; et s’il n'avait besoing que de mille combatans, il feroit venir un de ses vicaires et ceulx de dessoubz luy; et s'il ne vouloit que cent, il feroit venir seulement un des capitaines avecques ceulx de dessoubz luy : et ainsi seroit le Prince allegé, et ne feroit si grans despens.
Il est necessaire au Prince de veiller à toute heure, à ce qu'il doit faire, et ne doit pas estre ignorant de congnoistre la
condicion de ceulx qui sont pres et de ceulx qui sont loing tant des siens comme de ses ennemys, et quant ilz sont en nombre et quelles gens ilz ont, et envoyer les espies seurs et. loyaulx en
l’ost de ses ennemys.
