Chapitre Sixiesme
comment l’ost doit estre conduit
Apres que le Prince a ordonné de ses batailles, et de leur conduite, et de vitailles, engins courans et de artillerie necessaires, et des conduiteurs d'icelles, il doit le plus qu'il peut les faire marcher et tirer sur le pays des adversaires et le sien soulager et faire voix horribles et grans noyses en prenant les logis et en joignant ses adversaires, car c'est la vertu de la force et la durableté du propos de ceulx, qui sont avecques luy, et la paour et le despartement de ses ennemys, et ne doit point mettre ses herbarges fors en bien pres de la montagne ou d’eaue.
Le Prince, s'il peut, doit faire qu'il soit au plus hault lieu là où il se doit combatre à ses ennemys, car quant ses gens verront qu il s’est ainsi pourveu, 1lz s'en combatront plus fierement et plus efforcement. Et lors se doit garder de trahyson en especial quant il verra aucuns des siens vaciller, car quant ilz vacillent pour paour de leurs personnes, ce n’est pas si grant peril, comme quand ils vacillent pour quelque trahyson machinée.
Et si le Prince voit, que aucuns des parties de ses ennemys
vacillént. il doit adresser sés eschelles et sa bataille contre celle partie et doit admonester sa gent à perseverer et à bien faire, car c'est des principalles choses pour acquerir victoire; et doit le Prince avoir en son ost aucuns lieux determinés et aparaillés, où ses Chevaliers seront secourus de boyre et d’autres choses necessaires pour mieulx garder sa gent.
Toutes les ententes et œuvres du Prince doivent estre en soubtilettez, cautelles et agais, pour decevoir ses ennemys: et faindre vouloir faire par une maniere, et faire par une autre, que nul ne sache rien de son entente, tant en bataille que en assaulx de villes, ou en passages d’eaue ou d’estrois, ou en, course faire, en semblables entreprinses.
En bataille on ne doit point estre trop esparty, afin que l'on ne soit tost percé de ses ennemys, et si ne doit l’en estre trop serré, afin que l’un empesche l’autre à ferir.
Bataille est la plus perilleuse chose qui soit du monde, et pour ce ne peut-on estre trop sage en guerre, ni ne peut avoir trop soubtil sens, Car quant on a à faire en aucune autre chose, et on y erre, on le peut bien amender après, mais quant on a mesprins en bataille, on ne la peut amender. Ainçois tantost l'en la peine, qui ensuit ce que on à erré: car qui combat, quant il erre, ou 1l est tantost occis, ou il s'enfuit; par quoy il demeure si paoureux, qu'il ne ose depuis assaillir celuy, pour qui il a fuy, sinon à peine.
Ce que on doit considerer avant la bataille
Avant que l’on face bataille, communement on doit regarder douze choses.
Premierement, le nombre de ceulx, auxquels on se doit combatre.
Secondement, s'ils sont usitez d'armes et de guerre.
Tiercement, s'ils sont moulz de cueur.
Quartement, s'ils sont de durs corps et fors de membres.
Quintement, s'ils sont sages et advisés et de un accord.
Sixtement, s'ils sont plus hardys et mieulx hommes de cueur, c'est à dyre s'ils feroient une maulvaise fuite et villaine.
Septiesmement, s'ils ont plus et de meilleurs chevaux.
Huictiesmement, s'ils ont plus d’armeures et de habillemens et de ordonnance de guerre.
Neufviesmement, s'ils ont plus de vitailles ou moins.
Dixiesmement, s'ils ont le plus haut lieu ou non.
Unziesmement, s'ils ont le Souleil et le vent pour eulx ou contre eulx.
Douxiesmement, lesquels attendent plus de aide.
Comme on doit conduire son ost sainement et de ranger bataille
Le Duc, qui vieult mener sainement son ost en aucun lieu, doit tousjours regarder en son cueur huict choses.
La premiere, qu'il ait et preigne en escript les chemins et les pas d'iceulx et par où l’on y peut aller plus court et plus seurement, et quels dangiers y peut avoir et des remedes à l'encontre.
La seconde, qu'il doit avoir meneurs et guides, qui sachent les voyes et preigne garde à eulx, qu'ils ne facent trayson, et en ce cas les menacer à mort, et leur prometre moult de biens, s’ils les mainent bien.
La troisiesme, qu'il doit avoir conseilliers bons et loyaulx, usités et acoustumés d'armes et de bataille.
La quatriesme, que on ne sache où il vieult aller: et de tant comme il tient son conseil plus estroit et plus secret, de tant en vault il mieux, et en vient on plus tost à ce a quoy on veult.
La quinte, qu'il doit avoir coureurs et chevaucheurs bien montés et loyaulx en chacune bataille.
La sixiesme, qu'il doit avoir et mettre les meilleurs de ses gens de guerre en celle partie, où l’en doubte plus de peril.
La septiesme, que tout l’ost doit aller rengé et bien ordonné par batailles et bonne ordonnance, si que si les ennemys viennent, qu'ils les trouvent tousjours apareillez de combatre.
La huictiesme, qu'il doit regarder desquelz il a plus, ou de ceulx à pié ou de cheval, et esquels est la plus grant force de son ost: Car ceulx de pié se combatent mieulx es boys et montagnes que aux plains champs et selon ce qu'ils valent mieulx, doit il eslire a aller ou par bois ou par montaignes,
ou aller par la plaine voye.
De ranger bataille
Pour ranger bataille on en treuve cinq manieres.
La premiere, longue et estroite, comme une ligne, laquelle ne vaut rien, sinon pour deffendre aucun port.
La seconde est quarrée qui est la pire.
La tierce est en maniere de fourche.
La quarte est en maniere de escu.
La quinte, ronde comme un cercle, mais laquelle soit la meilleure, on s’en raporte aux experimenteurs, combien que la
premiere face il semble que celle, qui est en maniere de fourche soit la meilleure: mais encores pour en bien juger, fault-il considerer le fait de l'artillerie d'une part et de l’autre.
Comment le Prince saura de quoy ses ennemys sont plus forts
Le Prince doit savoir, que sept choses sont, par quoy ennemys doivent estre plus fors.
La premiere, quant ilz sont bien rangez en bataille, jouxte la maniere que l’on vieult tenir, et selon l'artillerie et les gens de guerre que on a et ceulx de son adversaire.
Le seconde est, quant le lieu leur est proffitable.
La tierce, quant les ennemys ont le temps pour eulx, et le vent et la pluye et le Souleil à leur advantage et contre soy.
La quarte, quant ils scavent la venue de leurs adversaires avant le coup.
La cinquiesme, quant 1l sont reposés et repeuz.
La sixiesme, s'ils ont concorde et amour entre eulx.
La septiesme, si l’on scait peu, ou neant de leur convenue.
Quant on doit assaillir ses ennemys
Le Prince doit assaillir ses ennemys, quant ilz sont esparpillez ou lassez de cheminer et en passages d’eaue, et es destroitz, ou occupés en terres palueuzes, ou à monter montaignes, et quant ils ont le Souleil, la pouldre, et le vent contre eulx, ou quant ils dorment, ou repaissent, et quant ses gens auront mangé et repeu par ralson, et reposé.
Un peu manger avant la bataille est bon car quant on est trop emply de viandes, les playes qu'on reçoit sont plus perilleuses.
Des regles de batailles
En toutes batailles la condition de la fin est telle: Tu doys tousjours faire ce que est convenable à toy, et nuisible à ton adversaire, et penser que ce qui luy ayde, te nuist tousjours.
Nous ne devons nulle fois faire ne monstrer semblant de chose, qui plaise à nostre ennemy, ny chose qui soit à sa volunté, mais seulement devons faire ce que nous cuidons qui nous soit profitable, et a luy contraire et desplaisir.
Car si tu fais pour toy ce qu'il a fait pour soy, tu commences à estre contre toy, et aussi s’il vieult faire pour soy, ce que tu as fait pour toy, ce sera contre luy en la bataille.
Celuy, qui plus veillera et plus labourera pour soy acoustumer aux armes, soit champestre ou autre, moins de peril y aura.
Qui trouveras-tu qui puisse apprendre à autre, ce qu il ne aprint oncques luy-mesmes ?
Qui croyra ja, que celuy soit hardy Chevalier, qui par sa negligence laisse ses armes tachées de roille ne de ordure.
Ainsi comme le bon Chevalier est bien acoustumé, convoite la bataille, aussi la redoubte celuy, qui n'en est pas duit.
Ost ne proffita oncques au temps de céluy, qui ne congneust ne oncques esprouva ses Chevaliers avant.
Moult de Chevaliers sont, qui par apparence semblent estre
fort enhardiz, mais quant on les esprouve avant, ils ne sont pas trouvez souffsans.
Chevalier doit estre plus prest à faire ce que on luy commande, que de respondre,
Cil, qui s'enfuit une fois par paour, est certain qu'il redoubte les batailles.
Il n'est rien, qui tant griefve un ost, que lacheté de courage de son chevetain.
Tu ne dois jamais mener Chevalier en bataille, si par avant ne les as esprouvés.
Sagesse garde attrempance en gouvernement et est profitable es conseils des batailles.
Gens d'armes de l’ost, quant ils sont en chemin ou en bataille, doivent garder l’ordre d'aller : qu'ils aillent hastivement et esgallement et qu'1lz en soient duitz: car l'ost divisé et mal ordonné aucunefois est en peril de soustenir grant dommage par ses ennemys.
Ceulx, qui sont armez, combatent mieulx, que ceulx qui ne le sont point.
La resplendeur des armes donne moult grant paour aux ennemys.
Nul ne craint la noyse ne la presse, qui est bien seur de sa force et de son art.
I n'est rien, qui tant soit profitable pour acquerir victoire, comme de obéir aux admonestations des enseignes.
Profitable chose est, de accoustumer en temps de paiz, ce que on doit savoir es confusions des batailles.
Moult plus de peril a l’ost en chemin que en la bataille.
Celuy est encusé et trahi par soy-mesme de qui son espie est prins de ses ennemys. |
On ne peut communement avoir paour de ce que paravant on est pourveu.
Quant les uns sont alléz trop avant, et assault leur sourvient, ilz ne desirent pas tant à retourner que comme à fuir. Et ceulx de derriere, desquelz les autres se sont departis, se desesperent et sont desconfiz pour la force de leurs ennemys.
Nul nese doit desesperer si les choses peuvent estre faites, qui autrefois ont été faites.
Plans legiure chose est enseigner les nouveaulx Chevaliers, et leur aprendre les œuvres de vertus, que rappareiller ceulx, qui ja ont acoustumé de tousjours fuir.
Usage de bien sagement ordonner, bonne doctrine de sagement batailler, et conseil de bien gouverner, donnent au prince victoire sur ses ennemys.
Si tu es bien appareillé, prest et ordonné, et sourprens ton adversaire qui encores n'a pas ordonné ses batailles, 1l se doubte et trouble, et c’est grant partie de ta victoire, que tu troubles tes ennemys avant que tu te combates.
Mieult vault vaincre ses ennemys par mesaise et par survenues ou par paour, que par vertu.
Nuls conseils ne sont meilleurs, que ceulx, que ton adversaire ne peut savoir, avant que tu les faces.
En guerre nulle chose n'est si profftable pour toy garder et pour ton ennemy nuyre., comme cognoistre l’estat et la condicion de ton ennemy, et pour ce nul ne fait si convenables
despens, comme en loyal et sage espie, ou en fauxit fuitif, qui (®]
fait semblant de s'en fuir et ne le fait pas.
Laide chose semble que Chevalier du Roy qui vit des gaiges et de la livraison du commun entende plus aux proffits privez.
On doit tousjours garder en paix et en amour tous ceulx des compagnies soient à pié ou à cheval, car par nature ceulx de cheval souvent discordent à ceulx de pié.
En bataille de necessité tousjours se doit-on mouvoir et adviser.
Si la doctrine des armes est mise en oubly, il ne y a nulle difference entre paisans et Chevaliers,
Les sages hommes en armes ont consideré que mieulx vault et plus profite à la seureté des Chevaliers le hantement des armes et des choses qui appartiennent à Chevaliers que les phisiciens ne font.
Quel proffit a le Prince, quant ses gens d'armes et soldoyers bien paiez de leur gages vivent sur le commun en diminucion de sa revenue ?
Les ducz, qui ont ost qui par coustume et par usage sont assurez à atrempance, sont plus à louer que ceulx, à qui les Chevaliers sont obeissans par crainte et par paour de tourmens.
Qnant le guet des ennemys est aperceu, 1ls soustiennent plus de peril, qu'ils n’avoient appareillé à faire.
Les ennemys ne osent plus bonnement aprocher aux lieux, où ils sentent, que leurs ennemys demeurent devant et derriere.
En bataille doit-on regarder-quelle partie cuide plutost avoir victoire et pourquoy, car par telles pensées croist la force et la vertu, ou elle en apetisse.
Par l’admonestement du bon duc, quant il semble qu'il ne doubte rien, la hardiesse et le courage croist moult à ceulx qui se desesperent. On doit premierement essayer les choses, que quant sont mal faites portent peu de mal, et quant sont bien faites portent grant proft.
Ne te fie pas en ce si les nouveaulx Chevaliers convoitent la bataille, car bataille est doulce à ceulx, qui oncques ne le essaierent: et moult de fois advient, que celluy, qui pour cause de son honneur requiert de bouche bataille, pense plus en son courage de fouir, que d'accorder la bataille.
La maniere des folz est crier de loing, et pour ce ne doit-on point crier devant que les batailles se joignent.
Souvent advient que le hardy regard et la fermeté des hommes confont les pensées des ennemys.
Coustume peult plus aider en bataille, que vertus. Grant seureté est de atraire et recevoir aucun des ennemys quant 1lz se viennent rendre en loyauté, car plus lassent et griefvent les fuitifs leurs adversaires, que ceulx, qui sont occis.
Mieulx vault apres la bataille garder plusieurs aides, que espandre ses Chevaliers trop largement.
À peine peut-il estre vaincu, qui cognoist veritablement la force de ses gens et de ses adversaires.
Vertu aide plus que ne fait multitude: aucunefois aide plus le lieu, que la vertu.
Art et sagesse vault plus que puissance: car aucunefois advient, qui pour monstrer ses bannieres ou sa gent par bon ordre, peu de gens ont souvent espouventez leurs ennemys ou chassez ou fait fuir,
Ost profite par labourer et travailler et devient paresseux par estre Oyseux.
Nature crée peu de fors hommes, mais par bonne doctrine plusieurs sont plus forts que par vertu corporelle.
De tant que fust vault mieulx que escorce, vault mieulx soubtilleté, que force.
Ne maine nulle fois en bataille chevalier, si auparavant il ne a esperance de avoir victoire.
Choses soudaines espouvantent les ennemys, et celles qui sont accoustumées sont mises en despit.
Celuy, qui a ses gens espandus et suit ses ennemys follement.
il leur vieult donner la victoire qu'il avait acquise.
De multitude de ost
Grant multitude en assembler de bataille, peu de gens bien advisés font plus d'avoir victoire, que grant multitude rude et sans enseignement, car elle est tousjours preste et habandonnée à mort.
En toutes batailles nulle multitude ne profite tant comme fait vertu.
Nul ne se doit fier de multitude de gens, ne de puissance ne nul ne doit son ennemy despiter : ne nul ne se doit orgueillir en soy laisser à pourvoir quelque bonne adventure qui luy adviegne, ni la pensée humaine ne s’endoit point plus haut eslever. Ainsi doit au commencement penser, quelle pourra estre la fin de la bataille, et que moult de fois ont été vuz ceulx vaincus, qui cuydoient avoir victoire.
Grant multitude en ost est plus tost desconfite par son
oppression et par ce que trop en ÿ a, que par la propre vertu des ennemys: Car grant multitude chiet en grant peril pour sa pesanture : Car elle est tousjours plus tardive, et quant il ya longue queue, 1l advient souvent que leurs ennemys qui, sont peu de gens, les assaillent par derriere et leur donnent à souffrir. Et quant 1lz viennent aux aspres lieux ou pour passer eaues ils sont souveut deceuz pour la demourance. Et aussi quant l'ost est trop grant, 1lz trouvent plus à peine de victailles et c'est de quoy est le plus grant besoing de quoy on se doit mieulx prendre garde. Car combien que a grant cure l’on quiere victailles, faillent plus tost quant elles sont departies à plusieurs. Et s’il convient par adventure que l'ost s’en fuye, force est que plusieurs en y meurent de celle multitude, Et ceulx qui s'en fuyent seront si espoventez a celle fois qu'ils craindront a tousjours maiz bataille.
De necessité de victailles
Il est souvent advenu que l'ost à esté plus gasté par le deffault des viélailles que par armes car faim est plus cruelle chose que fer. :
Souvent advient que le besoing est au double plus grant qu'on ne cuyde et le siege ou le sejour de l'ost plus long.
Les adversaires ne cessent dessayer les familleux mesmement quant ils esperent que par la faim les surmonteront et vaincront.
C'est tardive espargne de garder les garnisons quant 1lz defailent Car tardive est l’espargne quant tour est despendu.
Grant sens est contraindre son ennemy plus par faim que par fer. Aussi comme la raison du profit et le delict admoneste a labourer et cultiver les champs ce ne seroit pas grant profit de
recueillir moult de biens, si des le commencement on ne prenoit garde à les mettre en lieu seur, si que au besoing 1lz peussent raisonnablement estre departis par sages hommes au profit du commun.
Ceulx ne perirent oncques par famine qui myrent en bonne garde sans gaster les biens quant 1lz en eurent grant habondance.
Ceulx qui ne font garnison de vitailles avant que le besoing en soit sont vaincus sans fer. Moult se doit-on garder curieusement que mesaise de boyre et de manger ne sourde, Car il n'est art qui puisse à tel mal secourir.
On doit moult garder que nul ne change son ordre en temps qu'on doit batailler ne que lun s’en voise de lieu en lautre Car tantost lieue noyse et confusion, et quant les ennemys voient desordonnez et desrangez 1ls sy combatent plus legierement.
Les dames du Capitole de Rome couperent leurs cheveulx pour rappareiller les engins de guerre comme arbalestres et autres artilleries en deffault de nerfz. Car elles aymoient mieulx vivre franchement avecques leurs mariz et avoir les chiefs desaornés que d'estre parfaitement cointes et estre en servage de leurs ennemys.
Tout bon peuple au besoing ne doit rien espargner, mais tous ses biens eslargir et habandonner pour le pays defendre. Car il vault mieulx a peu de biens vivre en paix avecques son seigneur naturel que à grans biens en servage de ses ennemys car en la fin ny à que cruauté et malles hontes. Et neantmoins les chiefz de guerre doivent bien prendre garde et defendre que l'on ne face le gast des biens du peuple pour le besoing qui en pourroit advenir.
Celluy qui a plus gens et plus fors se doit combatre a front quarre qui est la premiere maniere de bataille.
Qui pense qu'il n'ait pas suffisamment gens contre ses ennemys assaillent par sa dextre corne la senestre de son adversaire qui est la seconde maniere.
Celluy qui scait que la senestre esle de sa gent est moult forte, assaille par icelle esle la dextre esle de son ennemy, qui est la tierce maniere.
Qui a bons chevaliers et bien accoustumez en ses deux cornes, 1l doit commencer sa bataille esgalement, qui est la quarte maniere. |
Qui a bonnes gens à pié envahisse lune corne et lautre de ses ennemys. C'est qu'il mette les legiers armes devant Ja bataille, qui est la cinquiesme maniere.
Celuy qui ne se fie pas au nombre de sa gent ne en leur vertu, s'1l se combat, assaille de sa dextre esle la senestre de ses ennemys, et estende ses autres gens au loing ainsi comme une lance, qui est la sixiesme maniere.
Celluy qui sçait qu'il a moins de gens et plus foibles que ses ennemys face qu'il ait d’un costé aucune ayde ou de montaigne ou de mer ou de cité ou eaue ou tertre ou haye ou semblable garde de deffence, qui est la septiesme maniere. |
Celluy qui se fie plus en ses gens à cheval doit querir les plus convenables lieux pour chevaucheurs el doit plus mener la besoigne par ceulx de cheval.
Celluy qui se fie plus aux gens de pié doit querir lieux convenables aux gens ne pié et face plus ses besoignes par ceulx
de pié.
Quant on doubte que l'espie de ses ennemys ne sembaste et tapisse es tentes, on doit commander et faire secretement sçavoir que tous voisent par Jour en Îeurs pavillons et tantost 1l sera congneu et prins.
Garde que tes ennemys ne sachent par quelle maniere tu te dois combatre siique par nul remede ilz puissent venir encontre.
Quant tu sçauras que tes ennemys sçavent ton conseil, il te convient muer l'ordonnance que tu avoyes faicte.
Prens conseil à plusieurs de ce qu'est à faire, et de ce que tu vouldras faire parle à peu de gens et loyaulx, ou tu le tiengnes en toy. |
Paour et peine chastient tes chevaliers en leurs hostelz. Mais en l'ost l'esperance et le loyer les font meilleurs.
Les bons ducz ne se combatent pas en bataille comme fors par aucune bonne achoison ou par grande necessité.
Se es autres choses que en guerre où bataille a une chose mal faicte, bien peult estre apres amendée. Mais le meffait de bataille ne peult estre amendé Car la peyne ensuyt tantost le meffait Car ceulx qui fainttement ou follement se combatent perissent tantost ou ils s'enfuyent et n'osent estre pareilz à ceulx qui les vainquent.
Les beaulx faiz qui sont faiz par la force des gens ne durent fors que tant que ceulx vivent qui les firent. Mais ce qui est mis en escript pour le proffhit commun est pardurable.
Ce ne profñte pas seulement à ceulx qui sont ores mais à ceulx qui viendront, si par la pourveance de la magesté Royal la
force des armes anciennes est rapareillée et la nonchallance de noz antecesseurs amendée.
Mainteflois est advenu que semblance de faulce paix et de faulce marchandise ou quelque triefves ont esté moult nuysibles à ceulx qui les croyent plus que les armes.
De fuyte
On ne doit point estouper aux ennemys la voye par où ils se puissent fuyr. Car quant paour a accordé les courages de tous pour tourner en fuyte, quant ils voyent la voye ouverte.et ils s'en fuyent. Maint y sont occis et decouppez comme bestes ne nul peril advient à ceulx qui les suivent. Car ceulx qui sont vaincus ont destourné les armes dont ils se doivent deffendre: Et en ceste maniere, de tant que la multitude est plus grande, de tant est elle plus legierement desconfite ; ne là ne doit on faire nulle force du nombre.
Quant un courage est une fois espoventé, il ne desire pas tant à eschiver les dards de ses ennemys comme à ne les non veoir au visage.
Par layde desesperance hardiesse croyst à ceulx qui sont enclos. Et quant nul ne se fie de soy et esperance fault du tout paour reprend ses armes et voulentiers veult mourir avec autres qu 1l sçait qui sans doubte doivent mourir.
Qui s'en va de bataille avant ce quelle assemble 1l appetisse la bonne fiance de sa gent et croist la hardiesse des ennemys.
Ceulx sont appareillez à la fuyte qui sçaivent que leur duc est desesperé. ;
Il n'est chose plus perilleuse à ceulx qui follement chassent que soy embastre en lieu où il y ait agaiz ou en lieu que ses adversaires ayent pourpris. À
Moult de fois est advenu que puisque la bataille a esté desconfite ceulx qui estoient desconfitz et chassez reprenoient leurs forces se rallyoient et retournoient contre ceulx qui les chassoient et les broyent quant 1ls veoient qu'ilz estoient espartis.
Celluy est le plus fort qui ne se desconforte point pour adversité ne s'esbaudit par gaing.
Plus grant peril ne peult advenir aux gens quant 1lz s’es- Jouyssent que quant la fierté qu'ilz ont montrée tourne en paour.
Ceulx qui convoitent assaillir les murs et -habandonner leurs gens font double paour pour leur espouventable appareil à ceulx qui sont enclos, et par les grants cris des hommes et des trompettes en esperance que ceulx du lieu se rendent.
out ainsi comme saige pourveance deffent et garde de peril ceulx qui sont curieux ainsi negligence met à mort ceulx qui de soy ne curent.
Ceulx qui sont ruez par terre perdent l’impetuosité et la force de batailler. |
De batailles par mer
En batailles qui se font sur mer ou en passaiges de eaues, qui ne scait nager 1l n'est pas en peril pour son ennemy seulement mais en peril de l’eaue. Et pourtant il est convenable d'apprendre soy et son cheval à nager.
Quelle chose peult estre plus cruelle que bataille par eaue où les gens sont ars et noyez.
Souvent est advenu que par tempestes et par flos plus de nefz ont esté perdues ou plus grevées, que par la force des ennemys.
A peine souffre celluy nul peril, qut regarde la nature des vents.
En bataille par mer est bon gecter dedans les vaisseaulx des adversaires pos de terre plains de gresse et d'uylles affin qu'ilz ne puissent tenir pié ferme, pos de terre aussi plains de chaulx pour leur empescher la veue et autres choses qui sont assez
communes.
