LA PUCELLE

En ce temps-là fut bruit d'une pucelle ès marches de Barrois, nommée Jeanne d'Arc, natifve d'un village près de Vaucouleur, nommé Domrémy, près d'un autre dit Gras, et de parens de moyenne fortune, nourrie aux champs et accoustumée à mener les bestes paistre. De ceste-cy se voulut Dieu servir pour la délivrance tant de la ville d'Orléans, que du royaume de France, afin que puis après on ne dit que le conseil et sagesse des hommes auroit fait ce qui dépend de la seule et manifeste puissance de celui qui ouvre grandes choses par ses créatures les plus viles et moins fortes, et qui a souvent mis le salut de son peuple en la main d'une simple femmelette. Ceste jeune fille, agée d'environ dix-huit ans, simple, modeste et craignant Dieu, eut plusieurs révélations, ainsi que tousjours elle confessa et maintint, tant par le ministère des anges que des sainctes vierges Catherine et Marguerite, par lesquelles elle estoit exhortée à faire une entreprise aultre que la vocation qu'elle suivoit, et d'aller vers le roy de France; d'autant que Dieu l'avoit ordonnée pour celle qui délivreroit le royaume, osteroit le siége des Anglois de devant Orléans, et feroil sacrer le roi à Rheims, en despit de toute la puissance angloise. Avec celte asseurance, elle s'adressa, bien que contre la volonté de ses parens, à Robert de Baudricourt, gouverneur lors pour le roy à Vaucouleur, afin qu’il la conduisit au roy et l'acoutrast en homme; car c'est en cest équipage, disoit-elle, que les saincls l'avoient admonestée de se présenter à la majesté de son prince, auquel elle avoit charge de dire que Dieu estoit celuy par qui elle estoit envoyée pour le secourir et restablir son royaume, et lui révéler choses si secreltes qu’il cognoistroit par là que Dieu, et non autre, estoit chef de ceste sienne entreprise. Le seigneur de Baudricourt oyant ce langage fut estonné, et estimoit que quelque humeur mélancolique faisoit extravaguer ceste fille, qui, outre le sexe qui est sans force ny adresse, estoit pauvre, simple, sans expérience, et issue de bas lieu, n’en tint aussi compte ; mais quand il veit l'instance de ses poursuites, et qu'elle conti-