LA PÉNITENCE PUBLIQUE

Hommes frères, voicy nous avons mis au mylieu de vostre assemblée. Admonition selon le devoir de nostre Ministère, cestuy nostre frère délinquant, lequel " VEghse. pour testifier envers vous sa vraye et chrestienne repentance, ne refuse point de recognoistre publiquement la faute de son péché, par lequel il a offencé le Seigneur Dieu et son Église, à sa vergongne comme vous voyez ; mais à la gloire du Seigneur nostre Dieu, et édification de ceste nostre Église. Et désire de rechef d'estre, en la présence de Dieu, réconcilié à vous tous, et estre désormais aussy retenu en vostre fraternité Ecclésiastique. Parquoy je vous veux admonnester un peu, par la parolle de Dieu, en cest endroit de vostre devoir et office envers luy : afin que vous sachiez ce que devez tous estimer des péchez de ce frère délinquant, des vostres, et de nous tous.

Les Escritures donc nous monslrent deux choses du péché. La première que nous sommes tous enclos soubz péché. La seconde que sommes bien enclos, mais afin que tous soyons sauvez quant à Dieu, par la miséricorde gratuite d'yceluy en Christ : et que ne périssions en nostre péché, sinon que mesprisant le bénéfice de Dieu en Christ envers nous, nous nous délections en nostre péché, et finalement, par le juste jugement de Dieu, nous nous endurcissions en iceluy. De là aussy nous sommes

apprins de ce que nous devons penser de noz péchez propres, et aussy de ceux des autres : et comment nous devons estre affectionnez les vns envers les autres, principalement en cest endroit: car quand nous oyons, que tous, sans nul excepter, sommes enclos soubz péché, nous entendons facilement que de nostre nature nous sommes tousjours enclins à tous genres de vices. Et pourtant nous n'admirerons la cheute des autres, et beaucoup moins l'accuserons nous, ou mespriserons noz frères délinquans : ains penserons que c'est nostre devoir et office, de réputer comme nostres toutes les fautes des autres, quelques grandes ou détestables qu'elles soyent ; et ne regarderons point tant à noz frères délinquans, se repentans en leur cheute, qu'à nous mesmes en iceux. Et ne les accuserons devant le Seigneur nostre Dieu plus que nous tous ensemble avec eux. Car si nous croyons tous vrayment, et de bon cœur, que sommes tous enclos soubz péché, nous ne pourrons faire que nous ne confessions aussy les autres n'avoir rien commis que nous mesmes n'eussions bien fait, si Dieu ne nous eust préservé par son bénéfice singulier. Et rendrons grâces immortelles au Seigneur nostre Dieu, s'il ne nous permet tomber aux mesmes péchez, voire plus énormes, auxquelz nous oyons les autres estre tombez.

Finalement nous le prirons continuellement, qu'il ne souffre que cy après nous tombions : mais quand nous réputons en nous mesmes, que tous ensemble sommes enclos et vendus soubz péché, nous entendons qu'il nous faut recognoistre par charité mutuelle, entre nous, tous noz péchez , et qu'il nous les faut supporter et endurer, quand nous nous repentons. Autrement nous nous aggravons nous mesmes en la faute de noz péchez, en tant que nous accusons et condamnons les autres par dessus nous, pour les choses lesquelles nous confessons avoir communes avec eux.

De rechef quand nous oyons que sommes enclos soubz péché, non a fin que nous périssions, car Dieu n'ayme point nostre ruine, mais afin que soyons sauvez, par sa seule et gratuite miséricorde en Christ, et non par aucune nostre dignité, ne de nos œuvres, à la louange et gloire d'iceluy ; nous devons penser qu'il ne nous faut attacher en noz péchez, auxquelz nous nous voyons estre cheuz. Mais recognoissans incontinent nostre faute, nous devons recourir à la miséricorde de Dieu, par laquelle il nous a tellement embrassez en son seul filz, qu'il veut transporter la faute de tous noz péchez en luy, et luy imputer toute ; pourveu que vray-

ment, et de bon cœur, nous nous desplaisions en nous mesme et en noz péchez ; et que nous nous accusions en nostre corruption, et non point luy en sa loy, qui est saincte et salutaire, n'en son juste jugement. Et finalement nous confîans en sa seule divine bonté, en deffiance de nous mesmes, nous implorions tous ensemble d'un accord sa grâce salutaire : car le Seigneur nostre Dieu n'est point en cest endroit tant sévère, ne fascheux, qu'il requière de nous vne grande pompe et apparence de parolles, pour implorer sa grâce et miséricorde. Il regarde le cœur, et non la splendeur, ou appareil de parolles. Et si nous nous desplaisons véritablement en nostre cœur, et que nous implorions humblement sa grâce, en certaine fiance par Christ, et nous accusant nous mesmes d'un bon cœur : pour certain il nous exauce, voire devant que nous commencions crier à luy : et accourt volontairement pour nous embrasser, devant mesme que nous nous soyons accusez. Voire luy mesme nous donne que nous nous repentions véritablement et de bon cœur. Et nous repentant il nous charge sur ses espaules, pour nous r'amener de rechef à sa bergerie. Et finalement il fait démener joye en son Royaume, plus grande sur un pécheur faisant pénitence, que sus nonante neuf justes, lesquelz il avoit ja pour compagnons de son Royaume.

Puis donc , ô frères bien aimez , qu'il est alnsy à la vérité , et vous avez maintenant devant vous cestuy nostre frère délinquant, qui comme nous espérons, en vraye desplaisance de soy mesme, et accusation de la faute de son péché, a délibéré de le recognoistre publiquement, et en demander pardon à Dieu, et à vous tous, comme à l'Eglise de Dieu; et désire de rechef estre réconcilié à vous, par ceste sienne pénitence, et estre retenu comme frère en vostre société Ecclésiastique , joignez vous maintenant, mais joignons tous noz péchez avec le sien, et considérons que sa cheute est la cheute de nous tous. Prenons exemple de ce nostre frère délinquant, afin que comme il monstre qu'il se desplait en son péché, par ceste sienne pénitence publique, que aussy nous nous déplaisions aux nostres, et que nous nous accusions avec cestuy nostre frère, devant nostre Seigneur Dieu. Joignons noz prières avec les siennes, noz larmes avec les siennes, et invoquons humblement Dieu, tous ensemble, à ce que cestuy nostre frère recognoisse vrayment, et de bon cœur, la faute de son péché, et en demande pardon, à la gloire du nom de Dieu, à son salut, et à l'édification de toute nostre Église.

Pviî't'e. Nostre Père céleste, tout puissant et miséricordieux, qui par la bouche

(le tes Prophètes et Apostres^ as disertement testifié, que tu ne veux point la mort du pécheur^ ains qu'il se repente et qu'il vive ; et qui as voulu que ton filz unique soit morl^ non pour les justes mais pour les pécheurs, afin que ceux qui se sentans accablez de la charge de péché, et qui se deffians entièrement d'eux mesmes, par la fiance de ton filz allent humblement au throne de ta grâce, avec certaine asseurance d'estre exaucez de toy. Voicy nous sommes assemblez, au nom d'iceluy ton filz Jésus Christ nostre Seigneur, pour nous accuser de noz péchez envers toy, et estans prosternez à tes piedz, pour te demander pardon d'iceux, par le nom d'iceluy ton filz. Nous te prions donc humblement, ô Père trèsbéning, premièrement que tu excites par ton sainct Esprit les cœurs de nous tous à vraye et salutaire cognoissance de noz péchez : mais principalement le cœur de nostre frère délinquant entre nous, qui comme par son péché, naguère commis, a ofîencé^toute ceste nostre Église, pareillement qu'il recognoisse aussy publiquement la faute d'iceluy, et en demande pardon, à la gloire de ton nom sainct, et édification de ceste tienne Église. Et puis que tu pardonne bénignement, par les entrailles de ton filz bien aymé, la faute recogneue de cestuy nostre frère, de son péché, et de tous les nostrçs, tant à luy qu'à nous : et nous gouverne et munis pour l'advenir de 'ton sainct Esprit : que ores que nous ne puissions estre totalement sans péché, toutesfois que nous ne]^tombions en telz péchez , par lesquelz ton nom adorable soit diffamé , la cause de l'Évangile de ton filz blasmé, le ministère de ta parolle soit deshonnoré, et que ton Église amassée en ton nom très sainct en soit dissipée. Nous te prions ô Seigneur nostre Dieu, par ton filz, que tu nous délivres de telz crimes, et desploye et déclare ta vertu divine en nostre infirmité, à rencontre de la tyrannie de Sathan, et de nostre péché contre nous : a fin qu'en saincteté et ju&tice, nous avancions le Royaume de ton filz en son Église, auquel avecque toy et le Sainct Espi'it, en trinité et unité divine, soit louange, honneur, et gloire éternellement. Ainsy soit-il. Admonition Vous avez ouy, frère bien aymé, quel est vostre office envers l'Église au frère, par vous offencée, à savoir que volontairement vous recognoissiez la faute de vostre péché, et en demandiez pardon à icelle en la présence de Dieu : et que finalement vous vous réconciliez à elle offencée. Vous avez aussy entendu, quel est pareillement le devoir d'ycelle envers vous son frère délinquant, et pénitent : c'est qu'elle joigne son péché ensemble avec le

PIÈCES .lUSTIFICATIVES ET COMPLÉMENTAIRES. T. I. 2'J

vostre, et estime vostre cheute la sienne. Qu'elle joigne ses prières avec les vostres, et qu'elle s'accuse avecques vous, et demande la grâce de Dieu avecques vous. Vous voyez desja toutes ces choses avoir esté faictes, en ceste nostre Église, par sa prière publique. Maintenant de vostre part il faut que faciez ce que vous avez entendu estre de vostre office. C'est que vous recognoissiez volontairement et de* bon gré, la faute de vostre péché, et en demandiez pardon, non point pour l'amour de nous, ou de quelque homme, ains à la gloire de Dieu, et tesmoigaage de vostre pénitence vraye.

Or sus donc (mon frère) entrez en vous mesme, et considérez et esprouvez vostre cœur devant Dieu, auquel toutes choses sont cogneues. Pensez que vous estes devant Dieu, et non seulement devant les hommes. Pensez que ce n'est point à nous seulement que vous avez à faire; mais à Dieu mesme, en nostre Ministère, et que comme hommes, nous pouvons estre déceuz de vous : mais Dieu ne peut estre aucunement déceu, ne par vous ne par autre. Voyez donc mon frère, que ne vous moquiez de Dieu, et du S. Esprit en nostre Ministère. Nous tesmoignons bien seulement des choses que nous voyons par dehors, mais Dieu regarde mesme le plus profond de nostre cœur : et s'est monstre souvent juge sévère de ceux qui ont voulu se moquer de luy en son Ministère Ecclésiastique. Pourtant maintenant donnez gloire au Seigneur vostre Dieu en vostre vraye desplaisance et accusation du péché : donnez devant ceste Église de Dieu argument de vostre vraye et chrestienne repentance, par la cognoissance volontaire de vostre faute, et requeste du pardon. Car ceste est la gloire de DieUj que tous nous implorions sa miséricorde gratuite humblement, en faveur de son filz unique, en nous accusant de noz péchez : et que finalement nous soyons sauvez par sa bonté divine, laquelle chose vous vueille octroyer, et à nous tous^ ce Dieu seul en trois personnes, le Père, le Filz et le S. Esprit qui est béneit éternellement. Ainsy soit-il.

Nous avons ouy vostre confession, mon frère, au moyen de quoy Admonition

nous sommes tous grandement joyeux : et rendons grâces au Seigneur «sw frère

nostre Dieu, de ceste vostre repentance, en laquelle vous ne vous estes ^ ,

' r 7 -1 confession.

point fait tant grande honte, ne à vostre infirmité, comme à Sathan, par la victoire qu'avez obtenue par Jésus Christ, à l'encontre de luy et de vostre péché, en recognoissant et demandant pardon publiquement de vostre faute : car véritablement nous vainquons et confondons Sathan, et toute sa tyrannie, et foulons aucunement sa teste de nos piedz, mais le

Seigneur Christ le vainq, confond, et foule en nous, autant de fois que par son bénéfice nous accusons nos péchez, et l'autheur d'yceux Salhan, avec l'imploration de la grâce de Dieu, et espérance certaine de rémission, pour l'amoui" du mesme Seigneur Christ. Recognoissez donc, mon frère, le singulier bénéfice de Christ, en l'accusation que vous avez maintenant faite de vostre péché, et de Sathan mesrtie. Car ce n'est point vostre œuvre, ne d'aucun homme; qui de nous mesme ne pouvons, non pas penser quelque chose bonne ; ains sans double c'est l'œuvre du Seigneur Christ mesme qui seul fait cesle œuvre par son Esprit, à la gloire de son divin nom, et à nostre salut, et édification de son Église. Recognoissez cecy (dis je) et gardez bien de ne point abuser désormais d'un si grand bénéfice, vous abandonnant à péché (que Dieu ne vueille) à vostre condamnation. Considérez que Sathan a eu grand despit de la confusion qu'il a receue, en ceste vostre pénitence, et pourtant qu'il essayera en toute sorte comment de rechef il vous tiendra en ses lacz. Gardez vous donc autant qu'il vous sera possible de ne luy donner entrée par voz péchez, de peur que les choses dernières ne soyent pires que les premières. Continuez en prières envers le Seigneur vostre Dieu : et joignez aussy les prières des fidèles avec les vostres, afin qu'il vous gouverne et deffende par son Sainct Esprit^ et qu'il vous équippe de ceste armeure que Sainct Paul nous monstre, à ce que ne soyez opprimé par les effortz et ruses de Sathan. Or Dieu est fidèle pour ce faire, pourveu que véritablement et de bon cœur nous l'invoquions par le nom de son filz unique. Recommandez vous donc entièrement à luy, mon frère, invoquez le, donnez vous du tout à luy, espérez en luy de tout vostre cœur. Il n'y aura point de faute, que comme Sathan n'a plus que cercher au Seigneur Christ nostre chef, pareillement aussy il ne pourra rien avoir en vous n'en nous tous, Admonilion Or vous, mes frères, prenez tous exemple à cestuy vostre frère délin- « l'Eglise, quant, et pénitent. Premièrement que vous ayez en vostre cœur desplaisance de voz péchez : puis que vous vous accusiez en yceux devant Dieu, avec cestuy vostre frère pénitent, et que tous ensemble imploriez humblement la miséricorde de Dieu. Finalement s'il advient qu'aucun de vous tombe quelquefois publiquement, comme il luy est advenu, que ne refusiez point de recognoistre la faute de vostre péché, à l'exemple de ce frère, et en demander pardon, et vous réconcilier à l'Église. Et quant au reste pardonnez maintenant de bon cœur devant le Seigneur toute

l'ofFence de cestuy vostre frère, ainsy que vous désirez tous voz péchez vous estre pardonnez du Seigneur vostre Dieu. Recevez le dorénavant pour frère de nous tous, et désormais laissans toutes reproches, aymons le tous d'un amour fraternel en nostre Seigneur. Et afin qu'il puisse avoir certain signe et tesmoignage de sa réconciliation avecques vous, prosternez vous tous en terre, et rendez grâces à Dieu nostre Père, avecques moy, pour ceste repentance et réconciliation, de cestuy nostre frère, en ceste manière :

Nostre Père céleste, fontaine de toute miséricorde et consolation non Action de espuisable : nous tous certes ne sommes pas dignes que tu nous re- grâces. gardes, et moins que tu nous exauces ; mais beaucoup moins que tu nous nombres entre tes enfans, et que tu nous embrasses de ta bonté paternelle. Mais quand nous contemplons, par le bénéfice de ton filz unique nostre Seigneur, ta bonté et miséricorde ineffable envers nous, par luy, de laquelle nous ayans pieça desservy la mort éternelle, et que mesme de plus en plus nous la desservons, néantmoins tu ne veux pas que nous périssions, ains gratieusement tu nous r'appelles à repentance : et nous ayant pardonné gratuitement toute la faute de noz péchez, tu nous reçois de rechef vrayment en ta grâce paternelle, pour l'amour de ton filz tant aymé, et son mérite salutaire. Nous recognoissons de nostre pouvoir ce tien tant excellent bénéfice, et pour l'amour d'iceluy nous te servons et adorons : et estans prosternez à tes piedz, nous te rendons très grandes grâces. Maintenant donc, à ceste cause nous te louons, ô Père très sainct, avec ton filz et le sainct Esprit. Nous t'adorons, et tous ensemble te rendons grâces. Et principalement quand nous voyons le tesmoignage de ceste tienne bonté, en cestuy nostre frère, en sa pénitence publique, nous te prions humblement, ô Père trè* miséricordieux, qu'il te plaise nous donner à tous vng cœur pénitent de nos péchez, à savoir que nous nous desplaisions en iceux, sans jamais avoir honte de nous accuser en iceux , ains par la vergongne de nous mesmes, nous magnifions, en nostre infirmité, ta vertu et gloire, à la louange de ton nom adorable, et le salut de nous tous, et édification de ton Église universelle, par Jésus Christ ton filz nostre Seigneur. Ainsy soit-il.