ES TT

venante de trente, par serment par elle presté ad Sancta deppose par maniere d'ampliation de sa precedente depposition que pendant le passeage des trouppes ennemies, sont trois ans, ravagantes par ce pays, elle fust prins ez bois de Vandoncourt où qu'elle s'estoit cachée, et ramenée en son leogis par ung gentilhomme franceois, où qu'estoyent trois grands seigneurs, l’ung desquelz estoit grand, linge et portant une grande emplastre noire à la jouhe dextre, que l’on disoit estre le duc de Guise, l'autre estoit ung pou plus petit, touttefois plus gras et noir, que se nommoit le duc du Mainne, selon que l'y fust donné à entendre, et le troisiesme estoit le marquis du Pont. Quelque temps avant qu'ilz departirent dud. Vandoncourt, elle veit lesd. trois seigneurs au seuille de la porte de leur maison, devisans par enssemble, l’ung desquelz se faschoit de ce qu'on brusloit ainssy par ce pays, disans que s'estoit mal faict, ce que disoit aussy le deuxiesme, mais quant au troisiesme, il n’y voulust aulcunement entendre, ains maintint qu'il falloit brusler ce pays, et qu'’ainssy il avoit esté resolu. Et plus n'en dict, se referante à ce que ja cy devant elle en a depposé.

Maistre François Queutal, notaire de Montecheroux, eagé de cinquante ans, souvenant à peu prez de quarante, dict et deppose par serment par luy presté aux: Sainctz Evangiles de Dieu qu'il demeurast aud. Montecheroux et en son leogis, sont trois ans, lorsque les gens de guerre des feu duc de Guise et marquis du Pont vindrent ravager par ce pays, et ne s’en bougeast, dont à certain jour en devisant qu'il faisoit avec aulcungs d’eulx des ravagemens, cruautez et pilleries qu'ilz exerceoient, luy fust dict qu'ilz avoient charge et ordonnance

expresse du marquis du Pont de brusler le pays du comte de Montbeliard, qui avoit esté cause de ce que la Lorrainne avoit aussy esté bruslée. Aussy a le depposant entendu de Ligier Guurnel et aultres du Pont de Roide que lesd. s” duc et marquis, ainssy qu'ilz furent parvenuz au devant dud. Pont, prindrent resolution de ce qu'estoit à faire ez pays de Son Excellence, que led. marquis du Pont disoit que l'on debvoit tout mettre à feug , et au contraire led. duc de Guise disoit que se seroit mal fait et taschoit par tout moyen de l’en divertir. D'abondant dict que lesd. soldatz, pendant qu'ilz estoient leogez chez s0oy, demandearent par plusieurs fois où qu'estoit son prince le chasseur. Et plus n'en

dict.

Signé : F. QUEUTAUL.

Jacques Charreton dud. Montecheroux, eagé de soixante ans ou environ, souvenant de cinquante ou à peu prez,aussy prins par serment a depposé qu'aulcungs des gens de guerre du marquis du Pont cy devant passez par ce pays avec ceulx du feu duc de Guise le prindrent prinsonnier au lieu de Montjoye (1), puis le menearent à Mandres (2), ville et pays de Lorraïinne, où qu'il demeurast par sept sepmainnes, pendant lesquelles luy fust dict que son prince, scavoir Son Excellence, estoit cause de ce que ce païs estoit bruslé, et que s'il n’heust recelé les Franceois en sa ville de Montbeliard, que ce ne fust advenu.

Girard Moinin de Bocourt (3), eagé de trente ans,

(1) Montjoie, Doubs , arr. de Montbéliard, cant. de S‘-Hippolyte.

(2) Mandres-sur-Vair, Vosges, arr. de Neufchâteau, cant. de Bulgnéville.

(8) Beaucourt, Haut-Rhin, territoire de Belfort, cant. de Delle.

souvenant de vingt, par mesme et semblable serment que les aultres a depposé qu’estant demeuré, sont trois ans, en son leogis, lorsque les trouppes des feu duc de Guise et marquis du Pont arrivearent en ce pays, y heust certain gentilhomme que s'y leogeast, lequel fust mandé le troisiesme jour après son arrivée par led. marquis au lieu de Vandoncourt, avec lequel le depposant allast pour luy monstrer le chemin, où parvenuz ilz treuvearent led. marquis à cheval, qu'avoit une grosse teste portant bien peu de barbe, qui dez là avec quelques trois centz chevaulx allast en certain bois appellé le Chesnoy qu'est au devant de Montbeliard. Et plus n'en dict.

Jehan Jappy dud. Bocourt, eagé de cinquante ans, souvenant de quarante, de luy prins le ser- * ment requis et pertinent, a dict qu'il a esté pendant le passeage des trouppes avantd. detenu prisonnier par aulcungs soldatz au lieu de Dale (1), et qu'à certain jour passearent par led. villeage quelques vingt ou trente lanciers, entre lesquelz l'on disoit estre le marquis du Pont, dont aulcungs desd. soldatz dirent qu'iceluy marquis avoit treuvé la ville de Montbeliard plus forte qu'il ne penssoit, et qu'il y avoit beaucoup d'yeulx de chouettes, touttefois qu'ilz reguarderoient de faire leur debvoir et du pis qu’ilz pourroient, car le pays du comte de Montbeliard leur avoit esté donné en pillage pour leur payement (2).

Pierre Gualier de Dampjoy (3), eagé de trente cinq ans, souvenant de vingt et cinq, par serment qu'il a presté aux Sainctz Evangiles de Dieu

(1) Dasle, Doubs, arr. de Montbéliard, cant. d'Audincourt. (2) En marge se trouve cette note contemporaine : Hoc verum est. (8) Dampjoux, Doubs, arr. de Montbéliard, cant. de S'-Hippolyte.

deppose que du temps du passeage des avantd.

trouppes fust leogé chez luy ung certain grand seigneur que l'on disoit estre le chevalier d'Aumale (1), les fourier et secretaire duquel en devisans qu'ilz faisoient à certainne fois par enssemble dirent que les duc de Guise et marquis du Pont debvoyent aller treuver le duc de Lorraïinne pour avoir de l'artillerie à l’effect d'assieger Montbeliard; aulcungs des soldatz de la suytte dud. seigneur demandearent par plusieurs fois où qu'estoit le prince de Montbeliard, et monstrearent par leurs contenances qu'ilz avoient grande affection de l'avoir. Qu'est tout ce qu'il en scauroit que depposer.

Jehan Apvril de Seloncourt, eagé de soixante ans, souvenant de cinquante, de luy prins et receu le serment sur ce accoustumé, a dict que pendant

le sejournement des trouppes ennemies passées .

par ce pays, furent leogez chez luy le fourrier du marquis du Pont et aultres que luy dirent qu'ilz avoient en charge de ruiner le prince de Montbeliard et ses subgetz, affin qu'ilz ne sceussent sur quel pied eulx tenir, et que deans ung an ilz retourneroient pour accabler du tout la ville de Montbeliard. Et comm’ il y avoit aussy deux boutefeux aud. leogis, lung d’iceulx appellé sire Claude et l'autre sire George, leur vinst de la part du duc de

(1) Claude de Lorraine, dit le Chevalier d'Aumale, chevalier de l’ordre de Malte et l’un des principaux chefs de la Ligue, que les Remarques sur la Satyre Menippée montrent sous un jour peu favorable, fut tué le 8 janvier 1591 dans une expédition nocturne qu'il dirigea contre Saint-Denis où il entra par escalade. Son corps provisoirement déposé dans une chapelle de l’église de Saint-Denis et en partie dévoré par les rats, reçut la sépulture dans l’église de Saint-Jean-en-Grève à Paris. (Voir dans les Memoires de la Ligue, t. 1V, p. 881, les épitaphes et pièces satyriques qui furent composées à cette occasion, et les Memoires-journaux de lierre de l'Estoille, t. v, Journal de Henri IV, p. 70-71)

Guise une deffence dé brusler, lesquelz de ce courroucez dirent que, puis que le marquis du Pont leur avoït ordonné de brusler, qu'ilz ne s'en soucioient de telle deffence, et qu'il leur estoit aussy permis de piller le païs. Et plus n'en dict.

Henry Colard d'Escurcey, eagé de trente cinq ans, souvenant de vingt et cinq, deppose aussy par serment que pendant le precedent passeage il fust prins prisonnier par les gens de monsieur de Rosne et par eulx mené au Pond de Royde, où qu'ilz treuvearent les duc de Guise et marquis du Pont que vouloient passer led. Pont avec leurs trouppes, par devant lesquelz se meit à genoux le sieur de Vallangin et les priast de point brusler ce pays. À quoy led. marquis dict que par Dieu si feroit et que Ghastillon avoit bien bruslé le pays de son pere, à quoy led. duc de Guise marry, comm’ il sembloit, dict qu'il ne falloit brusler, mais led. marquis ce nonobstant insista tousjours à son dire, et commandast auxd. trouppes de mettre tout à feug.

Bourquin de Reney de Seloncourt, eagé de cinquante ans, souvenant de quarante, de luy prins et receu le serment en tel cas requis, a dict et depposé avoir esté prins par aulcungs des trouppes du marquis du Pont, lorsqu'elles passearent par ce pais, et sont trois ans, lesqueles le menearent par quelques jours dez l’ung des villages à l’autre; pendant quoy luy demandearent plusieurs choses dont à present n’est souvenant, et entre aultres &i la ville de Montbeliard estoit bien fournie de pouldre et de canons, si le prince de Montbeliard estoit au pays, que s’ilz le pouvoient avoir, qu’ilz luy feroient bien autant de maulx qu'il a heu faict en Lorrainne.

Jacques de Vaulx dud. Seloncourt, eagé de trente ans, souvenant de vingt, prins par serment qu'il a

pour ce presté aux Sainctz dict et deppose que pendant le temps qu'il a esté detenu par les soldatz des trouppes des feu duc de Guise et marquis du Pont il a esté par eulx lié, guarotté, comm’ aussy baptu et navré en plusieures parties et endroitz de son corps, lesquelz en le frappant luy mettoient ordinairement au devant que ceulx de ce pays les avoyent estez chercher en leur pays, et avoient exercé plusieures cruautez et bruslementz, qu'estoit la cause qu'ilz en avoient faict de mesme et en auroient leur raison.

. André Quaisle dud. Seloncourt, eagé de dix huit ans, souvenant de dix, par serment par luy presté ad sancta dict qu'il fust prins par aulcungs des trouppes cy dessus mentionnées, lesquelz s'enquirent de luy s’il y avoit grosse guarnison deans la ville de Montbeliard, si le prince dud. lieu y estoit, lequel n'estoit q'ung chasseur et berbisier, que s’ilz le pouvoient avoir, qu'ilz le feroient bien à deviser.

Richard Masson de Glay, eagé de trente ans, souvenant de vingt, enquis par serment a dict qu'aussytost qu'il fust prins par quelques ungs des gens de guerre qui passearent, sont trois ans, par ce pays, il heust lié les mains derrier le doz, puis pendu par icelles à une cheminée où qu'il demeurast par trois jours entiers, pendant lesquelz luy faisoient iceulx plusieurs interreguaulx, signamment sur le faict de conduitte de la ville de Montbeliard, demandans où qu'estoit le comte dud. lieu, que s'ilz le pouvoient avoir, qu'ilz en feroient à leur plaisir et luy feroient tous les maulx dont se pourroient adviser, et qu'ilz n’avoient aultre gage que le pilleage que leur avoit ouctroyé par leur chef de faire en ced. pays.

Henry Guidot d'Escurcey, eagé de vingt quattre,

[ans], souvernant de bonne souvenance de douze, par serment presté par luy ad Sancta deppose avoir esté prins par aulcungs des avantd. et au temps mentionné cy devant, lesquels devisoient ordinairement des moyens que l'on pourroit tenir pour surprendre la ville de Montbeliard, et demandoient si le prince y estoit, que s’ilz le pouvoient avoir, qu'ilz luy feroient bien du mal, et qu'il n’estoit q'ung berbisier.

Adrien Cupillard d'Atechaulx, eagé de quarante ans, deppose par serment sur ce presté qu'il fust prins au temps que dessus par certains qui disoient le s° de Saint Belmont estre leur colonel, et avoir charge de faire en ce pays du pis qu’ilz pourroient, lesquelz le menearent à certain jour avec eulx, lieu au devant de Montbeliard, du costel du Parc, pour veoir de quelz costelz l'on la pourroit plus facilement assaillir.

Jehan Vurpillot d'Atechauld, eagé de vingt ans, souvenant de dix, par serment qu'il a donné et touché corporellement sur et aux Sainctz Evangiles de Dieu dict et deppose ne rien scavoir du contenuz ez articles cy joinctz à luy leuz et donnez à entendre, sinon que, lorsque les trouppes des feu s' duc de Guise et marquis du Pont arrivearent en ce pays, il fust prins au Lomont où qu'il s'estoit retiré par ung certain que se nommoit le s° de Saint Antoinne, et estoit des compagnies dud. marquis du Pont, avec lequel il souppoit ordinairement pendant qu'ilz sont estez en ces quartiers, lequel a heu dict par plusieures fois que led. s° marquis, son maistre, avoit ordonné de brusler tous les villeages qu'apartenoient au prince de Montbeliard, d'aultant qu'iceluy estoit cause de ce que la Lorrainne avoit esté hruslée.

Jehan Sire Colomb de Mesliere, eagé de cinquante ans, deppose par serment qu'il a faict et presté sur et aux Sainctz Evangiles de Dieu qu'il fust prins, sont trois ans, par aulcungs soldatz lorrains que luy dirent que tout ce païs seroit bruslé, et que le marquis du Pont par ordonnance de son pere leur avoit commandé de le brusler, et puis qu'iceluy avoit l'avantage par dessus le prince de Montbeliard, qu'il l’auroiïent bien, le chasseur et berbisier qu'il estoit.

Depuis, mesmes le quattriesme des avanitd. mois et an, a esté procedé au parachevement de lad. information, et sont eslez par serment ouys et examinez les lesmoings cy aprez nommez qui ont depposé ce ques'ensuyt :

Vullemin Maire, dict Cailloz, de Busserey, eagé de septante ans ou environ, souvenant de soixante ou à peu prez, par serment par luy presté sur et aux Sainctz Evangiles de Dieu dict et deppose sur ce enquis que, sont trois ans passez, qu'il fust prins prisonnier par aulcungs de la compagnie du comte de Schwartzembourg et dès Busserey mené à Audincourt, où qu'il fust detenu par l'espace de sept jours entiers, pendant lesquelz il a esté baptu et navré jusques à la mort, et demandoient ceulx qui le detenoient après Son Excellence, et disoient que s'ilz pouvoient avoir ce chasseur, que ce seroit leur faict. Et plus n'en dict.

Claudot de France dud. Busserel, eagé de trois vingtz et dix ans, souvenant de bonne souvenance de trois vingtz, comm'il a dict, par serment par luy presté et touché corporellement sur et aux Sainctz Evangiles de Dieu dict et deppose que pareillement, sont trois ans, il fust prins prisonnier aud. Buxerel

par aulcungs de la compagnie du s° de Schwartzembourg qui le menerent à Audincourt, et par chemin devisoient des moyens que l’on debvroit tenir pour accampagner Montbeliard, disans que le chasteau de la Croste sur la montagne proche la ville estoit ung œuil de bœuf que descouvroit partout, que l'on ne pourroit bonnement miner la ville, d'autant qu'il y avoit trop d’eaue deans et allentour d'icelle. Qu'est ce qu'il a sceu que depposer.

Nicolas Fertay dud. Busserey et maire aud. lieu pour la seigneurie et souverainté d'Hericourt, par serment par luy presté ad Sancta dict et deppose qu'au mesme temps que les deux precedens tesmoings furent emmenez prisonniers, vindrent en son leogis quelques gens à cheval, lesquelz, après avoir prins ce qu'ilz y treuvearent, l'emmenearent à Audincourt, où qu'ilz le tindrent enfermé en une chambre pour l’espace de cinq ou six jours, lesquelz expirez, et comm’ ilz veoient que plusieurs aultres qu'ilz detenoiïent eschappoient journellement, ilz l'envoyearent à Hericourt pour y treuver et emprunter tant sa rançon que celle des aultres ses voisins, pareïllement prisonniers entre leurs mains, où parvenu fust conseillé d'y demeurer, ce qu'il feit. Dict que pendant sa detention ilz luy demandoient souventefois où qu'estoit Son Excellence, si elle estoit pas à Montbeliard, et qu'ilz feroient du pis qu'ilz pourroient en ce païs, d’autant que l'on leur en avoit faict de mesme au leur. Et plus n'en dict. |

Tainnot Henricey de Buxerel, eagé de quarante ans, souvenant de trente, par serment que pour ce il ha presté ad Sancta deppose que par le passeage et ravagemens des gens de guerre, sont trois ans,

advenus en ce pays, il fust par deux diverses fois prins et emmené prisonnier, la premiere fois par des Flamens, et la derniere par des Lorrains qui le vendirent au lieu de Chastenoy (1) à d’aultres

pour trente frans, comm’ aussy le frere du deppo-

sant pour aultres trente frans, qui furent delivrez en pieces d'ung franc et testes de moinne, lesquelz Lorrains disoient les ungs aux aultres qu'il falloit accampagner Montbeliard, que l'artillerie arriveroit en peu de jours, puis demandans après Son Excellence disoient qu'ilz l'auroient bien, qu'ilz brusleroient ce pays et y feroient du pis qu'ilz pourroient, d'autant qu'ilz disoient que les huguenotz avoient bruslé le leur; et entre aultres y en avoit ung certain fort animé contre ceulx de ce pays, qui disoit que l’on luy avoit violé sa fille et couppé ung doigt pour avoir une certainne bague qu'elle y avoit.

Tiebauld Willaumier de Bruvelier, eagé de quarante ans, souvenant de trente, par serment par luy presté et touché corporellement ad Sancta deppose que par le ravagement des trouppes ennemies, sont trois ans, passées par ces quartiers il fust prins au lieu dud.Breuvelier par aulcungs de la compagnie du cappitainne Tinbaiïire, soubz la conduitte du s' de Sainct Pol (2), qui le tindrent au

(1) Il s'agit probablement de Châtenois, Haute-Saône, arr. de Lure, cant. de Saulx.

(2) Antoine de Saint-Paul, soldat de fortune, ami particulier du Balafré, devint maréchal de France pour le duc de Mayenne et lieutenant-général au gouvernement de Champagne et Brie; il fut tuë à Reims le 25 avril 1594 do la main du duc de Guise à la suite d’une altercation; sa veuve se retira avec ses fils à Mézières où le sieur de Saint-Paul avait fait élever une citadelle; le > octobre de la même année, elle traita de la reddition de cette place avec Henri IV qui lui accorda 80,000 écus. (V. Dom Marlot, Histoire de la ville de Reims, t. 1v, p. 496, 776, et de Chanterac, Mémoires de Bassompierre, t. 1, p. 401.)

lieu d'Allenjoye, lié et guarotté par l’espace de trois ou quattre jours, et demandoïent cependant où qu'estoit le prince de Montbeliard, s’il estoit au pays ou non, et qu'ilz desireroient de l'avoir, car c'estoit luy qu’ estoit cause des bruslemens, cruautés et pilleries que l’on avoit exercé au duché de Lorrainne, que s'ilz le pouvoient avoir, qu'il le recompensseroit, et qu'ilz avoient estez exprez envoyez en Ce pays pour le piller et brusler, comme l'on leur avoit faict au leur. Et plus n’en dict, n'ayant depposé que la pure verité.

Henry Boichot de Breuvelier, eagé de vingt et six ans, souvenant de quattorze, de luy prins le serment sur et aux Sainctz Evangiles de Dieu dict qu'il fust prins prisonnier lors et du temps des trouppes ennemies estantes par ce pays, sont quelques trois ans, par quelques ungs de la compagnie du cappitainne Timbay, qui le menearent à Allenjoye, où qu'il fust detenu par trois jours et demy, lié et guarotté, lesquelz luy estreingnirent avec ung baston la teste, pour luy faire à declarer ses moyens, de telle sorte qu'à la fin le feirent tomber par terre comme mort, et demandearent par quelques fois où qu'estoit Son Excellence, que s'ilz la pouvoient avoir, qu'ilz en tireroient bonne rançon.

Ghristofie Valiton de Breuvelier, eagé de cinquante ans, souvenant de quarante, de luy prins et receu le serment sur ce requis dict et deppose que du temps des troubles de guerre par ce pays, sont quelques trois ans, vint aud. Breuvelier une compagnie de gens à cheval que se disoient estre des gens du s° de Chastillon, qui desiroient d’entrer en la ville de Montbeliard pour la deffendre, mais qu'ilz ne pouvoient, et lesquelz luy dirent qu'il leurs dheust monstrer le chemin pour aller

à Eschenans, ce qu'il feit, et les menast jusques aud. lieu, et comme sur le tard du jour qu'ilz arrivearent aud. Eschenans ïl veist qu'ilz portoient des croix sur leurs habitz, il se retirast d’eulx et se vinst rendre à Hericourt, où qu'il a esté jusques à ce que touttes lesd. trouppes sont estez oultre et hors ced. pays.

Jehan George, dict Hanss, de Bruvelier, eagé de vingt et six [ans], souvenant detreize, comm'ila dict, de luy prins et receu le serment par lequel enquis a dict qu'estant prins par les trouppes ennemies, sont quelques trois ans, signamment par aulcungs de la compagnie du cappitainne Timbay, il fust par eulx mené au lieu d'Allenjoye et illec detenu par quelques trois jours et demy, pendant lesquelz ilz demandearent souventefois où que pouvoit estre le prince de Montbeliard, disans qu'ilz le vouidroient avoir et luy feroyent bien payer sa rançon.

Honnorable homme Pierrot Willemin, maire à Bruvelier, eagé de cinquante ans, souvenant de quarante, par serment qu'il a faict et presté sur et aux Sainctz Evangiles de Dieu dict, que comme par aulcungs des gens de la compagnie du s du Taiïllot, soubz la conduitte du colonel Pierre, luy fust prins la plus grande partie de son bestial qu'il emmenearent avec eulx jusques en Lorrainne, il que deppose la pensant ravoir les suyvit jusques à Remiremont, où qu'il veist ung grand nombre de bestial qu'ilz avoient emmené de ce pays, lequel pour une nuict fust quasi tout esblouhy, excepté quelque peu que ne valoit pas beaucoup qu'ilz permirent à ceulx qui le repetoient de le reprendre. Et sur ce que le depposant ne peust ravoir le sien, s'en retourneast peu à peu contre le pays. |

Jacques Mabrey d'Eschenans soubz Montvaudois, eagé de quattre vingtz ans, souvenant de septante, par le mesme serment que les precedens deppose, qu'il y heust l’esté dernierement passé ung an, que le s° d'Origny feit passer quelque compagnie de gens de guerre par ce pays pour aller au secours de ceulx de Genefve (1), aulcungs desquelz en nombre de sept furent leogez chez il que deppose, que luy dirent qu'ilz avoient esté auparavant avec l'armée du feu duc de Guise en ce pays, lequel, enssemble du duc de Lorrainne, leurs avoient faict ordonnance et commandement de le brusler et piller, et n’avoient heu aultre payement que le pilleage (à).

Claudot Vellier dud. Eschenans, eagé de quarante ans, souvenant de trente, deppose par serment qu'il a faict et presté ad Sancta qu'il y ha ung an et demy que quelque compagnie de gens de guerre passast par ce pays pour aller en Savoye au secours de Genefve, aulcungs desquelz que se disoient estre Lorrains, en parlamentans qu'ilz faisoient par enssemble chez il que deppose où qu'ilz estoient leogez, dirent entre aultres propos qu'ilz avoient estez auparavant en ce pays avec les trouppes des feu duc de Guise et marquis du Pont, et que pour lors ilz y estoient venuz pour le brusler et piller, et

(1) I s’agit de la campagne dirigée en 1589 par le duc de Savoie contre la ville de Genève, que raconte avec détails Palma Cayet, dans le livre I de ses Mémoires. (Collection Michaud, t. x1x, p. 188.) Un article du compte de François Paillet, maître bourgeois de Montbéliard pour l'exercice 1588-1589, mentionne une dépense de 70 francs supportée par la ville tant « durant le passaige des gens de mons’ d'Origny que des Suysses allant en France. » (Archives mumicipales de Montbéliard.)

(2) En marge 8e trouve cette note : Cela est manifeste.

avoient charge expresse du duc de Lorrainne de ce faire.

Maistre Claude Petrequin de Saint Mauris, notaire, eagé de vingt cinq ans, souvenant de quinze ou à peu prez, de luy prins et receu le serment sur et aux Sainctz Evangiles de Dieu, par lequel enquis et examiné a dict et depposé que par les troubles de guerre, sont trois ans, advenuz en ces quartiers, il fust prins prisonnier par aulcungs que se disoient estre du regiment de Cambray et par eulx mené jusques à Luxeul, où qu'il fust relasché par le moyen de vingt cinq escus qu'il payast de rançon; pendant lequel temps de sa detention il leurs a plusieurs fois ouy dire que si ce n'’estoit le marquis du Pont, que l'on ne brusleroit pas en ce païs, et que ce que l’on brusloit estoit pour se venger des bruslemens que l'on avoit exercé et commis au duché de Lorrainne, qu'ilz desiroient bien d'avoir les moyens pour surprendre la ville de Montbeliard, comm’ aussy pour attrapper le prince dud. lieu, auquel ïlz feroient payer une bonne et grosse rançon, et qu'iceluy estoit cause de ce qu'on avoit bruslé la Lorrainne.

Signé : PÉTREQUIN.

Pierrot Vauterot, dict Bossardet, dud. Saint Mauris, eagé de trente cinq ans, souvenant de vingt et cinq, deppose par serment par luy faict et presté sur et aux Sainctz Evangiles de Dieu qu'il fust au mesme temps que dict est prins prisonnier par des Franceois estans du regiment de Cambray, quile demanderent par plusieures fois où qu'estoit le prince de Montbeliard, disans, que s'ilz le pouvoient avoir, qu'ilz luy feroiïent au pis qu'ilz pourroient, d'autant qu'il estoit cause de ce que la Lor-

— 9% — rainne a esté bruslée, et que l'on leur avoit ouctroyé de piller ce pays pour leur payement.

Jehan Petrequin, dict Perrinet, de Sainct Mauris, eagé de quarante ans, souvenant de trente, par serment par luy presté ad Sancta deppose pareillemens avoir esté prins, sont trois ans et lorsque les trouppes ennemies ravageoient par ce pays, par aulcungs du regiment de Cambray, lesquelz à certain jour ayans leur quartier à Pierrefontainne, en devisans qu'ilz faisoient des villeages que l'on brusloit par ce pays, dirent qu'au Pont de Royde le duc de Guise avoit conseillé au marquis du Pont qu'il ne permit que l'on bruslast en ce païs, lequel jurast par Dieu qu'il executeroïit l'ordonnance de son pere et commanderoit d’y brusler, lesquelz en passant que les trouppes faisoient, luy monstrearent led. duc de Guisé, le filz d'iceluy et led. marquis du Pont, lequel leur avoit donné tout ce pays en pilleage, à raison des cruautez et bruslemens que l'on avoit commis ez pays de son pere.

Jehan Vautherot, dict Maire, de Sainct Mauris, eagé de trente et six ans, souvenant de vingt et six, deluy prins et receu le serment en tel cas requis, [depposel qu'aulcungs soldats franceois de la compagnie du cappitainne L'Ourme, soubz la conduitte du feu duc de Guise le prindrent, sont trois ans, prisonnier, lesquelz disoient que le duc de Lorrainne avoit commandé au marquis du Pont, son filz, de brusler le pays du prince de Montbeliard, et que s'ilz le pouvoient avoir, qu'ilz luy feroient gu pis qu'iiz pourroient, voire qu'à chasque jour ilz luy coupperoient ung membre du corps. Et plus n'en dict.

Nicolas Carlin, maire du Chastelot, eagé de cinquante ans, souvenant de trente, par mesme sermens que lés precedens tesmoings deppose qu'en

retournant les trouppes ennemies, sont trois ans passées par ces pays, en Lorrainne, aulcungs d'icelles le prindrent ez bois de l'Isle, et le menearent jusques bien avant en Lorrainne, et le menacearent souventefois de pendre, disans que le prince de Montbeliard avoit faict le pis en Lorrainne qu'il avoit peu, mais que l'on avoit seu la revenge.

Du VII de febvrier 1591.

Messire Antoinne Oudot, prestre chabpellain à Montjoye, eagé de cinquante ans, souvenant de quarante, par serment qu'il a faict et presté sur et aux Sainctz Evangiles de Dieu dict et deppose sur ce enquis que, sont quelques trois ans et avant que les trouppes des feu duc de Guise et marquis du : Pont arrivassent en ce pays, luy fust envoyé ung advertissement par escrit par la dame de Francquemont, le teneur duquel estoit que lesd. duc et marquis estoient en deliberation d'entrer ez terres et seigneuries du comte de Montbeliard, d'y faire une belle picquorée, s'ilz pouvoyent, puis d'aller assieger Jamais; lequel advertissement il envoyast aux sieurs officiers de Blaumont qui depuis, selon qu'il a entendu, l’ont faict tenir à-Son Excellence. Et comme quelques jours après icelles trouppes arrivearent en ces quartiers, il fust prins par aulcungs Lorrains qui le traictearent fort inhumainement, qui à la fin le laissearent; et comme les trouppes furent deslogées, il allast treuver le curé de Ghaulx læ Chastillon, que luy dict que le duc de Guise estoit fort doux, ne vouloit permettre que l'on bruslast ces pays, mais que le marquis du Pont insistoit à ce qu'ilz fussent bruslez, disant que l'on avoit bien bruslé le pays de son pere. Depuis, et sont quelques deux ans, luy, led. depposant,

estant au lieu de Mandeurre vers le curé dud. lieu, luy dict iceluy qu'il avoit esté pendant le sejournement desd. trouppes au lieu de Vandoncourt vers led. duc de Guise, où il le priast d'exempter le villeage dud. Mandeurre de feug, d'autant que pour une moytié il appartient au s° archevesque de Besançon (1), et que jaceois le prince de Montbeliard y ayt quelques subgetz, si est ce qu’ilz estoient pour la pluspart de Îa religion catholicque, à quoy led. s’ duc de Guise consentist volontairement (2), mais led. marquis n’y voulust entendre, pretendans qu'ilz seroient bruslez, comm’ aussy ilz sont estez. Lecture à luy faicte, y ha persisté et l'ha signé.

Signé : À. Oupor.

Ligier Gurnel, dict Noret, du Pont de Royde, eagé de soixante ans, deppose par serment ne scavoir aultre chose du contenu ez articles cy attachez, sinon que lorsque les trouppes des duc de Guise et marquis du Pont arrivearent au Pont de Roide, le s' de Vallangin, selon que le bruit en a esté de-

(1) La souveraineté de Mandeure appartenait en partie à l’archevèque de Besançon et en partie au comte de Montbéliard qui y avait plusieurs vassaux, notamment, à la fin du XVI* siècle, François de Valengin et Guillaume de la Verne; cette souveraineté donna naissance à de nombreux conflits entre les princes de Wurtemberg et les archevéques de Besançon, pendant les XVI°, XVII. et X VIII siècles. De 1567 à 1581, un long procès fut porté à la chambre impériale de Spire; le 28 février 1584 le roi d’Espagne intervint dans le débat et se fit auprès du comte Frédéric l'interprète des doléances du cardinal de la Baume, archevèque de Besançon, qui imputait à ce prince « les ruptures des images aud. Mandeure et deportementz des troupes françoises aud. lieu; » à ce propos une longue correspondance fut échangée entre les représentants du roi d’Espagne et ceux du comte de Montbéliard. (Archives Nationales, fonds Montbéliard, K 1939, 2063 et 2131.)

(2) En marge : Hoc bonum est.

puis et est encor presentement aud. lieu, fust prier led. duc de Guise qu'il ne permist pas que les terres et seigneuries du prince de Montbeliard fussent arses et bruslées, ce que led. seigneur duc luy accordast et dict qu'il l'avoit ja deffendu, mais que led. marquis y survint et dict que par la mort Dieu elles le seroient, et que l'on avoit bien bruslé le pays de son pere. Et plus n'en dict.

Adrien Gurnel, dict Noret, de Pont de Roide, eagé de cinquante ans, souvenant de quarante, aussy par serment a depposé qu'il veit, sont trois ans, arriver les trouppes des duc de Guise et marquis du Pont aud. Pont de Royde, lesquelles, comm’ elles voulurent passer le pont que traversse le Doubz aud. lieu, rompist iceluy, tellement qu'elles furent contraintes d'arrester une grosse heure avant que de pouvoir passer, pendant quoy aulcungs soldatz dirent à il que deppose que le s' duc de Guise avoit deffendu de brusler les terres et seigneuries du prince de Montbeliard, et que si l'on les brusloit, que se seroiït oultre son gré et vouloir. Et ne scait aultre chose que depposer.

Signé : J. C. ZENGER, cantsler ; H. Lorvys.

Original sur papier.

Archives Nationales, fonds Montbéliard, K 1967.