ITI

1467, 19 novembre. Le Mans. 1483, octobre. Blois. — Lettres patentes du roy Charles VIII, confirmatives de celles du roy Louis XI pour les rangs et prérogatives des comtes de Laval.

« Charles, par la grâce de Dieu, Roy de France, sçavoir faisons à tous présens et à venir, nous avoir receu les lettres patentes de feu nostre très cher séigneur et père, qui Dieu pardoint, en forme de chartre, scellées de son grand seel en lacs de soye et cire verte, à nous présentée par nostre très cher et amé cousin François de Laval, comte de Montfort et sire de Gavre, desnommé esdites lettres, desquelles la teneur s'ensuit.

« Louis, par la grâce de Dieu, roy de France; scavoir faisons à tous présens et à venir, que nous, considérans la proximité de lignage en quoy nous attient nostre très cher et amé cousin François de Laval, seigneur de Gavre, voulant l’eslever en honneurs et privilèges ainsi qu’à sa personne appartient selon le degré de lignage en quoy il nous attient, à iceluy nostre neveu et cousin avons octroyé et octroyons par ces présentes, et par privilège spécial, et à ses hoirs comtes de Laval, que d’oresnavant ils soient en tels honneurs, lieu et prééminences, soit en nostre grand Conseil, en nostre Parlement, en tous autres lieux ou il se trouvera, et qu’il précède nostre chancelier et tous les prélats de nostre royaume, tout ainsi qu'ont fait et font nos très chers et amez cousins les comtes d'Armagnac, de Foix et de Vendosme. Si donnons en mandement à nostre amé et feal chancelier, et à tous nos autres justiciers et officiers, ou à leurs lieutenans, présens et à venir, et à chacun d'eux, si comme à luy appartiendra, que nostre dit neveu et cousin et sesdits hoirs comtes de Laval, ils fassent, souffrent et laissent jouir paisiblement de nos privilèges et octroy, car tel est nostre plaisir, nonobstant quelconques statuts ou ordonnances à ce contraires ; et afin que ce soit chose ferme et stable à tousjours, nous avons fait

mettre seel à cesdites présentes, sauf en autres choses nostre droict, et l’autruy en toutes.

« Donné au Mans, le dix neufième jour de novembre, l’an de grâce mil quatre cens soixante sept, et de nostre règne le septième. Ainsi signé: Par le Roy, le comte de Longueville, Guillaume de Varie, général, et autres présens: DE La LoërE. Visa.

« Lesquelles lettres dessus transcrites, après ce qu’elles ont esté bien au long veues et visitées en nostre grand Conseil, auquel estoient plusieurs grands seigneurs de nostre sang et lignage, prélats, barons et autres notables personnages, tant d’Eglise que laïcs, ausquels lesdittes lettres et le contenu en icelles ont semblé justes et raisonnables, avons eues et avons pour agréables, et icelles avec tout ce qu'elles contiennent, par l’advis et délibération des dessusdits seigneurs de nostre sang et gens de nostre conseil, et aussi en faveur et contemplation de nostredit cousin le comte de Montfort, réduisant en mémoire les causes contenues esdites lettres dessus incorporées, qui meurent nostre dit feu seigneur et père à octroyer le privilège contenu en icelles ; et aussi les grands services que nostredit cousin a dès son jeune aage fait à nostre dit feu seigneur et père, et continué jusques à son trespas, et depuis à nous fait chacun jour à l’entour de nostre personne, en très grand cure et solicitude, et qui continuellement est occupé avec nous et lesdits sieurs de nostre sang en nos plus grands et plus principaux conseils et affaires de nostre royaume, aussi la grande proximité de lignage, en quoy luy qui est fils de la fille de la propre sœur germaine de feu nostre très cher seigneur et ayeul (qui Dieu absolve), le roy Charles VITe de ce nom, nous attient, la familiarité parfaite et entière confiance que nous avons de luy, et les grandes et louables vertus qui sont en sa personne, avons louées, ratifiées, approuvées et confermées, et de nostre certaine science, grâce spécial, pleine puissance et authorité royal, louons, ratifions, approuvons et confirmons par ces présentes; par lesquelles, en tant que mestier est, les privilèges, faculté, octroy et autres choses déclarées esdites lettres dessus transcrites, avons de nouvel données et octroyées, donnons et octroyons à nostre dit cousin le comte de Montfort, seigneur de Gavre, par cesdites présentes, pour par luy, ses hoirs et successeurs comtes de Laval, en jouir et user à tous jours perpétuellement, pleinement et paisiblement, tout ainsi et par la forme et manière qu'il est contenu esdites lettres cy dessus incorporées. Si donnons en mandement, par ces mesmes présentes, à nostre amé et féal chancelier et à

tous nos autres justiciers et officiers, ou à leurs lieutenans, présens et à venir, et à chascun d’eux, si comme à luy appartiendra, que nostredit cousin et ses hoirs et successeurs comtes de Laval, ils fassent, souffrent et laissent jouir et user de nos présens, grâce, privilège, octroy et confirmation, à tous jours, perpétuellement, pleinement et paisiblement, sans leur faire, mettre ou donner, ne souffrir estre fait, mis ou donné aucun destourbier ou empeschement au contraire, ainçois si fait, mis ou donné leur estoit, le réparent et mettent ou facent réparer et mettre tantost et sans délay à pleine délivrance : car ainsi nous plaist il estre faict, nonobstant quelsconques ordonnances, usage, coustume, mandemens ou défenses à ce contraires. Et afin que ce soit chose ferme et stable

tousjours, nous avons fait mettre nostre seel à cesdites présentes, sauf en autres choses nostre droit et l’autruy en toutes.

« Donné à Blois au mois d’octobre, l’an de grâce mil quatre cens quatre vingts trois, et de nostre règne le premier. Ainsi signé; par le Roy en son conseil, auquel estoient monsieur le duc de Bourbon, les comtes de Clermont, d’Albret, de Dunois, de Comminge, vous, les évesques d’Alby, de Langres et de Coustances, les sires de Saint-Valier, de Curton et autres présens. E. Perir. Visa. »

Traité du droict appartenant au duc de La Trémoille au royaume de Naples. Paris, eshayes, 1648, in-40, p. 35.

1619, avril. Saint-Germain-en-Laye. — Confirmation du droict de nommer aux offices royaux.

« Louis, par la grâce de Dieu, roy de France et de Navarre, à tous présens et advenir, salut. Le roy Louis XI, l’un des plus prudens et plus advisez de