Cf. Grandes Chroniques, t. VII, p. 150, chap. lvi

nerent contre sa venue tymbres et tabours, et le reçurent liement en seigneur et en maistre. Par lui acrut moult la force des Sarrazins, et à nostre gent avint par la volenté de Dieu ^ tout au contraire, quar une grant pestilence de diverses maladies et mortalitez generaus avint lors as homes et as bestes en l'ost de nos chrestiens, dont il furent si tormentez que poi en i avoit qui ne plainsissent et plorassent leurs mors ou leurs malades. Par ceste chose, fu moult amenuisié et degasté l'ost, et par delïaute de viandes dont il avoient si grant disete que pluseurs defailloient par fain. Nul vaissel ne pooit venir à l'ost de nostre gent par devers Damiete pour galées et pour autres vaissiaus que Sarrazins avoient mises par terre ou flueve de Nylus, qui tout roboient. Et puis que les Sarrazins orent pris pluseurs vaissiaus qui venoient à nos genz de Damiete, pridrent-il au derrenier ii granz nez qui aportoient vitailles et moult de bonnes choses à l'ost, et occidrent les mariniers et moult d'autre gent qui avec estoient^. Lorsque viandes failloient ainsi à nostre gent et les prouvendes à leurs chevaus, si cheirent tuit en desconfort et en haine grant et se pridrent au départir du lieu où il estoient pour venir à Damiete se la volenté Nostre Seigneur l'eust consentu.

'Le quint jour du mois d'avril, en l'an de l'Incarnacion Nostre Seigneur mil CC et L, si comme li rois Looys de France et l'ost des chrestiens estoit ou repaire de venir à Damiete, Sarrazins qui s'aperçurent que il s'en aloient, vindrent seur euls et les assaillirent a si grant effors et a si grant plenté de genz armées que nuls ne les pooit esmer. Illuec avint par la devine permission de Nostre Seigneur