LA XV NOUVELLE

PAR MONSEIGNEUR DE LA ROCHE

u gentil pays de Brebant, prés d'ung monastère de blancs moynes, 'est situé ung aultre monastère de nonnains, qui tresdevotes et charitables sont, dont l'histoire tait le nom et la marche particulière. Ces deux maisons, comme on dit de coustume, estoient voisines, la grange et les bateurs ; car, Dieu mercy, la charité de la maison aux nonnains estoit si tresgrande, que peu de gens estoient escondis de l'amoureuse distribucion, voire se dignes estoient d'icelle recepvoir. Pour venir ou fait de ceste hystoire, ou cloistre des blancs moines avoit ung jeune et beau religieux qui fut amoureux d'une des nonnains ;

et, de fait, eust bien le couraige, après les prémisses, de lui demander à faire pour l'amour de Dieu. Et la nonnain, qui bien congnoissoit ses oustilz, ja soit qu'elle fust bien courtoise, luy bailla dure et aspre response. Il ne fut pas pourtant enchâssé, mais tant continua sa treshumble requeste que force fut à la tresbelle nonnain ou de perdre le bruit de sa treslarge courtoisie, ou d'accorder au moyne ce qu'elle avoit à plusieurs, sans gueres prier, accordé. Si luy va dire : « En vérité, vous poursuyvez et faictes grant diligence d'obtenir ce que à droit ne sçauriez fournir; et pensez vous que je ne saiche bien, par ouyr dire, quelz oustilz vous portez? Créez que si fais; il n'y a pas pour dire grand mercy ! — Je ne sçay, moy, qu'on vous a dit, respond le moyne, mais je ne doubte point que vous ne soyez bien contente de moy, et que je ne vous monstre que je suis homme comme ung aultre. — Homme, dit elle, cela croy je assez bien, mais vostre chose est tant petit, comme l'on dit, que, se vous l'apportez en quelque lieu, à peu s'on s'aperçoit qu'il y est. — Il va bien autrement, dit le moyne, et, se j'estois en place, je feroye, et par vostre

QUINZIÈME NOUVELLE l~]

jugement, menteurs tous ceulx ou celles qui ceste renommée me donnent. »

Au fort, après ce gracieux débat, la courtoise nonnain , affin d'estre quitte de l'ennuyante poursuite que le moyne faisoit, affin aussi que elle saiche qu'il vault et qu'il sçait faire, et aussi qu'elle n'oublie le mestier qui tant luy plaist, elle luy baille jour, à xij heures de nuyt, devers elle venir et heurter à sa traille ; dont elle fut haultement merciée : « Toutesfois vous n'y entrerez pas que je ne saiche, dist elle, à la vérité, quelz oustilz vous portez, et se je m'en sçauroie ayder ou non ? — Comme il vous plaira , » respond le moyne.

A tant s'en va et laisse sa maistresse ; et vint tout droit devers frère Courard, l'ung de ses compaignons, qui estoit oustillé Dieu sçait comment, et pour ceste cause avoit ung grant gouvernement ou cloistre des nonnains. Il luy compta son cas tout du long, comment il a prié une telle, la response et le reffus que elle fit, doubtant qu'il ne soit pas bien soulier à son pié, et, en la parfin, comment elle est contente qu'il entre vers elle, mais qu'elle sente et saiche premier de quelle lance il vouldroit jouster contre

son escu. « Or est ainsi, dist il, que je suis mal fourny d'une grosse lance telle que j'espoire et voy qu'elle désire d'estre rencontrée. Si vous emprye, tant comme je puis, que anuyt vous venez avecques moy, à l'heure que je me doy vers elle rendre, et vous me ferez le plus grant plaisir que jamais homme fist à aultre. Je sçay tresbien qu'elle vouldra, là moy venu, sentir et taster la lance dont je attens à fournir mes armes ; et, en la fin, me fauldra ce faire : vous serez derrière moy, sans dire mot, et vous mettrez en ma place, et vostre gros bourdon en son poingt luy mettrez; elle ouvrera l'huys, je n'en doubte point, et puis, cela fait, vous vous en yrez et dedans j'entreray ; et puis, du surplus laissez moy faire. » Frère Courard est en grant soulcy comment il pourra faire et complaire à son compaignon, mais toutesfois se met à l'adventure, et, tout ainsi que lui avoit dit, s'en va et luy accorde ce marchié.

Et, à l'heure assignée, se met avec luy en chemin par devers la nonnain. Quant ilz sont à l'endroit de la fenestre, maistre moyne, plus eschauffé que ung estalon, de son baston ung coup heurta ; et la nonnain n'attendit pas l'autre

QUINZIÈME NOUVELLE 3a,

heurt, mais ouvrist la fenestre et dist en basse voix : « Qui est ce là ? — C'est moy, dist il ; ouvrez tost l'huys, que on ne vous oye. — Ma foy, dist elle, vous ne serez ja en mon livre enregistré, n'escript, que premièrement ne passez à monstre, et que je ne sçaiche quel harnois vous portez. Approuchez vous prés et me monstrez que c'est. — Tresvoulentiers , dist il. » Alors tire frère Courard, lequel s'avançoit pour faire son personnaige, qui en la main de ma dame la nonnain mist son bel et trespuissant bourdon, qui gros, long et rond estoit. Et, tantost qu'elle le sentit, comme se nature luy en baillast la congnoissance, elle dist : « Nennil, nennil, dit elle, je congnois bien cestuy cy, c'est le bourdon de frère Courard ; il n'y a nonnain céans qui bien ne le congnoisse ; vous n'avez garde que j'en soie deceue, je le congnois trop. Allez quérir vostre adventure ailleurs. » Et à tant sa fenestre referma, bien courroucée et mal contente, non pas sur frère Courard, mais sur l'autre moyne, lesquelz, après ceste adventure, s'en retournèrent vers leur hostel, tout devisant de ceste advenue.

LA XVIe NOUVELLE