PAULA

20. Apprès ces choses, retournasmes en galée sur mer, le dimenche .xxix^. jour d'aoust ^, pour passer la mer. Et le lundi matin nous partismes du port de Venise; sy arrivasmes a Paula, qui est a cent .m. oultre Venise, le mardi ensuivant, darrien jour d'aoust.

21. Paula est cité assés bonne; mais elle fut jadis meilleur, car elle fut destruicte pour le temps de la guerre des Genevois et des Veniciens. Et dehors la cité, devers la terre , a une tresbelle fonteine d'eaue doulce devant laquelle a ung tournoyement , par lequel appert bien qu'il fut jadis moult bel et fait de grant richesses et seignorie. Et le fist faire Rolant, si comme l'en dit, et encore l'appellent aujourd'uy le palaix Rolant. Et dehors ledit palaix , vers la marine, a moult grant quantité de monumens de pierre entaillée couvers, et sont sur terre : et y en peut bien avoir environ .iiij*^.; et dedens les aucuns voit l'en les os des chrestiens qui illec furent mis après une grande desconfiture que mescreans y firent. Plusieurs y a desdits monumens que l'en ne peut veoir dedans, car ilz sont trop