Cf. Grandes Chroniques, t. VII, p. 266, chap. cvii

soleil escousant, il vindrent à x milles prèz du port. Mes li vens leur fu si contraires que il ne porent avoir accèz au port toute icelle journée. Lors il geterent leurs ancres et firent port de là où il n'avoit point de port. Mes toutes voies leur fu ce bon, quar la terre estoit prèz et une abbaïe où l'en courut en une barge, et aporta l'en de l'iaue douce et des herbes vers, par quoi les fuebles et les malades furent recriez. Le mardi aprèz, qu'il fu li vuitimes jours que li rois estoit entrez en mer, l'en mist les voiles au vent aprèz diner, et vindrent à ii milles prèz du port ; mes plus prèz il ne porent aprochier pour le vent qui estoit ja tournez en contraire. En la manière que l'en avoit fait devant, l'en courut en une barge en la ville de Chastiau-Castre ; mes l'en trouva les genz de la ville moult rebelles et moult contraires, quar à paines leur otroierent-il à prendre des yaues douces, et à paines porent-il avoir pour leur argent I poi de pain et i poi d'erbes. La cause pour quoi il le faisoient, si estoit pour ce que il se doubtoient moult d'euls, et pour la doubte que il en avoient, il ostoient leurs choses de la ville et les envoioient en lieus loing d'illueques plus fors.

Le merquedi aprèz, li rois Looys envoia i sien chevalier au chastelain du chastel et le fist amonester que il et ceuz de la ville souffrissent que les malades qui estoient en ses nez peussent descendre et prendre récréation en leur chastel, et que il feissent marchié de leurs choses qui faisoient à vendre à sa gent, et leur donassent pour autel priz comme il le dono.ient avant que il arrivassent à leur port. A ces choses respondirent cil de la ville et distrent que il voloient bien que les malades eussent récréation en la ville desous ; mais dedenz le chastel ne laisseroient-il nul entrer, quar il leur estoit deffendu des genz de Pise leurs seigneurs à cui la seignorie du chastel apartenoit. De leurs choses vendables distrent-il que il voloient bien que il les

eussent à droit marchié, et que les genz de la ville les aportassent hors pour vendre. Quant li rois oï ceste nouvele, si commanda que les malades fussent portez au chaste!, et en i out moult de portez, povres et riches^, des quiex aucuns moroient en la voie. Cil qui vis i porent estre portez furent receus en une maison de Frères Meneurs, i poi loing du chaste], quar dehors le chastel estoient poi de maisons de terre mauvaises qui n'estoient pas convenables ; mes ou chastel avoit meilleurs maisons et plus riches, es queles il ne voloient pas qu'il fussent portez.

Des choses vendables trouvèrent poi illueques les Françoiz, quar la gent de la vàlle les reponnoient et envoioient hors repostement, pour la pàour que il avoient. Ce pou que il trouvoient à vendre leur estoit vendu trop chier, quar une geline qui n'estoit vendue que iiii deniers genevoiz quant il vindrent au port du chastel, leur estoit vendue II sols de tournoiz ou plus. Et ainsi poez entendre de toutes les autres choses vendables. Encores faisoient-il plus, quar xii tournoiz qui valoient et estoient mis pour XVIII genevoiz quant il arrivèrent au port, il ne voloient prendre se pour tournois non. Li rois Looys qui sont ceste chose, envoia monseigneur Pierre le chamberlenc, i sien chevalier et ii mareschaus, derechief à ceuz de la ville pour leur monstrer que il fussent plus courtoiz envers sa gent. Il respondirent aus genz le roy et distrent plus par paour que par amour, que il feroient la volenté le roy selonc leur pooir ; et bien leur plaisoit que li rois ou aucuns des siens venissent ou chastel par tel convent que il les defïendissent des Genevoiz qui estoient mariniers le roy, quar les Genevoiz estoient anemiz aus Pisoiz leurs seigneurs. Les messages le roy respondirent et distrent que li rois n'avoit que faire de leur chastel ne de leurs forteresces ; mes il voloit seulement que les malades de son