MESSIRE MICHAULT DE CHA[U|GY

Au bon pays de Bourbonnoys, ou voluntiers les bonnes besoignes se font, avoit l’aultre hier ung medicin, Dieu scet quel. Oncques Ypocras ne Gallien ne praticquerent ainsi la science comme il faisoit. Car en lieu de cyrops, de buvrages, de doses, d’electuaires et de cent mille aultres besoignes que medicins solent ordonner tant a conserver la santé de l’homme que pour la recouvrer s’elle est perdue, il ne usoit seullement que d’une maniere de faire, c’est assavoir de bailler clisteres. Quelque maladie qu’on luy apportast ou denunçast, tousjours faisoit bailler clisteres. Et toutesfoiz si bien luy venoit en ses besoignes et afferes que chacun estoit content de luy, et garisoit chacun, dont son bruyt creut et augmenta qu’on l’appeloit par tout, tant es maisons des princes et seigneurs comme en grosses abbayes et bonnes villes. Et ne fut oncques Aristote ne Gallien ainsi autorisé, par especial du commun peuple, que ce bon maistre dessus dit. Et tant monta sa renommée que pour toute chose l’on demandoit son conseil ; et estoit tant entonné incessamment qu’il ne savoit au quel entendre. Si une femme avoit rude mary, fel et mauvais, elle venoit au remede a ce bon maistre. Bref, de tout ce dont on peust demander conseil d'homme, nostre bon maistre avoit la huée. Advint ung jour que ung bon simple homme champestre avoit perdu son asne ; et après la longue queste d’icelluy, s’advisa de tirer vers ce maistre qui si tressage estoit. Et a la coup de sa venue, il estoit tant avironné de peuple qu’il ne savoit au quel entendre. Ce bon homme neantmains rompit la presse, et, quoy que le maistre parlast et respondist a pluseurs, luy compta son cas, c’est asavoir de son asne qu’il avoit perdu, priant pour Dieu qu'il luy voulsist radresser et bailler chose dont il le peust recouvrer. Ce maistre, qui plus aux aultres que a luy entendoit, quand le bruyt et son de son langage, dont rien il n’avoit entendu, fut finy, se vira devers luy, cuidant qu’il eust aucune enfermeté ; et affin d’en estre despesché, dist a ses gens : « Baillez luy clistere. » Et ce dit, devers les aultres se tourna. Et le bon simple homme qui l’asne avoit perdu, non sachant que le maistre avoit dit, fut prins des gens du maistre, qui tantost, comme il leur estoit chargé, luy baïllerent ung clistere, dont il fut bien esbahy, car il ne savoit que c’estoit. Quand il eut ce clistere, des qu’il fut dedans son ventre, il picque et s’en va, sans plus demander de son asne, cuidant certainement par ce le retrouver. Il n’eut gueres esté avant que le ventre luy brouilla et grouilla tellement qu’il fut contraint de soy bouter en une vieille masure inhabitable, pour faire ouverture au clistere qui demandoit la clef des champs. Et au partir

qu'il fist, il mena si grant bruyt que l’asne du pouvre homme, qui passoit assez près, comme esgaré et venu d’adventure, commence a racaner et cryer. Et bon homme de s’avancer et lever sus et chanter Te Deum, et venir a son asne, qu’il cuidoit avoir recouvert ou trouvé par le clistere que luy fist baïller le maistre, qui eut encores plus de renommée sans comparaison que paravant. Car des choses perdues on le tenoit vray enseigneur, et de toute science aussi le tresparfait docteur, quoy que d’un seul clistere toute ceste renommée venist. Ainsi avez oy comment l’asne fut trouvé par ung clistere, qui est chose bien apparente et qui souvent advient.