Cf. Grandes Chroniques, t. VO, p. 249, chap. xcvii
rives de la rivière qui entre les ii oz couroit, qui hautes estoient, si que il ne porent ensamble mesler ne passer outre pour combatre. Quant Françoiz virent que il ne porent main à main combatre à euls, si s'estèrent jouste un pont de fust qui estoit sus la rivière, et attendirent illuec leurs anemis qui venoient encontre euls. Lorsque il furent assamblez deçà et delà au pont, la gent Henri vout passer outre ; mes Françoiz deffendirent le passage moult viguereusement aus glaives et as espées. Endementres que il se combatoient ainsi au pont, un grant nombre des genz Henri descendirent aval la rivière, que Françoiz n'en sorent riens, qui entendoient au pont garder, et passèrent outre par i lieu où la rivière estoit trespassable, et enclostrent la première eschiele le roy Challe entr'eulz et la rivière. Aprèz euls, hastivement trespassa Courradinz et sa gent, et les envaïrent par derrières a granz criz moult aigrement, si que il ne porent retourner au roy Challe. Quant li Provencel et les autres d'estrange nation virent ainsi leurs anemis courre seur euls, si orent si grant paour que il tournèrent en fuie vers les montaignes et laissierent leurs chievetaines et i poi de Françoiz qui se combatoient trop forment. Sus Henri de Cusances qui portoit les armes au roi Challe, chei tout le faiz de la bataille, quar ses anemis li coururent si aigrement sus pour ce que il cuidierent que ce fust li rois, que il le decoperent pièce à pièce, ja soit ce que il se fust moult bien defîenduz comme bons chevaliers. D'autre part, Jehans de Clari et Guillaume L'Estandart se combatirent trop viguereusement et firent tant par les cops de leurs espées, que il trespercierent la presse de leurs anemis et vindrent jusques à l'eschiele le roy Challe qui leur venoit en aide. Quant Challes et sa gent virent ces II chevaliers, si les prisierent moult en leurs cuers et loerent, et y pridrent grant exemple de bien faire cele
journée. Henriz d'Espaigne qui out veu les Prouvenciaus fuir, si les ensivi tant, li et sa gent, que il en occist la greigneur partie et retint.
Challes, li rois, qui out veu ainsi sa première eschiele desconfite, fu un poi troublez ; mes tantost aprèz ce li revint esperiz de force et de vertu, et parla à sa gent qui estoient entour lui en tel manière. « Seigneurs chevaliers, de France nez, renommez de force et de proece, n'aiez pas paour de ceuz qui enchaucent nos genz, ne de ceuz que vous veez ester devant vous, ja soit ce que il soient greigneur nombre de nous, quar par la vertu et par l'aide de Nostre Seigneur cui Eglise nous delïendons, nous les seurmontons en force. Assaillons ceuz qui ci devant nous sont, qui nous attendent à bataille, avant que il nous assaillent, quar nous les porrons legierement vaincre, si comme j'ai espérance, se nous nous ferons viguereusement en eus. »
Quant li rois Challes out ainsi admonesté sa gent, maintenant hardiece crut aus Françoiz et se rengierent et recueillirent en armes, et se ferirent^efforciement entre leurs anemis, et se combatirent à euls moult forment. Ne ce ne fu pas en vain que la chevalerie de France deservi mérites et loenges, comme il eussent très fort matière de vertu, quar leurs anemis estoient plus assez et miex armez, sanz comparoison que il n'estoient, et y avoit des plus fors chevaliers encontre euls du royaume d'Alemaigne. La bataille fu grant deçà et delà, et i out grant cri et grant noise. Li chaples des espées fu granz sus les hyaumes. Les cris de ceuz qui chaoient estoient messagiers de la mort angoisseuse. Toutes autres choses qui suivent péril de mort et de bataille, furent illuec veus et trouvez. Espessement chaoient les anemis de sainte Eglise, et furent les chans touz rouges de leur sanc ; ne ne cessèrent Françoiz de ferir d'espées jusques a tant que
la forsenerie des Alemans fu dontée et toute la gent Corrardin chaciée, prise ou occise.
Quant Corrardins vit le péril de mort qui cheoit seur soi, si tourna plus tost en fuie que nuls des siens. Illuec furent pris aucuns des greigneurs par qui la traïson et la conspiration avoit esté faite contre le roy Challe, et furent gardez en fers et en liens jusque a tant que jugement eust esté fait d'euls. Quant ceste bataille fu ainsi fenie, et Françoiz les orent ainsi vaincuz par la grâce de Dieu, il se recueillirent au commandement le roy ou champ ensamble, ne ne furent pas convoiteus de ravir la proie, ainçoiz descendirent de leurs chevaus et osterent leurs hiaumes pour euls esventer, et repridrent leurs alaines, quar il savoient bien que il avoient encore à combatre à dant Henri d'Espaigne et à sa gent qui estoient greigneur nombre que les autres qui retournoient de la chace des Prouvenciaus.
Ci aprèz ensuivant, parole comment li roys Challes vainqui Henri d' Espaigne et sa gent.
^Aprèz ce que Corrardins et ses gens furent desconfis, si comme vous avez oï, ne demora pas grantment quant Henriz d'Espaigne et sa gent retournèrent de la chace des Provenciaus, et s'arresterent seur une montaigne dont il porent bien veoir l'ost Challe et la gent Corrardin qui gisoit morte parmi le champ. Quant Henris vit Françoiz enmi le champ rengiez et serrez à banieres levées, et les charoignes des mors qui gisoient à terre. Si dist à sa gent : « Seigneurs chevaliers plains de très grans forces, resgardez comme nous sommes hui cest jour vainqueeurs partout. Nous avons occis par deçà les fuians, et les nostres
