PR

bon filz une foiz d’adventure la vint veoir, et a ce coup qu’elle rendit l’esperit. Mais le bon fut quant on le vint querir pour estre au trespas d’elle, qu’il vestoit une robe neuve, et n’y vouloit aller. Message sur aultre venoit vers luy, car sa bonne mere, qui tiroit a la fin, le vouloit veoir et recommender aussi son ame. Mais tousjours aux messagiers respondoit : « Je sçay bien qu’elle n’a point de haste, qu’elle attendra bien que ma robe soit mise a point. » En Ia parfin, tant luy fut dit et remonstré qu’il s’en alla devers sa mere, sa robe neuve vestue sans les manches. Lequel quand en ce point fut d’elle regardé, luy demanda ou estoient les manches de sa robe, et il dist : « Elles sont la dedens, qui n’actendent estre parfaictes sinon que vous nous descombrez la place. — Si seront donc tantost achevées, ce dist la bonne damoiselle : car je m’en vois a Dieu, au quel humblement mon ame recommende, et a toy, mon filz. » Et lors cy prins cy mis, la croix entre ses braz bien serreement reposant, rendit l’ame a Dieu, sans plus mot dire. Laquelle chose voyant son bon filz commença tant fort a plorer et soy desconforter que jamais ne fut veu le pareil. Et n’estoit nul qui conforter le sceust ; tant fort mesmes le print il au cueur que devant n’en tenoit compte par semblant, que au bout de xv jours de dueil il en mourut.