mai

meismes, les mariniers drecierent leurs voiles et se parti li rois Looys du port de Nimeçon a grant compaignie et a grant plenté de nez et de vessiaus.

^Mès un poi de jours aprèz ce que li rois et les pèlerins se furent partiz du port, si grant contrariétez de vent leur avint que il vindrent prèz de Paphons, une cité de Chipre, et les convint retorner par ii foiz arriéres au port de Nimeçon. Lors vint à euls li princes de la Mourée pour aler avec euls ou secours de la sainte terre a grant plenté de vessiaus, et li dux de Bourgoigne qui avoit séjourné ou temps d'iver es parties de Rome. Illuec, au port de Nimeçon attendirent les pèlerins l'un l'autre et assamblerent leurs vessiaus qui en divers lieus estoient departiz par la force du vent et de la tempeste.

Aprèz ce, le jour de la Sainte Trinité^ que Nostre Sires leur donna bon vent, avint que les mariniers levèrent leurs voiles et siglerent tant par mer que nos pèlerins virent la terre d'Egypte le vendredi d'emprèz ^ et la cité de Damiete. Lorsque il aprochierent de la cité, il s'arresterent au port et ancrèrent leurs nez ; mes il le trouvèrent garni de grant multitude de Turs à pié et à cheval ; et l'entrée d'un flun que l'en apele Nylus, qui prèz du port couroit, estoit bien armée de grant multitude de galées et d'autres vaissiaus. Li roys Looys prist conseil à ses barons, et fu ordené que l'endemain au matin il ississent de leurs nez et preissent terre en une isle où li rois Jehans de Jérusalem avoit autrefoiz pris terre quant il asseja Damiete, en tel manière que le flun fust entreulz et la cité.

Au matin s'armarent et appareillierent ; si entrèrent es galées et en autres petiz vessiaus tant comme il porent,