Scène III

S1GIBERT, MAGNACAIRE, MEROFLEDE.

SlGIBERT

Je vous ay icy derechef assemblez, non pas pour vous parler des affaires deCassarole, mais d'une chose qui est autant incroyable comme elle est estrange, et autant admirable comme elle seroit fabuleuse, si un autre que moy vous en faisoit le récit. Sachez donc, mes bons et fidèles amis, que moy estant hier à la chasse, pour passer la fascherie que portois du mal -heur arrivé à Cassarole et Franciarque, d'autant que je les aime tous deux, l'un pour sa fidélité à mon service, l'autre pour sa grande vertu et prudence en l'aage qu'il a, il vint parmy le plus espais du bois un sanglier tout noir droict à moy, sur lequel estoit un jeune adolescent en très-grande peine et danger, ce me sembloit. Cet enfant estoit beau en perfection, aussi blanc que

albastre, et nud, tenant le sanglier par les oreilles avec ses tendres mains, qui paroissoient (comme quelques parties de son corps) un peu esgratignées, pour avoir passé sur le dos de la beste contre les buissons et halliers espineux. Sa face estoit très-belle, et autour de son chef sembloit briller je ne sçay quelle clarté : il avoit les yeux dressez en bas, et quoyqu'il fust en estât pour me demander secours, ce neantmoins il ne parla nullement à moy. Je ne laissay pas de mettre la main à l'espée, et d'une estoquade que je poussay vivement dans l'espaule gauche du sanglier, je l'endommageay grandement : de sorte que la beste, pour la douleur du coup, s'estant dressée contre moy, je croyois qu'elle auroit renversé l'enfant ; mais s'estant déferrée et enfuye dans le bois, je ne vy point du depuis cet enfant, et si je suivis de fort près ce sanglier. Quelques-uns de mes gens le virent venir à moy, et par la marque que j'en donnay, ils me rapportèrent qu'ils l'avoient veu; mais nul d'eux n'a veu l'enfant sur le dos de ceste beste : seulement, ils rapportent que mes chiens coururent après, mais qu'ils la perdirent incontinent, et demeurèrent comme transportez et esperdus, les uns d'eux tremblans tout ainsi que s'ils eussent esté saisis de quelque maladie soudaine. Or je ne vous puis remarquer autre chose plus particulièrement de cette vision, mais vous asseurer seulement que je l'ay ainsi veuë, et que le tout s'est passé comme je vous le raconte.