CHAPITRE XL

Ainsi demourèrent là par trois jours, les Englès d'une part et les Escos d'aultre; et plenté de fois par nuyt et par jour y avoit grans escarmuces d'une part et d'aultre , et souvent de mors et de prins. Au quart jour bien matin, lesEnglës regardèrent devers la montaigne des Escos , et riens n'y virent, car ils s'estoient party la nuyt. Si en furent moult esmervilliet ; dont envolèrent gens à cheval et à piet par les montaignes pour culx trouver : si les trouvèrent logiés sur une plus forte montaigne qu'il n'estoient par avant et sur le propre rivière. Et si tost que le roy le sot , si fist deslogier et aler celé part; et se logèrent sur une autre montaigne à rencontre d'eulx. ' Et quant les Escos les perchurent , si se vinrent ordonner devant les Englès et mettre en bel aroy ; mais oncques ne vaurent venir vers eulx; et les Englès n'y pooient aler fors à trop grant dommage. En tele manière estoient li uns d'une part de la rivière et ly aultre d'aultre, en grant paine et en grant povreté et famine. Si y demourèrent l'espasse de dix huit jours. Et moult de fois les Englès envolèrent par leurs héraulx requerre aux Escos que paisiblement il passaissent la rivière où il le peuissent passer, adfin qu'ils eussent plache pour combattre. Mais oncques les Escos ne s'i vaurent acorder ne prendre le pardîon ; et si vivoient en tel povreté qu'il n'est homme qui n'en deuist avoir pitié; et pareillement les Englès, nonobstant que un pau euissent-il mieulx que les Escos.