Cf. Grandes Chroniques, t. VII, p. 252, chap, xcviii
que vous veez là montez seur ces chevaus en celle valée ont desconfit et detrenchié le roy Challe et les Françoiz, dont vous veez la terre couverte de leurs charoignes. » Henriz cuidoit, selonc le desirier de son cuer, pour ce que il estoit encores loing des François, que li sien eussent occiz le roy Challe et sa gent, pour Henri de Cusances qui avoit esté occiz es armes le roy que il out vestues, si comme nous deismes par devant. Lors descendirent moult liéement les Espaignoz de la montaigne et aprochierent les tentes le roy ; mes quant il virent et cognurent leurs banieres et leurs armes, il sorent tantost et aperçurent que les leurs estoient vaincuz et Françoiz vainqueeurs ; et en ceste manière, leur harpe fu convertie en souspirs et leur joie en pleurs. Mèz aprèz ce, il amonesterent l'un l'autre et descendirent es tentes des Françoiz qui furent demorées toutes vuides, fors que d'un poi de piétaille que il occidrent et burent le vin que il trouvèrent ^. Aprèz tantost il issirent des tentes et se joindrent et recueillirent moult forment ensamble, et alerent, rengiez et serrez à bataille contre le roy Challe. Mes pour~ce ne faillirent pas les cuers aus Françoiz, ja soit ce que il fussent poi en nombre contre tant d'anemis et que il eussent moult souffert en la première bataille.
Quant il se furent un poi reposez et il virent leurs anemis venir contre euls si soutilment et si serrez, si mistrent leurs hiaumes en leurs chiez, et montèrent sus leurs chevaus et les attendirent ou lieu où il s'estoient premièrement combatus. Erart de Valeri, un chevalier de France preuz et hardiz, et qui assez sont de bataille, qui prèz estoit du roy Challe, quant il vit Henri et sa gent si sagement venir et si ordenez, si dist au roy : « Sire, nos anemis vienent si sagement et si joinz et serrez qu'à paines
1. En note : « que les paiges av oient gardez pour leurs maistres ».
porront estre perciez ; dont, se il vous plaist, mestiers seroit que nous ouvrissiens d'aucune cautele à ce que il s'espandissent un poi, si que nos genz se ferissent en euls et peussent combatre main à main. » Li rois qui crut le conseil Erart li dist : « Erart, alez eslisiez de noz gens ceuz que vous voudrez, et faites en tel manière que vous porrez, que leur bataille qui est fort et espesse, puisse estre départie. »
Erart, quant il oï le commandement le roy, prist tantost XXX chevaliers preus et esleus, et les dessevra de la compaignie le roy, ne ne fist pas samblant que il se vousist combatre ; mes aussi comme se il s'en vousist fuir, se hasta d'aler celle part où fuie aparoit estre plus seure. Tantost li Espaignol qui cuidierent qu'il fuissent, s'escrierent à haute voiz : « Il fuient, il fuient », et s'appareillierent à ensuirre les en tel manière que il s'esparpeillierent si que Françoiz se porent bien ferir [en] euls. Challes, li rois, tantost comme il vit ce, se feri en euls a toute sa gent, et Erart et li sien retournèrent arriéres, et se ferirent en euls d'autre costé à grans cris. Quant il furent ainsi assamblez, si fu la bataille trop fort et trop aspre. Mes les gens Henri furent si chargiez de doubles armes qu'il avoient vestues, que les cops des Françoiz chaoient ausi comme en vain seur euls. Et pour ce que Espaignos n'avoient pas acoustumé à estre si chargiez d'armes, il furent mainz legiers et plus tost trebuschoient. Lorsque Françoiz aperçurent ce, si crièrent : « Aus bras, aus bras », et les prenoient par les espaules et les getoient à terre de leurs chevaus. Mes se Nostres Sires n'eust aidié aus Françoiz celle journée, leur vertu ne leur proece eust poi valu contre tant d'anemis en ii batailles si prèz à prèz. Et jasoit ce que touz sanz différence feissent chose de loenge digne, la haute chevalerie Gui de Montfort fu illuecques esprouvée et essaucié seur touz les autres,
quar très le commencement de la bataille, il se feri comme foudre entre ses anemis ; et ausi comme li senglers qui se forsane entre les chiens, il feroit si granz cops deçà et delà, que il tresperça la tourbe des anemis et retorna arriéres parmi euls en occiant et en abatant quanqu'il ataignoit à plain cop, si que toute la terre estoit couverte de sanc par là où il passoit. Illueques li avint que ses hiaumes li tourna ou chief ce devant derrières, si qu'à poi que l'alaine ne li failloit, ne ne veoit goûte, mes il feroit à destre et à senestre, ne ne savoit où, ainz feroit comme home forsené et hors du sens. Quant Erart de Valeri le vit en tel péril, si out pitié de son travail et s'aproça de Ji et le prist par le hiaume aus'mains, si que il le retorna arriers à son droit. Mes quant Gui senti que il fu priz par le hiaume, si hauça l'espée pour ce que il cuida estre priz de ses anemis, et feri Erart d'un merveilleus cop, et eust tantost recouvré l'autre, se il ne l'eust cogneu à la voiz. " Deçà et delà fu la bataille grant, et dura longuement, tant que les Espaignoz resortirent et se retrairent arriéres, et se merveillierent moult que si poi de gënt avoient si grant force.
Quant Henriz vit ce, si rassambla ses genz et les blasma moult et reprist de leur perece et leur dist que grant honte seroit de tant de chevaliers d'Espaigne preus et esleus, si poi de Françoiz vaincoient. Lorsque il entendirent ce, il se recueillirent ensamble et retournèrent à la bataille moult fièrement, et les Françoiz qui un poi s'estoient restrainz ou champ, les recueillirent moult viguereusement. Quant la bataille fu recommenciée, si i out grant abateiz et grant effusion de sanc, et ferirent tant Françoiz seur leurs anemis que il contraindrent Henri et sa gent à fuir. Un poi les ensuirrent, mes pour ce que il furent lassez des batailles que il avoient faites, et leurs chevaus trop grevez, il ne les porent longuement ensivir. Henri et sa
gent fuirent tant par casoiz et petites viletes, en ravissant ce que il pooient attaindre, que il vindrent jusques à Saint Beneoit du Mont de Cassie, et distrent à l'abbé de ce lieu et à touz que il encontrerent, que il avoient occis le roy Challe et tout son ost. Mes li abbés qui amoit le roy Challe, qui n'aperçut nul signe de victoire en eus, mes seulement honte et confusion ; quant il sout la vérité, si les fist prendre et mètre en prison, et les garda au roy Challe ^.
Comment Corrardins et Henriz furent renduz au roy Challe, et comment il les fist punir ; et de ceuz de Sezile qui se rendirent à lui.
^Quant li rois Challes et sa gent orent ainsi vaincu et chacié Henri du champ, comme vous avez oï, il rendirent grâces à Nostre Seigneur de la grant victoire que Diex leur avoit donnée, ne ne pridrent pas la loenge du fait à eulz, ainçoiz l'apliquierent à la devine puissance de Dieu, et puis entrèrent ou champ et recueillirent les despoilles^. *Aprèz ce, Challes qui sout que Corrardinz s'en estoit fuis en i chastel sus mer puis que il out esté vaincuz en la première bataille, envoia illuec de sa gent qui pridrent le chastel, et amenèrent au roy Corrardin en liens. Ne demora pas moult aprèz que li abbés du Mont de Cassie rendi Henri ^ par tele condicion, que Henris qui avoit mort deservie selonc les loiz, ne receust pas mort
1. En note : « Et lui mesmes eust fait destruire, se il n'eust esté homme de église. »
