LA XCIX^ NOUVELLE

'il vous plaist, avant qu'il soit plus tard tout à ceste heure, ma petite râtelée et compte abrégé d'ung ^-:g> vaillant evesque de Castille despaindray, qui, pour aucun affaire du roy de Castille, son maistre, ou temps de ceste histoire, s'en aloit en court de Romme. Ce vaillant prélat, dont j'entens fournir ceste nouvelle, vint ung soir en une petite villette de Lombardie; et lui, estant arrivé par un vendredi assez de bonne heure, vers le soir, ordonna à son maistre d'ostel de le faire soupper assez de bonne heure, et le tenir le plus aise que faire se pourroit, de ce dont on pourroit recouvrer en la ville: car, la Dieu mercy, quoiqu'il feust gros, gras et en bon point, et ne se donnast de mauvais temps que

bien à point et sobrement, si n'en jeunoit il journée.

Son maistre d'ostel, pour lui obeyr, s'en alla au marchié, et, par toutes les poissonneries de la ville, chercha pour trouver du poisson. Mais, pour faire le compte brief, il n'en peut oncques recouvrer ung seul lopin, quelque diligence que lui et son hoste en sceussent faire. D'adventure, eulx retournans à l'ostel sans poisson trouvèrent ung bon homme des champs, qui avoit deux bonnes perdris et ne demandoit que marchant. Si se pensa le maistre d'ostel que, s'il en povoit avoir bon compte, qu'elles ne lui eschapperoient pas, et que ce seroit bon pour le dimenche, et que son maistre en feroit grant feste. Il les acheta et en eut bon pris.

Il vint vers son maistre, ses perdris en sa main, toutes vives, grasses et bien refaictes, et lui compta l'esclipse de poisson qui estoit en la ville : dont il ne fut pas trop joyeulx, et lui dist : « Et que pourrons nous soupper? — Monseigneur, ce respondit il, je vous feray faire des oeufz en plus de cent mille manières; vous aurez aussi des pommes et des poires. Nostre hoste a aussi de bon fourmaige et bien gras; nous vous

tiendrons bien aise; ayez paciencepour meshuy: ung soupper est tantost passé; vous serez demain plus aise, se Dieu plaist. Nous yrons en ville qui est trop mieulx empoissonnée que ceste cy, et dimenche vous ne povez faillir d'estre bien disné, car vecy deux perdris que je vous ay pourveues, qui sont à bon escient, bonnes et bien nourries. »

Ce maistre evesque se fîst bailler ces perdris et les trouva telles qu'elles estoient, bonnes à bon escient; si se pensa qu'elles tendroient à son soupper la place du poisson qu'il cuidoit avoir, dont il n'avoit point ; car il n'en put oncques trouver. Si les fîst tuer bien en haste, plumer, larder et mettre en broche, quelque chose que son maistre d'ostel sceust dire ne remonstrer; trop bien disoit il : « Monseigneur, elles sont bonnes tuées; mais les rostir maintenant pour dimenche, il ne me semble pas bon. » Quelque chose que le maistre d'ostel lui sceut remonstrer, toutesfoys ne le voulut il croire, car elles furent mises en broche et rosties. Le bon prélat estoit, lapluspart du temps qu'elles mirent à cuire, tousjours présent : dont son maistre d'ostel ne se sçavoit assez esbahir, et ne sçavoit

pas Tappetit desordonné de son maistre qu'il eust à ceste heure de dévorer ces perdris ; ainçois cuidoit qu'il le fîst pour dimenche les avoir plus prestes au disner.

Lors les fît ainsi habiller, et, quant elles furent prestes et rosties, la table couverte et le vin apporté, oeufz en diverses façons habillez et mis à point, si s'assist le prélat, et, le Benedicite dit, demanda les perdris avec la moustarde. Son maistre d'ostel, désirant sçavoir que son maistre vouloit faire de ces perdris, si les lui mist devant lui toutes venantes de la broche, rendantes une fumée arromatique assez pour faire venir l'eaue à la bouche d'ung friant. Et bon evesque d'assaillir ces perdris et desmembrer d'entrée la meilleure qui y feust; et commence à trencher et menger; car tant avoit haste que oncques ne donna loisir à son escuier, qui devant lui trenchoit, qu'il eust mis son pain ne ses cousteaux à point.

Quant ce maistre d'ostel vit son maistre s'arracher à ces perdris, il fut bien esbah y et ne se peut taire ne tenir de lui dire : « Ha, monseigneur, quefaictes vous? Estes vous Juif ou Sarrasin, qui ne gardez aultrement le vendredi?

Par ma foy, je me donne grant merveille de vostre faict. — Tais toy, tais toy! dist le bon prélat, qui avoit toutes les mains grasses et la barbe aussi de ces perdris : tu es beste, et ne sçais que tu dis ; je ne fais point de mal. Tu sçais et congnois bien que, par parolles, moy et tous aultres prestres faisons d'une hostie, qui n'est que de blé et d'eaue, le précieux corps de Jésus Christ; et ne puis je doncques, par plus forte raison, moy qui tant ay veu de choses en court de Romme, et en tant de divers lieux , sçavoir par parolles faire convertir ces perdris, qui est chair, en poisson, ja soit ce qu'elles retiennent la forme de perdris ? Si fais, dea ! Maintes journées sont passées que j'en sçay bien la pratique. Elles ne furent pas si tost mises à la broche que, par les parolles que je sçay, je les charmay tellement que en substance de poisson se convertirent; et en pourriez, trestous qui cy estes, menger, comme moy, sans péché. Mais, pour l'ymaginacion que vous en pourriez prendre elles ne vous feroient ja bien; si en feray tout seul le meschief. :»

Le maistre d'ostel et tous les aultres de ses gens commencèrent à rire, et firent semblant de

adjouster foy à la bourde de leur maistre, trop subtillement fardée et coulourée ; et en tindrent de puis manière du bien de lui, et aussi maintesfois en divers lieux joyeusement le racompterent.